Yãmb sʋgsgã leoore

◼ Rẽ yĩnga, zemsame tɩ sõasg fãa b sẽn kõ Ministɛɛr lekollã bɩ Tʋʋmdã tigisg pʋgẽ poor bɩ kɛlgdbã wẽ nug-pogs bɩ?

Kɛlgdb nins sẽn ya a Zeova Kaset rãmbã yaa neb sẽn sɩd tar mi-beoogo. Yaa bõn-sõng tɩ b tʋll n wilg tɩ b nanda modgrã b saam-biisã sẽn maandã, la sõasgã b sẽn zĩnd ɛstaraadã zug n kõ wã. Tõnd wakatã dũniyã babs kẽer pʋsẽ, b tõe n wẽe nug-pogs n wilg naneb a woto. La nug-pogs wẽeb segd n yaa bũmb f sũur sẽn tus-f tɩ f maan zĩig pʋgẽ bala. Sẽn paase, b leb n tõe n wẽe nug-pogs n wilg naneb ne bõn-kãseng ned sẽn maane. Tõnd tigis-kãsemsẽ wã, bõn-kãsems la b segl-yã, tɩ d saam-biisã me rɩk sẽk la b maan modgr n paas n segl b sõssã. Rẽ n so tɩ d yãtẽ tɩ kɛlgdbã wẽed nug-pogs sõssã baasgẽ la wakat ning menga b kũunã sasa.

La d segd n maana woto d Rĩungã Rotẽ bɩ? Vẽenega noor ka be sẽn kɩɩsd rẽ maanego, sã n mikame tɩ yaa d sũurã n tus-d zĩig pʋgẽ bal tɩ d wilg d naneb ne nug-pogs wẽebo. La naoor wʋsgo tõnd ka wẽed nug-pogs sõs-kãensã poor ye. Tɩ bõe, bala b tõe n wa lebga bũmb b sẽn maand b wee n maan-a bala.

Baasg zãnga, bũmb la tõnd fãa tõe n maan d Rĩungã Rotẽ n wilg tɩ d tara naneb hakɩk ne modgr nins sõsdã sẽn maandã. Yaa d sẽn na n kelgd-a neere, n get-a t’a gomda, n wilgd ne d nen-wamdã tɩ d kelgda a tagsa wã sõma la d rɩt b yõodo. Sẽn paase, d leb n tõeeme n gom ne sõsdã tigisgã poore, n wilg-a tɩ d sũur yɩɩ noog ne a sõasgã.