Yãmb sogsgã leoore

◼ Rẽ yĩnga zemsame tɩ d wẽed nug-pogs sõsg fãa poore, Wẽnnaam tʋʋmdã lekoll la tʋʋmdã tigsg sasa bɩ?

A Zeova sẽn wa n naan tẽngã n sa wã, “yibeoog ãdsã lagma taab n yɩɩle, tɩ Wẽnnaam kom-dibli wã fãa kaas ne sũ-noogo.” (Zoob 38:7) Wẽnnaam a Zeova kom-dibli kãensã sẽn yaa malɛgsã ra ratame n kils a Zeova bũmb ning a sẽn naanã sẽn yaa kãsengã yĩnga, bala wilgda a yamã, a nonglmã, la a pãngã.

Yaa sõma tɩ tõnd me wilg d saam-biisã tɩ d nanda b sõsgã, la b sẽn modg to-to wã. Wala makre, tõnd wẽeda nug-pogs diskuur poore, la tigis-kãsemsẽ wã sõssã poore. B rɩka sẽk wʋsg n segl bũmb ning tõnd sẽn kelg bɩ d sẽn gesã. Nug-pogsã wẽeb yaa sẽn na yɩl n wilg tɩ d sũur yɩɩ noog ne neb nins sẽn modg n seglã, la ne saglsã a Zeova sẽn tũnugd ne a Gomdã la a siglgã n kõt tõndã.—Ezai 48:17; Mat. 24:45-47.

La d tog n wẽeda nug-pogs Wẽnnaam tʋʋmdã lekoll sasa la tʋʋmdã tigsg sasa bɩ? Noor takɩ ka be n gɩdgd rẽ ye. Sẽn yɩɩd fãa sã n yaa karen-biig sẽn maan a pipi sõsg tɩ d sũur sɩd yɩ noog ne-a. La nebã tõeeme n wa rɩk nug-pogsã wẽeb tɩ lebg minungu, bɩ lebg wala rog-n-mik buudu, tɩ yaool n pa sũ-noog hakɩk yĩng ye. Rẽ n so tɩ tõnd pa segd n wẽ nug-pak sõsg fãa poor ye.

Baa ne d sẽn pa nong n wẽed nug-pogs Wẽnnaam tʋʋmdã lekoll sasa la tʋʋmdã tigsg sasa wã, d fãa tõe n wilgame tɩ d nanda zãmsgã, la tɩ d sũur nooma ne neb nins sẽn modg n segl-a wã ne manesem a taaba. D tõeeme n wilg naneb ne d sẽn na n yok d tʋb sõma n kelgd sõsdã. Tigisgã poor me, d tõe n tɩ pẽga a soabã, a sẽn maan modgrã.—Ef. 1:15, 16.