Zãmaan fãa nin-kãseng sẽn ka to sebrã zãmsgo
1 Yʋʋm-vẽkr kiuugã rasem a 6 semennã, d na n sɩnga “Zãmaan fãa nin-kãseng sẽn ka to” sebrã zãmsgo. Seb-kãngã zãmsg na n tẽeg-d-la a Zezi Kirist vɩɩmã la a koe-moonegã yelle, hal tɩ na n yɩ tõnd ned kam fãa noogo! La sebrã sẽn pa tolg n wõnd sɛb a taabã d sẽn zoe n zãmsã, yɩta sõma tɩ d gom a zãmsgã sẽn na n yɩ to-to wã yelle.
2 Sebrã nens pa tar nimero-rãmb ye. Rẽ n so tɩ zãmsgã na-kẽndr sẽn na n yit Rĩungã Tʋʋmd pʋgẽ wã na n wilgd sags nins d sẽn na n zãmsã. Semen fãa, tõe n yɩɩ sags a yiib la d na n zãmse. Sak 35, 111, la 116 wogmame, tɩ d na n pʋɩ sak fãa zĩis wʋsgo. Zãmsgã sasa, karemdã na n deng n karma sakã tõre, tɩ taoor lʋɩtã sok sogsg nins sẽn be baasgẽ wã. Sã n yaa sak 35, 111, la 116, karemdã na n karma babg ning b sẽn na n zãmsã fãa, tɩ taoor lʋɩtã yaool n sok sogsgã. B pa maan tɩ sull fãa tar a sokr tɩ d tõe n yã leoorã be ye. Leoor fãa segd n tika zãmsgã zugu.
3 Sẽk sã n beẽ, b segd n karma vɛrse nins fãa sẽn be sakã baasgẽ wã. B sẽn segd n karmã sã n yaa woko, b tõe n pʋɩyame, n kos neb a wãn tɩ b karem tɩ kɛlgdbã yaool n tik rẽ n leoke. Taoor lʋɩtã sã n pĩnd n segl sogsgo, na n sõnga kɛlgdbã tɩ b tõog n leok n wilg vɛrse nins d sẽn karmã sẽn sõngd to-to tɩ d wʋm zãmsgã n paase. Sogsgã la leoorã tog n sõnga kɛlgdbã tɩ b tags a Zezi Kirist vɩɩmã la a koe-moonegã yelle.
4 “Zãmaan fãa nin-kãseng sẽn ka to” sebrã gomda a Zezi vɩɩmã yelle, n bilgd yɛlã sẽn pʋg taab to-to. D sã n mamsd yɛlã sẽn yɩ to-to wã, la b sẽn yɩ zĩis ninsã d yamẽ, na n sõngame tɩ kibar fãa pa d pʋ-tẽerẽ. Woto yĩnga, gomd-y imaaz-rãmbã yelle, la y tẽegd n get kartã sẽn be sebrã sɩngr goam poorã.
5 Pipi semennã zãmsgã na n tika sɩngr goamã. Gom-zu-bil fãa sul toor-toorã kareng poore, taoor lʋɩtã na n soka sogsg a sẽn pĩnd n segle, tɩ b yaool n kẽng ne gom-zu-bil ning sẽn pʋgdã. Sõs-kãngã na n sõng-d lame tɩ d rɩ zãmsgã sẽn na n sɩng yʋʋm-vẽkr kiuugã tɛkã yõodo. Sẽn na yɩl tɩ zãmsgã naf tigingã neba, yɩta sõma tɩ ned fãa segl neere. Taoor lʋɩtbã me segd n segla b mens sõma sẽn na yɩl tɩ semen fãa, bɩ saam-biisã tõog n bãng tõnd Zu-soab la d fãagd a Zezi Kirist sẽn yaa zãmaan fãa nin-kãseng sẽn ka to wã n paase.