“Moon-y koɛɛgã . . . ne yãgbo”
1 Yãmb sã n paam bũmb tɩ b gʋls a zug tɩ “YEL-YÃGDEM,” wãn-wãn la y na n ges-a? Gom-biig ning sẽn yaa “yel-yãgdmã” rat n yeelame tɩ “bũmb sẽn baood tɩ b ges a yell zĩig pʋgẽ.” Ne bʋʋm, tʋm-tʋmd a Poll kõo kiris-nebã noor n yeel tɩ b ‘moon koɛɛgã . . . ne yãgbo.’ (2 Tɩm. 4:2, NW ) Yãmb sakdame n maand woto, n get tʋʋm-kãngã yell zĩig pʋgẽ bɩ?
2 Tõe tɩ b ra togsa a Poll t’a saam-biisã ra sɩngame n dat n ‘maan kʋɩɩng ne b tʋʋmdã’ kiris-nedemdã wɛɛngẽ. (Rom 12:11, NW ) Rẽ kɩtame tɩ b tʋʋmã ra ka womd biis wʋsgo, sẽn paase, b ra ka le tar sũ-noog ning b sẽn da tõe n paamẽ b sã n da sõngdẽ neb a taabã ye.
3 A Zezi sẽn da get ministɛɛrã to-to: Ad a Zezi sɩd yã sũ-noog a ministɛɛrã pidsg pʋgẽ! A yeelame: “Mam dɩɩb yaa tɩ maan sẽn tʋma maama ratem, la tɩ maan bãmb tʋʋma n sɛ.” A Zezi mak-sõngã tusa a karen-biisã tɩ b tʋll n pids ministɛɛrã. A Zezi kenga b pels n togs-b tɩ ‘pʋtã pelgame n ta tigisgu.’ (Zã 4:34, 35) A Zezi puka yãgdem yam a ministɛɛrã tõr pʋgẽ. Woto yɩɩ vẽeneg a sẽn da yeel a karen-biisã tɩ b “kos tigisga soaba tɩ b tʋm tigisdba tɩ b kẽng bãmb tigisgã.” (Mat. 9:38) A Zezi ra miimi tɩ moonegã n da ya a tʋʋmdã, la a ra rɩka sard kãn-kãe n ka na n bas tɩ bũmb ba a ye gɩdg-a ne rẽ maaneg ye.
4 Yaa wãn to yẽ ne tõndo? Rũndã, yaa yãgb n yɩɩd pĩnd tɩ d kẽng taoor ne moonegã tʋʋmde. Dũniyã zĩis wʋsg pʋsẽ, pʋtã pelgame n dat tigisgu. Baa tẽns nins sẽn wõnd b zoe n kõo kaset sõma wã, neb tusa n deegd lisg yʋʋmd fãa. Yɛl siglg kãngã saab sẽn kolgd tʋʋll-tʋʋllã, d tara ‘Zusoaba tʋʋmd wʋsg’ n na n maane. (1 Kor. 15:58) Rũndã, tara yõod wʋsg n yɩɩd pĩnd tɩ d modg sõma-sõma n taas neb a taabã Rĩungã koɛɛga.
5 Bɩ d kẽes d mens zãng-zãng n taas neb a taabã koe-noogã, zak-zak la zĩig ning fãa d sẽn na n yã-b teritoaarã pʋgẽ. D sã n kẽesd d mens zãng-zãng moonegã tʋʋmd pʋgẽ, d wilgda vẽeneg tɩ d ningda Rĩungã pipi zĩigẽ d vɩɩmã pʋgẽ. (Mat. 6:33) D sã n moond koɛɛgã ne yãgb la ne kɩs-sɩdã, rẽ na n kõ-d-la sũ-noog wʋsgo.