Yãmb tara maan-m-meng maoong yam bɩ?
1 Tõnd sã n nand bũmb ning a Zezi Kirist sẽn maan ãdem-biisã yĩng n ka tall ratem-n-yembrã, segd n tusa tõnd tɩ d rɩk d tõodã la d pãngã fãa n tʋm ne maan-m-meng maoong yam. Gʋlsg Sõamyã kota tõnd tɩ d maan woto: “Kõ-y [y] yĩnsã wa maan-vɩɩse, sẽn yaa sõmse, sẽn tat Wẽnnaam yam, baleng tʋʋmd ne yãmb tagsgã tõogo.” (Rom 12:1, NW ) Vaees-m-meng wakat fãa na n sõnga yãmb tɩ y ges sã n yaa ne yãmb yɛlã sẽn yaa to-to wã, y sã n wilgda yam kãng buud wa y sẽn tõe tɛka.
2 Biiblã bãngr baoob pʋgẽ: Yãmb baoa sẽk sẽn na yɩl n maand y meng Biibl karengã la zãmsgã n ka vaandẽ bɩ? Yãmb tũuda geelg-n-tʋm kãng sõma bɩ? Yãmb minim n segenda tigingã tigiss sõma bɩ? Yãmb sã n yaa zak soaba, yãmb zãmsda Biiblã ne y zakã rãmb n ka vaandẽ bɩ? D sã n dat n maan bõn-kãensã, tõe n baoodame tɩ d tall mong-m-menga, n boog sẽk ning d sẽn dɩkd televiziõ wã bɩ yɛl a taabã taoore. Baasg zãnga, mong-m-meng kãng ka baa fʋɩ, y sẽn mi tɩ y sã n dɩk sẽk n vaees Wẽnnaam Gomdã sõngd-y lame tɩ y paam vɩɩm sẽn-kõn-sa wã!—Zã 17:3.
3 Y kambã zãmsg pʋgẽ: Wakat ning sẽn zems n yɩɩd tɩ b sɩng maan-m-meng maoong yam zãmsg yaa yãadmã wakate. Zãms-y y kambã b bãng tɩ baa reem wakat sẽn be wã, wakat me n tog n zĩnd tʋʋm la teokaratik yɛl yĩnga. (Ef. 6:4) Kõ-y-b zak pʋgẽ tʋʋm sẽn tar yõod tɩ b maane. Yãk-y geelg-n-tʋm sẽn na yɩl n lagemd ne-b n tʋmd ministɛɛrã pʋgẽ n ka vaandẽ ye. Kɩt-y tɩ y zãmsgã tall pãng ne y mengã mak-sõng tũnugri.
4 Tigingã tʋʋm pʋsẽ: Tigingã paamda bark wʋsgo, sã n mik tɩ neb nins fãa sẽn be a pʋgẽ wã sakdame n modgd sõma n maand sẽn nafd neba fãa. (Heb. 13:16) Y tõeeme n dɩk sẽk n paas Rĩungã mooneg la karen-biisã maaneg tʋʋmd pʋgẽ bɩ? Y tõee ne yamleoog n kãab y sõngr bãad dãmbã la sẽn kʋʋl-bã, tõe tɩ yaa sẽn na yɩl n sõng n dɩk-b n wa tigissẽ wã bɩ?
5 Sẽn deng t’a Zezi rɩk a ninsaal vɩɩmã n maan maoong sẽn yaa kãseng n yɩɩdã, a sagla a karen-biisã tɩ b sik b yamã Rĩungã yɛl zut n yɩɩdã, n lebs bũmb a to buud fãa poorẽ. (Mat. 6:33) D sã n bao n tall maan-m-meng maoong a woto, rẽ na n kõo tõnd sũ-noog sẽn yaa kãseng n yɩɩda, tɩ d ket n sõgend a Zeova ne sũ-noogo.