“Bɩ y gũ”
1 A Zezi sẽn bilg yel-kãsems nins sẽn da na n zẽng yɛl siglg kãngã yaoolem dayã poore, a sagla a karen-biisã ‘tɩ b gũ.’ (Mark 13:33) Bõe yĩng tɩ kiris-nebã tog n gũ? Tõnd bee ninsaal kʋdemdã wakat ning sẽn yaa yell n yɩɩdã pʋgẽ. Tõnd ka tog n deem n suus tẽebã wɛɛngẽ ye. Dẽ d wat n pa nand tʋʋmd ning a Zeova sẽn kõ-d tɩ d maan saabã wakat kãngã wã ye. Tʋʋm-kãng la bʋgo?
2 A Zeova kɩtame t’a nin-buiidã moond Rĩungã koe-noog sẽn yaa ãdem-biisã saag-yɛngã tẽngã gill zugu. Tõnd sẽn tʋmd ne Wẽnnaam siglgã sõmb-sõmbã kɩtdame tɩ b bãng tõnd n bak wala kiris-neb hakɩk sẽn mi wakatã sẽn ya a soaba, la sẽn mi tɩ b segd n sõnga neb a taabã tɩ b wʋm “vɩɩm sẽn-ka-sɛt goama.” (Zã 6:68) D sã n kẽesd d mens ne yẽesem tʋʋm-kãngã sẽn tar yõod n yɩɩdã pʋgẽ, rẽ na n yɩɩ kaset sẽn wilgd tɩ d gũuda tẽebã wɛɛngẽ.
3 D sũyã tusd-d lame tɩ d moondẽ: D sẽn ya a Zeova Kaset rãmbã, d segd n talla yam-sõng ne d ministɛɛrã. Tõnd sẽn nong Wẽnnaam la d taabã tusda tõnd tɩ d moondẽ. (1 Kor. 9:16, 17) D sã n maand woto, d na n fãaga d mens la b rãmb nins sẽn kelgd tõndã. (1 Tɩm. 4:16) Bɩ d rɩk sard kãn-kãe n moon goosneem sẽn yaa sõma n yɩɩd ning to buud ãdem-biisã sẽn zɩ n paama, sẽn yaa Wẽnnaam Rĩungã! Bɩ d maand woto n ka vaandẽ wa d sẽn tõe tɛka, la tɩ kaoos wa sẽn segdã!
4 Yel-kãseng a yembr n kɩt tɩ tõnd ministɛɛrã yaa yãgb yell ne tõndo, yaa to-kãsengã pusgr sẽn na n wa wakat ning d sẽn ket n be tʋʋmdã zugã. Tõnd sẽn ka mi wakatã la lɛɛrã kɩtame tɩ yaa tɩlae tɩ d gũus la d segl wakat fãa, n delld a Zeova pʋʋsg pʋgẽ. (Ef. 6:18) Moonegã tʋʋmd sẽn segd n maan n ta zĩig ningã ket n tara yalgre. La daar n wat ka la bilfu, tɩ kaset kũun tʋʋmd ning sẽn yaa kãseng n yɩɩd ninsaal kʋdemd pʋgẽ wã na n ta a zʋg-tẽn-sʋka.
5 Tũ-y noor ning a Zezi sẽn kõ ‘tɩ b gũ’ wã ne kɩs-sɩda. Rẽ yaa bũmb sẽn pak masã n yɩɩd pĩnda. Bɩ d sak n maan woto, n tall yãgdem yam. Wakat fãa tẽebã wɛɛngẽ bɩ d yɩ neb sẽn yaa maan-tɩ-zems rãmba, nin-yẽesens la tʋmdb a Zeova sõgenegã pʋgẽ. N-ye, bɩ d “yɩ gũusb n tall d yam vẽenemã.”—1 Tes. 5:6, NW.