D waoog Wẽnnaam la ninsaalb noy d tʋʋmdã yãkr pʋgẽ
1 B sã n ges-b wala siglga, a Zeova Kaset rãmbã tara yʋ-noog dũniyã gill zug b sẽn yaa tẽng-n-biis sẽn yaa pʋ-peelem dãmbã yĩnga. Kiris-ned hakɩk ba a yembr ka na n tʋll n maan bũmb sẽn na n sãam a yʋ-noogã b sẽn nams n paamã ye. Y sã n segd n maan yãkre, y na n saagame n maan bũmb sẽn kɩɩsd laloa wã ligd paoong yĩng bɩ? Ayo! Sãmbg sẽn ka be, walla tɩ y sãam y yʋ-noogã la y paoog y no-sõmsã ne a Zeova balengã mengã, y na n sakame n kong ligdã.
2 Togs sɩda, f sã n dat tɩ b kell n mi-f wala nin-tɩrg la pʋ-peen-neda, rẽ tõe n kɩtame tɩ f wa kong ligd wakat ninga. Sẽn yɩɩd fãa, rẽ sã n baoodẽ tɩ f bas bɩ f zãgs tʋʋmd sẽn kɩɩsd Wẽnnaam la Tẽngã noyã. Yãmb yʋ-noogã tara yõod ne yãmba, bala a waoogda y saasẽ Ba wã la a tõe n sõng-y tɩ y kɩt tɩ neb a taabã wa tũ yãmb vɩɩm sorã la y Wẽnnaam a Zeova.—Yel. 11:30; 1 Pɩɛ. 3:1.
3 La sẽn yɩɩd fãa, kiris-neb hakɩkã getame tɩ bãmb zems-n-taarã ne a Zeova tara yõod wʋsg ne-ba. Wẽnnaam nee b sẽn maandã fãa, tɩ b tʋll n noog a sũuri. (Heb. 4:13) Woto yĩnga, b kɩɩsda kʋɩɩbg ning sẽn yaa maan zãmb bɩ b kɩɩs Tẽngã noy nins sẽn ka kɩɩsd Wẽnnaam noyã.—Yɩɩl 15:1-3.
4 Saam-biis wʋsg tʋmda b mense. B sã n maand b tʋʋmã, b wilgdame tɩ b yaa neb sẽn tar yam tẽebã wɛɛngẽ, tɩ ne woto bɩ b noogd a Zeova sũuri. (Yel. 27:11) Yaa rẽ yĩng la tõnd fãa sẽn segd n gũus n ges d tʋʋmdã sã n zemsa ne laloa wã. Kiris-neb yel-gɛtbã ‘ka tog n paam taal ye,’ tɩ rẽ yaa bũmb b sẽn baood tɩ b pids tɩ b yaool n yãk-b tɩ b yɩ yel-gɛtba. Woto me, Wẽnnaam nifẽ, tigingã neb fãa ka tog n paam taal ye.—1 Tɩm. 3:2, NW; Ges-y Efɛɛz rãmba 5:27.
5 D rɩk makr ne tɩta koosg soayã zutu. Rẽ yaa bũmb tẽngã noy sẽn gɩdge. Sẽn paase, sẽn deng tɩ b koos tɩɩm, baa nasaar tɩt koos-roog pʋgẽ menga, Goosneema tʋʋmd sull sẽn get laafɩ wã yellã n tog n ges-a nanda. Tõnd sã n koosd tɩt woto soayã zutu, d kɩɩsda Tẽngã noyã.
6 Sẽn paase, neb nins sẽn koosd tɩt a woto wã wʋsg sẽn yɩɩd pa logtoɛɛmb ye. Dẽ b tõe n paama zɩɩm taale, b sã n sagl ned t’a rɩk tɩɩm sẽn tõe n kɩt t’a lʋɩ bãag bɩ a ki menga. Yel-kãngã pʋgẽ, na n le yɩɩ Wẽnnaam noor kɩɩsgo. Yʋʋmd 1991, sɩpaolg kiuug rasem 22 Réveillez-vous! wã seb-neng a 7, sull a 5, yetame: “B rãmb nins sẽn kõt sagls laafɩ wã wɛɛngẽ wã, b yaa logtore . . . bɩ zoa sẽn tʋll f neer la sẽn ka wʋm tɩ seke, tʋkda zɩɩb sẽn yaa kãseng b sã n wa sagend ned sẽn pa keeme. Sẽn yɩɩd fãa sã n mik tɩ saglgã b sẽn kõ wã yaa wẽnga bɩ b sãamda sõngr sẽn nong n womd biisi. Saglgã leb n tõe n kɩɩsda sõng-kãng bɩ a kɩtdẽ tɩ b ka paam-a tao-tao ye.”
7 Yaa kẽem dãmbã sẽn be kiris-neb tigingã pʋgẽ zɩɩb tɩ b welg yɛl sẽn tɩ loe ne Wẽnnaam noyã kɩɩsgo. Ned sã n kɩɩsd tẽngã noy vẽenega, tɩ b mi-a wala ned sẽn yaa no-kɩɩsa, a pa kõt mak-sõng ye. Dẽ a ka tõe n paam zu-nood sẽn yaa zall tigingã pʋgẽ ye. Tʋʋmd sẽn kɩɩsd laloa wã sã n waa ne ned kũum yaa zɩɩm taale, la sẽn tõe n baoodẽ tɩ tigingã maan vaeesg n bãng yɛlã võore.
8 Ned ning fãa sẽn kɩɩsd tẽngã laloa ne yamleoog kɩɩsda Wẽnnaam zu-sobendo, la b “ningda bʋʋd b mens zutu.” (Rom 13:2) Bʋʋd sẽn yit ãnda nengẽ? Pa tɩlae tɩ yi Wẽnnaam nengẽ bal ye. Ned sã n kɩɩs laloa wã, pãn-soaadbã tara sor n na n sɩbg-a. B mii a Zeova Kaset rãmbã wa neb sẽn pa kɩɩsd ninsaalb zu-sobend ye. Tigingã ned sã n wa kɩɩs laloa wã, tigingã ka na n sõng-a t’a põs sɩbgr sẽn zems ne laloa wã ye. Sã n yaa woto, a ka segd n tags tɩ b namsd-a-la a tẽeb yĩnga, dũniyã pãn-soaadb sã n wa sɩbgd-a ye.—1 Pɩɛ. 2:13-17, 20.
9 Ad sɩd yitẽ-la bʋko, b sã n wʋm tɩ pãn-soaadbã n deeg teed a Zeova Kaset soab sẽn koosd tɩ kɩɩsd laloa wã, bɩ sẽn kɩt tɩ ned yik bãag Kaset soabã sẽn ka waoog vɩɩmã sẽn yaa sõngã yĩnga. Dẽ, baa vɩɩmã sã n lebga toogo, d dat n ket n tũuda noyã d tʋʋmdã yãkr pʋgẽ, n da sãam Wẽnnaam nin-buiidã fãa yʋ-noog ye.