D wilg tɩ nebã yell pak-d lame, n manegd d sẽn moond to-to wã tɩ zemsd ne b yɛlã
1 Tʋm-tʋmd a Poll kõo makr sẽn sɩd yaa sõma. Wakat fãa, a ra manegda a sẽn moond to-to wã tɩ zemsd ne a kɛlgdbã sẽn yit zĩig ningã la b sẽn tagsd to-to wã. (1 Kor. 9:19-23) Tõnd me segd n mao n maana boto. D sã n dengd n segend d meng bilfu, wakat fãa d na n tõogd n manegda sõssã makr sẽn be Rĩungã Tʋʋmd sebrẽ wã tɩ zemsd ne nebã yɛl d moonegã zĩigẽ. D sã n wa kolg zak noore, d tõe n yãa teed sẽn tõe n kɩt tɩ d bãng bũmb nins sẽn pak nedã, tɩ d tõe n paas rẽ d sõsgã pʋgẽ. La ne manesem a to me la d tõe n kɩt tɩ d sõssã zems ne nebã yɛl d koe-moonegã sasa.
2 D tik d sõsgã d kɛlgdã leoor zugu: D sã n wa moond koe-noogã, naoor wʋsgo, d sokda nebã sokre. B sã n leok-do, d manesem yaa wãn-wãna? Rẽ yĩnga d pẽgd-b-la zugẽ-zugẽ bal la d kell n sõs bũmb ning d sẽn da segl n na n sõsã zug bɩ, bɩ d sẽn na n sõs to-to wã na n wilgame tɩ d kelga b leoorã neere? D sã n sɩd kelg-b neere, d bãngda sogsg nins d sẽn na n sok-b ne yam n bãng b sẽn sɩd tagsd bũmb ningã. (Yel. 20:5) Woto d tõogd n tika d sõsgã Rĩungã koɛɛg neng ning sẽn tar loees ne yɛl nins sẽn pak kɛlgdbã zugu.
3 Woto baoodame tɩ d sakd n sõsd yɛl d sẽn da pa segl d mens n na n sõs zutu. D sã n sɩng sõsg bũmb sẽn nan maan tɩ nebã gomd a yell zug tɩ d kɛlgdã wilg yell sẽn be bãmb babgẽ wã wall sẽn pak yẽ mengã, d sã n sɩd ratame n sõng-a, d na n tika d sõsgã rẽ zugu.—Fil. 2:4.
4 D kɩt tɩ d sẽn moond to-to wã zems ne nebã yɛlã: D sã n sõsd ne ned t’a wa sok sokre, tõe tɩ sẽn sõmb yaa d sẽn na n bas n tɩ bao kibay a taab a sokrã zug n paas n yaool n wa leok-a nindaare. D leb n tõe n kõ-a-la sɛb sẽn wɛgsd bũmb ning a sẽn tʋll n bãngã sõma. Manesem kãensã fãa wilgdame tɩ d rata ne d sũy fãa n sõng nebã tɩ b bãng a Zeova.—2 Kor. 2:17.