Yʋʋmd 2009 rasem a tãab tigis-kãsengã
1. a) D sã n keng tigis-kãsengã rasem a tãab fãa, nafa bʋs la d na n paame? b) Bõe ne bõe la d segd n pĩnd n maane?
1 Tõnd fãa gẽegda yʋʋmd 2009 rasem a tãab tigis-kãsengã. Sasa kãngã, tõnd ne d saam-biisã “sẽn mi tɩ [d] segd n baoa” a Zeova wã na n lagma taab n pẽg-a. (Mat. 5:3, NW ) A Zeova daarã sẽn tar kolgrã yĩnga, d sagenda ned kam fãa t’a modg n kẽng rasem a tãabã fãa sẽn na yɩl n paam n sõs ne a saam-biisã la a rɩ zãmsgã sẽn na n sõng-a t’a yals kan-kãe tẽebã pʋgẽ wã yõodo. (Sof. 1:14) Kɩt-y tɩ y karen-saamb dãmbã bɩ y tʋʋmã taoor dãmb bãng tɩ tigis-kãsengã tara yõod wʋsg yãmb tũudmã pʋgẽ. Tõnd sã n modg n segl d mens pĩnd la d kos a Zeova sõngre, d tõe n talla bas-yard t’a na n sõng-d lame.—Ezai 50:10.
2. Baa d sã n pa paam sor n na n kẽng tẽn-tẽns tigis-kãsenga, bõe na n kɩt tɩ d rasem a tãab tigis-kãsengã wõneg tẽn-tẽns tigis-kãsenga?
2 Tẽn-tẽns tigis-kãsemsã: Sẽn mik tɩ yaa tẽns a wãn pʋsẽ bal la b na n maan tigis-kãsems-kãensã wã yĩnga, yaa neb nins b sẽn kõ sorã bal n segd n kẽnge. D sã n sak n tũ sagl-kãngã, na n kɩtame tɩ nebã ra wa gũm tɩ zĩig kaẽ ye. (1 Kor. 14:40; Heb. 13:17) Rasem a tãab tigis-kãsems kẽer me na n yɩɩ wa tẽn-tẽns tigis-kãsemse, bala misioneer dãmba, Betɛllẽ tʋm-tʋmdba, la tʋm-tʋmdb a taab na n leba b tẽnsẽ n maan tigis-kãsemsã.
3. Bõe la d tõe n maan d saam-biis kẽer yĩnga, tɩ wilgdẽ tɩ d nong-b lame?
3 Sõng-y neb a taabã tɩ b kẽnge: Saam-biis n be y tigingẽ wã n dat sõngr sẽn na yɩl n kẽng tigis-kãsengã bɩ? Y sã n sɩd sõng-b tɩ b tõog n kẽnge, y tũuda saglg ning sẽn yeel tɩ: “Bɩ yãmb ned kam fãa da ges a meng yell bal ye, bɩ y ges taab yell me.”—Fil. 2:4.
4, 5. Sã n mikame tɩ y na n kẽnga tigis-kãsengã tẽng a to pʋgẽ tɩ y rat ro-gãag bɩ kibay a taab rẽ wɛɛngẽ, bõe la y segd n maane?
4 Y sẽn tõe n paam kibay tigs-kãsengã wɛɛngẽ to-to: Nand tɩ y bool Betɛllẽ wã n sok wakat ning la zĩis nins tigis-kãsemsã sẽn na n zĩndã, reng-y n ges-y yʋʋmd 2009 tʋʋlg kiuug pipi daar Gũusg Gasgã ne farendã pʋgẽ. Sẽn paase, b rengd n gʋlsa lɛta n tool tigimsã, n wilg tigis-kãseng ning bãmb tigingã sẽn segd n kẽngã, sẽn na n yɩ ray ninsã, la zĩig ningã me.
5 Sã n mikame tɩ y na n kẽnga tigis-kãsengã tẽng a to pʋgẽ tɩ y rat ro-gãag bɩ kibay a taaba, y tõe n gʋlsa neb nins sẽn get tigis-kãseng-kãng yellã. Y tigingã sekertɛɛr tõe n bao n bãnga adɛrs rãmbã ne saam-biig sẽn be sull ning sẽn get tigis-kãseng ning yãmb tigingã sẽn segd n kẽngã pʋgẽ. Sẽn na yɩl tɩ b tõog n leok-yã, tẽeg-y n gʋls-y y yʋʋr la y tigingã adɛrs ãnvelop vɩʋʋg zug n sui y lɛtrã pʋgẽ n toole.
6. Y sã n paam tɩ y zoa bɩ y roagd sak n na deeg-y tigis-kãsengã sasa, wãn to la y tõe n wilg tɩ y waoogd-a lame?
6 Rɩk-y segls n bao ro-gãaga: Tẽns wʋsg pʋsẽ, ligdã kaalmã kɩtame tɩ yaa toog tɩ zak a ye neb fãa paam ro-gãas lotɛllẽ. Woto kɩtame tɩ saam-biis kẽer rɩkd segls sẽn na yɩl n paam b zoa bɩ b roagd zak sẽn pa zãr ne tigis-kãsengã zĩigẽ n gãande. Sã n mikame tɩ y yãka yam n na maan woto, yɩta sõma tɩ y togs y gãag-soabã pĩnda, sẽn na yɩl n bãng a sã n tõe n deeg-y lame. Rẽ na n kɩtame tɩ neb wʋsg ra wa seg taab tigis-kãsengã ket tɩ beoog n dat ro-yɛng ye. D segd n gũusame tɩ roog fãa pʋgẽ, bɩ nebã ra wa yɩ wʋsg tɩ loog nug ye.
7, 8. a) Tigingã ned sã n dat sõngr sẽn na yɩl n paam ro-gãaga, wãn to la b tõe n sõng-a? b) Bõe la tõnd tõe n maan n sõng sull ning sẽn get ro-gãasã yellã, saam-biisã yĩnga?
7 Ro-gãasã yelle: Tigingã ned sã n dat sõngr sẽn na yɩl n paam ro-gãaga, tigingã tʋʋmd sullã segd n gesa a soabã sã n tara sor n na n pids Demande de logement sebrã. Nand tɩ b tool seb-kãngã sull ning sẽn get rasem a tãab tigis-kãsengã ro-gãas yellã, b segd n deng n gesa bũmb ning b sẽn wilg sebrã zugã, la b karem lɛtr ning b sẽn toolã.
8 D pʋʋsda neb nins sẽn sõng sull ning sẽn get ro-gãasã yell n sak n deeg saam-biis nins sẽn pids Demande de logement sebrã b zagsẽ rɩẽ tigis-kãsengã sasa wã bark wʋsgo. Y sã n maan woto rõandã me, d sũy na n yɩ noog wʋsgo. (Gal. 6:10) Y sã n dat n deeg saam-biis y zakẽ tigis-kãseng ning sẽn wata sasa, y tõe n tɩ togsa sull ning sẽn get ro-gãasã yellã. La kaoosg poore, y sã n wa mik tɩ y pa na n tõog n deeg sãambã, y segd n wilga sull ning sẽn get ro-gãasã yellã pĩnda.
9. a) Wãn to la d tõe n bao ro-gãag lotɛllẽ n bĩngi? b) Sagls bʋs n tõe n sõng tõnd tɩ d tall yʋ-noog lotɛllã rãmb taoore? (Ges-y zĩ-gũbrã pʋgẽ.)
9 D sẽn tõe n bao ro-gãag lotɛllẽ n bĩng to-to: Sã n mikame tɩ b na n bao ro-gãas zĩig ning yãmb sẽn dat n kẽng tigis-kãsengã n bĩngi, b na n deng n tabla lotɛll dãmb nins y sẽn tõe n tɩ bao ro-gãas n bĩngã adɛrs rãmbã pĩnd-pĩnd y tigingã tablo zugu. Nand tɩ y bao ro-gãag lotɛllẽ n bĩngi, bɩ y tũ sagls nins b sẽn kõ zĩ-gũbrã pʋgẽ wã.
10. Bõe la d tõe n maan sẽn na yɩl tɩ d fãa paam lotɛllẽ ro-gãag ligd sẽn zemse?
10 D gũus n gesame tɩ saam-biis kẽer mi n dat n yãka lotɛll ning b sẽn datã b toore. La d sã n bao ro-gãag lotɛll a to sẽn pa be lotɛll dãmb nins b sẽn wilgã sʋka, bɩ n sak n yao ligd sẽn yɩɩd b sẽn wilg-yã, na n yɩɩ toog tɩ sull ning sẽn get ro-gãasã yellã tõog n yẽs ne lotɛllã taoor dãmbã, tɩ b sik ro-gãasã ligd saam-biisã yĩnga. Y pa segd n deeg ro-gãag n bĩng n yaool n miẽ tɩ y pa na n wa tõog n kẽ, bɩ n bas tɩ tigis-kãsengã ta n sa tɩ y tiig n yeel tɩ y pa le rate, sẽn na yɩl n bao a to ye. D sã n tũ sagls kãensã, na n kɩtame tɩ ned fãa, paam lotɛllẽ ro-gãag ligd sẽn zemse.—1 Kor. 10:24.
11. Bõe n segd n pak tõnd n yɩɩda, d sã n wa segend d mens tigis-kãsengã yĩnga, la d sã n kẽng be?
11 Tall-y manesem-sõngo: D sã n wilg tɩ d tara vʋʋsem sõngã biis d manesmã pʋgẽ, la d gũusd d no-goamã ne lotɛllã taoor dãmb la ne neb a taabã sẽn be tẽngã pʋgẽ wã, d kɩtdame t’a Zeova nin-buiidã yʋʋr ket n noome, la d pa na n koms neb a taabã tẽeb ye. (1 Kor. 10:31; 2 Kor. 6:3, 4) Bɩ y modg n kẽng yʋʋmd 2009 rasem a tãab tigis-kãsengã, la y tall manesem sẽn waoogd Wẽnnaam!—1 Pɩɛ. 2:12.
[Zĩ-gũbri, seb-neng a 5]
Tigisgã lɛɛr dãmba
Lamusa (Tẽn-tẽns tigis-kãsemsã bala)
13:20 - 16:55
Arzũma ne sibrã
9:20 - 16:55
Hatã
9:20 - 16:00
[Zĩ-gũbri, seb-neng a 6]
Sagls y sẽn segd n tũ: Lotɛllẽ
◼ Kell-y n bao-y ro-gãagã lotɛll dãmb nins b sẽn wilg-yã sʋka.
◼ Ra sak-y n yao tɩ yɩɩg ligd ning b sẽn wilg tɩ be sebrã pʋgẽ wa ye.
◼ B segd n bĩnga ro-gãag fãa ned ning sẽn na n wa kẽ wã yʋʋr yĩnga.
◼ Sẽn na yɩl n tõog n tũ sagls nins b sẽn kõ bugum wakat yĩngã, gũus-y tɩ nebã sõor da wa yɩɩg b sẽn wilg tɩ ro-gãag fãa tõe n deegame wã ye.
◼ Kell-y n tall-y ro-gãag ning b sẽn bĩng-yã.—Mat. 5:37.
◼ Ra bool-y lotɛll dãmb nins b sẽn pa wilg tɩ y tõe n boolame wã n na n bãng b sã n sika b ro-gãasã ligd tigis-kãsengã yĩng ye.
◼ Y sã n boola lotɛll dãmb nins b sẽn wilg-yã FÃA n pa paam ro-gãaga, pa rẽ bɩ y sã n tara yell ne lotɛlle, togs-y y tigingã sekertɛɛre. A na n boola saam-biis nins sẽn get tigis-kãsengã ro-gãas yellã n wilg-ba.
◼ Y sã n wa pa le rat ro-gãag b sẽn bĩng-yã, y segd n togsa pĩnda.
◼ Tigis-kãsengã sã n wa ket tɩ semen a yiibu, bɩ y bool lotɛllẽ wã n bãng b sã n sɩd bĩng-y-la ro-gãaga.
Sagls a taaba
◼ Sẽn na yɩl n wilg tɩ y waoogda y gãag-soabã, bool-y-yã pĩnd n togse.
◼ Bao-y n bãng-y a sã n sɩd tõe n deeg-y lame. Ra tags-y tɩ yaa tɩlae t’a reeg yãmb ye.
◼ A sã n zoe n tara neb a sẽn na deege, bɩ ro-sõng sã n ka be, bɩ y bao ro-gãag zĩig a to.
◼ Y gãag-soabã sã n sak tɩ y wa, bɩ y kɩt t’a bãng wakat la raar ning y sẽn na n wa wã takɩ.
◼ Y waoongã wakat pa segd n yɩ wakat sẽn na n tiis y gãag-soabã ye.
◼ Y sã n wa mik tɩ y pa na n tõog n kẽng bɩ y togs y gãag-soabã tao-tao.