Yʋʋmd 2008 rasem a tãab tigis-kãsengã
1. a) Bõe yĩng tɩ d segd n modg n tũ sagls nins a Poll sẽn kõ hebre kiris-nebã? (Karm-y Hebre rãmb 10:24, 25.) b) Wakat bʋg la b yãk tɩ d na n maan wa a Poll sẽn sagl-dã?
1 Tʋm-tʋmd a Poll sagla hebre kiris-nebã tɩ b tigimd taab la b sagend taaba, sẽn yɩɩda, b sẽn ne tɩ daarã kolgdame wã yĩnga. (Heb. 10:24, 25) Rũndã-rũndã, bʋʋm wʋsg n be n wilgd tɩ “daar” ning yell a Poll sẽn gomã sɩd ta n saame. Rẽ n so tɩ d baood wakat la sasa tõnd ne d saam-biisã fãa sẽn na n tigimd taab n paamd sagls sẽn yit Wẽnnaam nengẽ, sẽn na n sõng-d yaoolem wakat kãensã yɛla sẽn lebgd toogã pʋgẽ. (2 Tɩm. 3:1) Yʋʋmd 2008 rasem a tãab tigis-kãsengã sasa, d na n tigma taab n le paam saglse.
2. a) Bõe yĩng tɩ d segd n kẽng rasem a tãabã fãa? b) Bõe la d tõe n maan n segl d mense?
2 Kẽng-y rasem a tãabã fãa: D sagend-y lame tɩ y modg n kẽng rasem a tãabã fãa. Rasem a tãab tigis-kãsengã sẽn watã sasa, d sã n pa “bas taab tigingu,” d na n paama sagls wʋsg sẽn yit Wẽnnaam nengẽ n kelge. (Heb. 10:25) Yaa masã la d segd n segl d mense. Y tõe n togsa y tʋʋmã taoor soab pĩnd-pĩnda, t’a ges a sẽn na n maan to-to tɩ y paam sor n kẽnge. Tigis-kãsengã wakat tɩ y kambã sã n ket n kẽnda lekolle, y tõe n tɩ wilga b karem-saam dãmbã tɩ b tara tigis-kãseng n segd n kẽnge. Kɩt-y tɩ b bãng tɩ tigis-kãsengã tara yõod wʋsg yãmb tũudmã pʋgẽ. Y tõe n kɩsa sɩd t’a Zeova na n ning-y-la barka, y sẽn lʋɩɩsd a Rĩungã taoor y vɩɩmã pʋgẽ wã.—Mat. 6:33.
3. Wãn to la d tõe n wilg tɩ y tagsda neb a taabã yelle?
3 Sõng-y neb a taabã tɩ b kẽnge: A Poll le yeela a saam-biisã tɩ b “tẽeg taab yelle.” (Heb. 10:24) Saam-biis n be y sebrã zãmsg sullẽ wã n dat sõngr sẽn na yɩl n kẽng tigis-kãsengã bɩ? Y tõe n sõnga neb nins yãmb sẽn zãmsd Biiblã tɩ b tũ-y n tɩ kelg baa yaa daar a yembr bɩ? Y tõe n wilga y neb nins sẽn pa a Zeova Kaset rãmbã tɩ y tara tigis-kãsengã, la y yeel-b tɩ b wa tɩ y tũ taab n kẽnge. Y sã n maan woto, y tõe n paama bark y sẽn da pa tẽed tɩ y na n paamame.
4. D maanda wãn n bãng b sẽn na n maan rasem a tãab tigis-kãsengã day nins la zĩis ninsã?
4 Y sẽn tõe n paam kibay tigs-kãsengã wɛɛngẽ to-to: Yʋʋmd fãa, neb wʋsg ket n boonda Betɛllẽ wã n sokd wakat ning la zĩis nins tigis-kãsemsã sẽn na n zĩndã. La nin-kãensã mi n yaa saam-biis sẽn zoe n paam kibay rẽ zugu. Nand tɩ y bool Betɛllẽ wã, d sagend-y lame tɩ y reng n ges yʋʋmd 2008 tʋʋlg kiuug pipi daar Gũusg Gasgã pʋgẽ. Sẽn paase, d rengd n gʋlsa lɛta n tool tigimsã, n wilg tigis-kãseng ning bãmb tigingã sẽn segd n kẽngã, sẽn na n yɩ ray ninsã, la zĩig ningã me. Y sã n wa paam lɛt-kãngã, y segd n karm-a-la tʋʋmdã tigsg ning sẽn na n pʋglã n wilg tigingã nebã. Rẽ poore, bɩ y tabl-a tigingã tablo zug hal tɩ tigis-kãsengã wa looge.
5. Sã n mikame tɩ y na n kẽnga tigis-kãsengã tẽng a to pʋgẽ, tɩ y rat ro-gãag bɩ kibay a taab rẽ wɛɛngẽ, bõe la y segd n maane?
5 Sã n mikame tɩ y na n kẽnga tigis-kãsengã tẽng a to pʋgẽ, tɩ y rat ro-gãag bɩ kibay a taaba, y tõe n gʋlsa neb nins sẽn get tigis-kãsen-kãng yellã. Y tigingã sekertɛɛr tõe n bao n bãnga adɛrs rãmbã ne saam-biig sẽn be sull ning sẽn get tigis-kãseng ning yãmb tigingã sẽn segd n kẽngã pʋgẽ. Sẽn na yɩl tɩ b tõog n leok-yã, tẽeg-y n gʋls y yʋʋr la y tigingã adɛrs ãnvelop vɩʋʋg zug n sui y lɛtrã pʋgẽ n toole. Sã n mik tɩ pa tigis-kãseng a ye bal la b na n maan tẽng-kãng pʋgẽ, bɩ y wilg y lɛtrã pʋgẽ daar ning la tigis-kãseng ning yãmb sẽn dat n kẽngã takɩ. Wala makre: (Mbanga B, 26-28, décembre 2008)
6. Demande de logement sebrã pidsg wɛɛngẽ, bõe ne bõe la tigingã tʋʋmd yel-gɛtb sullã pa segd n yĩmi?
6 Ro-gãasã yelle: Tigingã ned sã n dat sõngr sẽn na yɩl n paam ro-gãaga, tigingã tʋʋmd yel-gɛtb sullã segd n gesa a soabã sã n tara sor n pidsd Demande de logement sebrã. Nand tɩ y tool seb-kãngã sull ning sẽn get rasem a tãab tigis-kãsengã ro-gãas yellã, y segd n deng n gesa bũmb ning b sẽn wilg sebrã zugã, la y karem lɛtr ning b sẽn toolã.
7. Bõe la d segd n maan sẽn na yɩl n tũ sagls nins b sẽn kõ ro-gãasã baoob wɛɛngẽ wã? (Ges-y zĩ-gũbrã pʋgẽ.)
7 Y sẽn tõe n bao ro-gãag lotɛllẽ n bĩng to-to: Sã n mikame tɩ b na n bao ro-gãas zĩig ning yãmb sẽn dat n kẽng tigis-kãsengã n bĩngi, b na n deng n tabla lotɛll dãmb nins y sẽn tõe n tɩ bao ro-gãas n bĩngã adɛrs rãmbã pĩnd-pĩnd y tigingã tablo zugu. Nand tɩ y bao lotɛllẽ ro-gãag n bĩngi, bɩ y tũ sagls nins b sẽn kõ zĩ-gũbrã pʋgẽ wã. Sẽn na yɩl n da wa yiis ligd wʋsg n bao ro-gãag lotɛll dãmb nins b sẽn wilga pʋsẽ, bɩ n da wa bool a to sẽn pa be b sẽn wilg yãmbã sʋka, d bõosd-y lame tɩ y maag y yĩng tɩ b wa wilg-y lotɛll dãmb nins sẽn yaa sõma wã.
8. a) D sã n wa kẽng tigis-kãsengã, bõe ne bõe la d tõe n maan n pẽg a Zeova? b) Manesem sõng ning d saam-biisã sẽn tallã kɩtame tɩ lotɛll taoor dãmb yeel tɩ bõe?
8 Tall-y manesem sõngo: D sẽn sakd a Zeova noor n sɩd tigimd taab n balemd-a wã nafd-d-la wʋsgo. La sẽn yɩɩd fãa, kɩtdame t’a yʋʋrã paamd pẽgre. (Ezai 48:17) Rasem a tãab tigis-kãsemsã sasa, nebã nee d manesem sõngã vẽenega. Rẽ kɩtame tɩ neb kẽer wilgd b sẽn tagsg bũmb ning tõnd zugu. (1 Tɩm. 5:25) Lotɛll a yembr sẽn be tẽng a ye b sẽn sɩng n maand tigis-kãsems yʋʋm sẽn zãr taoor soab yeela woto: “Neb wʋsg gomda yãmb a Zeova Kaset rãmbã yelle, la y tigis-kãsemsã sẽn nafd tõnd to-to wã me yelle. D nee vẽeneg tɩ y pɩɩsda zĩisã fãa tɩ yaa yɩlemde. Sẽn paase, d yãta yãmb sẽn pɩɩsd parkĩngã zĩisã fãa tɩ yaa yɩlemde. Y nebã sã n wa be d sʋk y tigis-kãsemsã sasa, d sũyã nooma wʋsgo. D saagdame tɩ yʋʋmd ning sẽn watã, y na n le waame.” Lotɛll a to me taoor soab sẽn wilg t’a paama zu-loees ne sul a taab neb la reemdɛɛmdb poore, a pẽga d saam-biisã wʋsgo, b sẽn wilg lotɛllẽ wã tɩ b sõngda taab la b yaa sũ-maasem dãmbã. A paasa woto: “D ra nongẽ lame tɩ neb nins d sẽn deegdã fãa yaa wa a Zeova Kaset rãmbã!” A Zeova sũur segd n yɩɩ noog wʋsg ne manesem ning saam-bi-kãensã sẽn tall tɩ kɩt tɩ b pẽgd-bã!
9. Bõe la b yeel Matɩe 4:4 tɩ wilgdẽ tɩ d segd n kelga sõssã fãa sõma?
9 A Zezi yeelame tɩ ninsaal ka vɩ ne rɩɩb bal ye, la yaa ne “goam nins sẽn yit Wẽnnaam noorẽ wã.” (Mat. 4:4) Ne “tʋm-tʋmd sẽn tũud sɩd la sẽn tar yamã” maasem, a Zeova kõt-d-la tẽeb “rɩɩb wakat sẽn zems” d tigis-kãsemsã sasa. (Mat. 24:45) Nin-kãensã tʋma wʋsg sẽn na yɩl n segl tẽeb rɩ-kãngã. Woto yĩnga, bɩ d modg n kẽng tigis-kãsengã, la d yok d tʋb n kelg sõssã fãa n wilg a Zeova d mi-beoogo, a sẽn nong tõnd la a get-d yellã yĩnga.
[Zĩ-gũbri, seb-neng a 4]
Tigisgã lɛɛr dãmba
Arzũma ne sibrã
9:20-16:55
Hatã
9:20-16:00
[Zĩ-gũbri, seb-neng a 5]
Sagls y sẽn segd n tũ:
◼ Ra tũnug-y ne ẽntɛrnetã n bao ro-gãag lotɛllẽ ye.
◼ Kell-y n bao-y ro-gãagã lotɛll dãmb nins b sẽn wilg-yã sʋka.
◼ Ra sak-y n yao tɩ yɩɩg ligd ning b sẽn wilg tɩ be sebrã pʋgẽ wa ye.
◼ B segd n bĩnga ro-gãag fãa ned ning sẽn na n wa kẽ wã yʋʋr yĩnga.
◼ Sẽn na yɩl n tõog n tũ sagls nins b sẽn kõ bugum wakat yĩngã, gũus-y tɩ nebã sõor da wa yɩɩg b sẽn wilg tɩ ro-gãag fãa tõe n deegame wã ye.
◼ Kell-y n tall-y ro-gãag ning b sẽn kõ-yã.—Mat. 5:37.
◼ Ra bool-y lotɛll dãmb nins b sẽn pa wilg tɩ y tõe n boolame wã n na n bãng b sã n sika b ro-gãasã ligd tigis-kãsengã yĩng ye.
◼ Y sã n boola lotɛll dãmb nins b sẽn wilg-yã FÃA n pa paam ro-gãaga, pa rẽ bɩ y sã n tara yell ne lotɛllã rãmba, togs-y y tigingã sekertɛɛre. A na n boola saam-biis nins sẽn get tigis-kãsengã ro-gãas yellã n wilg-ba.
◼ Y sã n wa pa le rat ro-gãag b sẽn bĩng-yã, y segd n togsa pĩnda. Tẽeg-y n deeg-y nimero sẽn wilgd tɩ y toeema yam.
D sẽn tõe n maan to-to n paam ro-gãag lotɛllẽ n bĩngi:
1. Tũnug-y ne lotɛll dãmbã telefõn nimero b sẽn tool tigimsã n bool-b b tʋʋmã wakate.
2. Wilg-y lotɛllã rãmb tɩ yaa a Zeova Kaset rãmbã tigis-kãsengã la y wata.
3. Wilg-y raar ning y sẽn na n wa kẽ ro-gãagã pʋgã, la raar ning y sẽn na n yi wã.
4. Ro-gãag sã n kae, bɩ y lebg n bool lotɛll a to b sẽn wilg yãmbã.
5. Kɩt-y tɩ b bĩng-y ro-gãag la y reeg nimero sẽn wilgd tɩ sɩd yaa yãmb n dɩk roogã.
6. Tũnug-y ne kart de kredi bɩ sɛk rãmb bal n yao y ro-gãagã ligd n bĩng rasem piig pʋgẽ. Ra yao-y ne ligd vẽeneg ye. Y sã n yao y ligdã ne sɛk bɩ y gʋls nimero ning sẽn wilgd tɩ y yaoome wã a zugu.