“Tũ-y Kiristã!” A Zeova Kaset rãmbã 2007 rasem a 3 tigis-kãsengã
1, 2. a) Bõe yĩng t’a Moiiz sagl Israɛll nebã tɩ b tigimd taaba? b) Segl-bʋs la d segd n maan masã?
1 A Moiiz ra wilga Israɛll nebã ne b sãambã tɩ b fãa tigimd taab yʋʋm a yopoe fãa tɩ b karem Tõodã n wilg-ba. Bõe yĩnga? Yaa sẽn na yɩl “tɩ b wʋm, la b zãmse.” (Tõo. 31:10-12) A Zeova yãame tɩ tara yõod t’a kɩt t’a nin-buiidã tigimd taab wʋsg n kelgdẽ. Ka la bilfu, a Zeova nin-buiidã na n ye tigma taab b rasem a taab tigis-kãsengã yĩngã. A gom-zugã na n yɩɩ: “Tũ-y Kiristã! ”
2 Yãmb sɩnga y meng seglg bɩ? Sẽn na yɩl n paam sẽkã n kẽng tigis-kãsengã, y segd n bõosa y tʋʋmã taoor soab sor bɩ? Rẽ yĩnga y tõe n sõnga y Biibl karen-biisã bɩ y zak neb sẽn pa a Zeova Kaset rãmb tɩ b tũ-y n kẽng tigis-kãsengã bɩ? Neb a taab n be yãmb tigingã pʋgẽ n dat sõngr sẽn na yɩl n kẽng bɩ? Yãmb baood n na n kẽnga tigis-kãsengã zĩig a to sẽn pa y tigingã rẽnd bɩ? Yãmb na n data ro-gãag lotɛllẽ, obɛrzẽ, bɩ zĩis a taab bɩ? Kibay nins sẽn pʋgdã na n sõnga yãmb tɩ y tõog n segl y mense.
3. a) Wãn to la Ezai 25:6 pidsd rũndã-rũndã? b) Tigis-kãsengã pipi daare, bõe la b gũus n ges tɩ saam-biisã pa maande, la bõe la ned kam fãa segd n maane?
3 Kẽng-y rasem a tãabã fãa: A Zeova kõta a nin-buiidã tẽeb rɩɩb wʋsgo. (Ezai 25:6) Tõnd sẽn paamd zãmsg ning yʋʋmd-yʋʋmd tigis-kãsemsã sasa wã naaga rẽnda. B gũus n gesame tɩ pipi daarã nebã pa wat wʋsg n ta rasem a taabã ye. Maan-y y sẽn tõe fãa n kẽng tigis-kãsengã rasem a tãabã fãa a Zeova siglgã sẽn seglg tɩ na n tall yamleoogã! Yãmb sã n segd n kosa sor y tʋʋmã zĩigẽ, bɩ y pʋʋs rẽ yĩngã. Rẽ poore, y sã n wa bãng tigis-kãsengã daare, bɩ y tall raood la y kẽng tao-tao n tɩ bõos y tʋʋmã taoor soab sore. (1 Tes. 2:2; Neh. 2:4, 5) Y sã n wilg y tʋʋmã taoor soab tɩ tigis-kãsengã tara yõod wʋsg yãmb Wẽnnaamã baleng pʋgẽ, tõe n kɩtame t’a sak n kõ-y sore. Y sã n togs pĩnda, tõe n kɩtame t’a tõog n maan toeeng ning a sẽn segd n maan tɩ y paam sore.
4. Wãn to la d tõe n segl d zakã neb nins sẽn pa a Zeova Kaset rãmbã la d Biibl karen-biisã tɩ b kẽng tigis-kãsengã?
4 D sẽn tõe n segl d zakã rãmb la d Biibl karen-biisã to-to: D sã n paam tɩ d Biibl karen-biisã tũ-d n kẽng tigis-kãsengã, la b yã d saam-biisã sẽn tigim taab tɩ b sũy noomẽ wã, yaa vẽeneg tɩ d sũy na n yɩɩ noog hal wʋsgo. (Yɩɩl 22:26) Togs-y-b tigis-kãsengã raar pĩnd tɩ b tõog n bao sẽkã. Wilg-y-b bũmb nins sẽn kɩt tɩ yãmb meng nong n kẽngd tigis-kãsemsã. Y tõe n wilga y karen-biisã video sẽn wilgd tigis-kãseng sẽn loog sẽn yɩ to-to, sẽn na yɩl tɩ b bãng b sẽn tõe n yã bũmb nins tigis-kãsengẽ wã. Sẽn yɩɩd fãa y tõe n wilg-b-la Unis grâce à l’enseignement divin video wã. Wilg-y y zakã neb nins sẽn pa a Zeova Kaset rãmbã y sẽn dat n maan bũmb ningã. Tõe tɩ b sak n tũ n tɩ ges darmã, wall b yãk raar a ye n tɩ kelg sõssã fãa.
5, 6. a) Bõe la d tõe n maan tɩ wilg tɩ d tara manesem ning sẽn be 1 Tɩmote 6:18 pʋgẽ wã? b) Bõe la b maan n na n sõng neb nins sẽn na n dat ro-gãasã?
5 D sõng d saam-biisã la d saam-bi-pogsã: Tʋm-tʋmd a Poll sagla neb nins sẽn tar tõog n tõe n sõng neb a taabã tɩ b “maan neer tɩ tʋʋm sõma yɩ bãmb arzegse, la b yɩ kõatb sẽn kõt ne sũ-noogo.” (1 Tɩm. 6:17, 18) D sã n sõng sẽn kʋʋlbã, koms-rãmbã, so-pakdbã la roagdb nins sẽn wubd kamb b yembrã, n paas tigingã neb a taab sẽn dat sõngr sẽn na yɩl n kẽng tigis-kãsengã, d wilgdame tɩ d tara yam ning a Poll sẽn sagl tɩ d tallã. Baa ne sẽn yaa nin-kãensã roagdb nins sẽn be sɩdã pʋgẽ wã n segd n yɩ pipi n sõng-bã, kãsem dãmbã la neb a taab me segd n gũusame n ges saam-biig sã n data sõngr woto, n tõog n sɩd sõng-a.—Gal. 6:10; 1 Tɩm. 5:4.
6 Saam-biis kẽer tõe n paama ro-gãas b toore. La neb wʋsg sẽn be tigingã pʋgẽ na n data sõngr sẽn na yɩl n paam ro-gãase. Bãmb rãmb segd n tɩ yãa tigingã tʋʋmd sull n kos demande de logement n gʋls-a n kõ-ba, tɩ b tool seb-kãng tigis-kãsengã sull ning sẽn get ro-gãasã yellã. Tigis-kãsengã ro-gãag yel-gɛtb fãa na n pĩnd n kõo tigimsã ro-gãasã kosg sɛb la adɛrse, sẽn na yɩl tɩ b bãng b sẽn na n tool seb-kãens zĩig ninga, la tɩ ta tao-tao. B pa segd n tool demand rãmbã Betɛllẽ wã ye. B segd n toola sẽn get-b ro-gãasã yellã.
7. a) Kiba-bʋs la ro-gãas yel-gɛtbã na n taas tigimsã? b) Kiba-bʋs la neb nins sẽn baood ro-gãas lotɛll wall obɛrz dãmb pʋsẽ wã tõe n paam nana-nana?
7 La sã n zemsame la sakdẽ, sẽn get-b ro-gãasã yellã na n toola tigimsã lotɛll rãmbã la obɛrz rãmbã sẽn be wã kibay ne b adɛrs rãmb tɩ b tabl kiba-kãens tigimsã tablo rãmb zutu. Kibay nins b sẽn na n toolã pʋgẽ, b na n wilga rot buud toor-toor sẽn be, rotã ligdi, la zĩis a taaba, n paas neb sõor sẽn tõe n zĩnd ro-gãag fãa pʋgẽ. Kiba-kãensã tõe n nafa neb nins sẽn tar b mens ligd n baood lotɛllẽ wall oberzẽ n na n zĩndã. Wala raasenkamã, tigis-kãsengã sull ning sẽn get-a ro-gãasã yellã tõe n paama ro-sõms ligd sẽn pa toogo, la sẽn pa zãr ne tigis-kãsengã zĩiga.
8. Bõe yĩng tɩ d pa segd n kẽng tigis-kãseng a to tɩ sã n pa tɩlae?
8 D sã n na n kẽnga tigis-kãseng a to: Sẽn na yɩl tɩ zaoosã, sɛbã, rotã la bũmb a taab fãa seke, b sagend-y lame tɩ y modg n kẽng tigis-kãseng ning yãmb tigingã sẽn segd n kẽngã. So-toak bɩ yɛl a taab tõe n wa kɩtame tɩ yɩ tɩlae tɩ y kẽng tigis-kãseng a to.
9. Sã n wa yaa tɩlae tɩ d kẽng tigis kãseng a to, sagl-bʋs la d segd n tũ?
9 Yʋʋmd 2007 tʋʋlg kiuug pipi raar Gũusg Gasgã pʋgẽ, b wilga zĩis nins fãa b sẽn na n maan tigis-kãsengã ne farendã. Sã n mikame tɩ y na n kẽnga tigis-kãseng a to, tɩ y rat roog bɩ kibay a taab tigis-kãseng-kãng wɛɛngẽ, y tõe n gʋlsa neb nins sẽn get-b tigis-kãsen-kãng yellã. Y tigingã sekertɛɛr tõe n bao n bãnga adɛrs rãmbã ne saam-biig sẽn be sull ning sẽn get tigis-kãseng ning yãmb tigingã sẽn segd n kẽngã pʋgẽ. Sẽn na yɩl tɩ b tõog n leok-yã, gʋls-y y yʋʋr la y tigingã adɛrs ãnvelop vɩʋʋg zug n paas y lɛtrã n toole. Sã n mik tɩ pa tigis-kãseng a ye bal la b na n maan tẽng-kãng pʋgẽ, bɩ y wilg y lɛtrã pʋgẽ daar ninga la tigis-kãseng ning y sẽn dat n kẽngã. (Wala makre: Douala B, Novembre 23-25, 2007).
10, 11. a) D sã n dat n bao lotɛllẽ ro-gãag n bĩngi, d segd n tũu sagl bʋse? (Ges-y zĩ-gũbrã.) b) Ro-bʋs me la b tõe n sõng-d tɩ d paame?
10 D sẽn tõe n bao lotɛllẽ ro-gãag n bĩng to-to: Sã n mik tɩ yãmb tẽngẽ wã b na n baoa lotɛll dãmb n bĩngi, b na n tabla b adɛrs rãmbã tigimsã tablo rãmb zutu pĩnd-pĩnda. Tũ-y sagls nins sẽn be zĩ-gũbrã pʋgẽ wã, gom-zug ning sẽn yetẽ tɩ “D sẽn tõe n maan to-to n paam ro-gãag lotɛllẽ n bĩngi.” Y sã n bool lotɛll dãmbã fãa b sẽn wilg-y-yã n pa paam ro-gãaga, bɩ y sã n paam yell ne lotɛllã rãmba, wilg-y y tigingã sekertɛɛre. Yẽ n na n bool saam-biis nins sẽn get-b rotã yellã. Ra bool-y Betɛllã ye.
11 Saam-biis zags nins b sẽn paamã, bɩ zĩis a taabã b sẽn paamã fãa segd n zemsa ne noy nins tigis-kãsengã sull ning sẽn get ro-gãasã yell sẽn kõ wã.
12, 13. a) Segl-bʋs la b maan tõnd yĩng nand tɩ d ta tigis-kãsengã zĩigẽ? b) Wãn to la d tõe n wilg d mi-beoog ne tʋʋm nins fãa b sẽn tʋm tõnd yĩngã. (Karm-y Hebre dãmb 13:17.)
12 D sak n tũ saglsã: D sã n wa ta tigis-kãsengã zĩigẽ, d tõe n yãame tɩ tʋʋm wʋsg la b tʋm sẽn na yɩl n segl tõnd waoongã. Saam-biis sẽn nong-d n beend-do, n pʋɩt-d tigis-kãsengã na-kẽndr sɛba, la b wilgd-d d sẽn tõe n tɩ zĩnd zĩig ningã. Saam-biis ne saam-bi-pogs me pɩɩsame la b maneg ɛstaraadã tɩ yaa neere. Tʋʋm a taab me la b tʋm-yã, wala lotɛll rãmb pʋsẽ ro-gãas baoobo, sõssã seglgo, la tʋʋm a taaba.
13 Tigis-kãseng fãa, neb wʋsg n tʋmd kiis wʋsg pʋgẽ sẽn na yɩl n sõng tɩ b maan bũmb nins fãa b sẽn segd n maan tigis-kãsengã yĩnga. La nin-kãensã zagsã rãmb me maana modgr wʋsgo, b sẽn sak tɩ b rɩkd b sẽkã n tʋmd n sõngdẽ wã. D wilg d mi-beoog ne b sẽn maan bũmb nins d yĩngã! D sã n sak n tũ sagls nins sẽn be sõs-kãngã pʋgẽ wã la sagls a taab d sẽn na n paam nand tɩ tigis-kãsengã ta wã, d wilgdame tɩ d tara mi-beoog ne bũmb nins fãa b sẽn maan d yĩngã. (Heb. 13:17) D fãa sã n sak n tũ saglsã, kɩtdame tɩ b tõe n maan bũmba fãa “tɩ zems tɩ bʋrg ra zĩnd ye.”—1 Kor. 14:40.
14. a) Wãn to la a Zezi kõ mak-sõng neb a taabã yell gesg wɛɛngẽ? b) Ãnd dãmb n segd n dɩk a mak-sõngã, la wãn to?
14 B rata neb sẽn na n sõng n tʋme: A Zezi sika a meng n sõng neb nins sẽn da rat sõngrã, tɩ yaa mak-sõng n kõ-do. (Luk 9:12-17; Zã 13:5, 14-16) Neb nins sẽn sakd ne yamleoog n tʋmd tigis-kãsemsẽ wã rɩkda a Zezi togs-n-taare. Sẽn na yɩl tɩ tigis-kãsengã sul toɛy-toɛyã fãa paam neb tɩ seke, b na n data saam-biis sẽn na n sõng n tʋme. Sẽn yɩɩd fãa b rata kãsem dãmb sẽn na n sak tʋʋm ne yamleoogo. B sẽn sakd n tʋmdẽ wã yaa mak-sõng n kõ tigingã neb fãa.—1 Pɩɛ. 5:2, 3.
15. Wãn to la a Zeova Kaset rãmb kẽer sẽn zĩnd lotɛll dãmb pʋsẽ manesem kɩt t’a Zeova yʋʋrã paam pẽgre?
15 Neb a taabã sẽn yet bũmb ninsi: Lotɛll taoor soab a ye yeela woto: “Tõnd nonga yãmb n yɩɩd neb a taabã. Yãmb manesmã yaa sõma n yɩɩd neb a taabã. Pagb nins sẽn tʋmd ka wã pẽgda yãmbã. B wilgame tɩ yãmb manesmã yaa sõma ne-ba, la tɩ y kõt-b-la kado rãmb b tʋʋmã yĩngã. Nebã fãa rat n tʋma wɩkɛn ning yãmb sẽn be ka wã sasa!” Lotɛll a to me taoor soab ye yeela woto: “Yaa a Zeova Kaset rãmbã la d tõe n tʋm ne nana-nana n yɩɩda.” Tõe tɩ yãmb manesmã sẽn yɩ sõma wã me kɩtame tɩ nebã gom woto. Tags-y n ges a Zeova sũur sẽn na n yɩ noog to-to, a sẽn na n ne tõnd manesmã sẽn kɩtd tɩ nebã waoogd a yʋʋrã!—1 Pɩɛ. 2:12.
16. a) Bõe yĩng t’a Zeova Kaset rãmbã sẽn tigimd taab rũnd-rũndã wã tar yõod wʋsgo? b) Ned kam fãa tõe n maana bõe masã?
16 D sẽn ne “tɩ daarã kolgdame wã yĩnga,” d sẽn tigimd taab woto wã yõod yɩɩda bũmb fãa. (Heb. 10:25) Tigis-kãsemsã sasa, tʋm-tʋmd sẽn tũud sɩd la sẽn tar yamã kõt-d-la kibay sẽn sõngd-d tɩ d sakd goam nins fãa a Zeova sẽn dat tɩ d tũ wã. (Tõo. 31:12) Bɩ d sɩng d mens seglg masã, sẽn na yɩl n tõog n kẽng “Tũ-y Kiristã” tigis-kãsengã rasem a tãabã fãa n tɩ paam zãmsg sẽn yit Wẽnnaam nengẽ la tũud-n-taar sẽn noogd sũuri.
[Zĩ-gũbri, seb-neng a 3]
Tigisgã lɛɛr dãmba
Arzũmã ne sibrã
9:20 - 17:05.
Hatã
9:20 - 16:10
[Zĩ-gũbri, seb-neng a 4]
D sẽn tõe n maan to-to n paam ro-gãag lotɛllẽ n bĩngi:
1. Tũnug-y ne lotɛll dãmbã telefõn nimero nins b sẽn tool tigimsã n bool lotɛll dãmbẽ tʋʋm wakate.
2. Wilg-y lotɛllã rãmb tɩ yaa a Zeova Kaset rãmbã tigis-kãseng la y wata.
3. Wilg-y raar ning y sẽn na n wa kẽ ro-gãagã pʋgã la raar ning y sẽn na n yi wã.
4. Ro-gãag sã n kae bɩ y lebg n bool lotɛll a to, b sẽn wilg tigingã.
5. Ra sak-y n yao tɩ yɩɩg ligd ning b sẽn wilg tɩ be b sebrã pʋgẽ wã ye.
6. Kɩt-y tɩ b bĩng-y ro-gãag la y reeg nimero sẽn wilgd tɩ sɩd yaa yãmb ro-gãaga.
Sagls y sẽn segd n tũ:
◼ Sã n tõe fãa, bɩ y kell n bao y ro-gãagã lotɛll dãmb nins b sẽn wilg-yã sʋka.
◼ Ra bool-y lotɛll dãmb nins b sẽn pa wilg tɩ y tõe n boolame wã n dat n bãng b sã n tara ro-gãas b sẽn maneg ligdã tɩ zems tõnd tigis-kãsengã yĩng ye. Yaa lotɛll dãmb nins b sẽn wilg-yã BAL la y segd n boole.
◼ B segd n bĩnga ro-gãag fãa ned ning sẽn sɩd na n wa kẽ wã yʋʋr yĩngã.
◼ Bool-y nimero nins b sẽn wilg tɩ y tõe n bool n baoa ro-gãag n bĩngã.
◼ Ra tũnug-y ne ẽntɛrnetã n bao ro-gãag lotɛllẽ tɩ sã n pa b wilgame tɩ y tõe n maaname ye.
◼ Sẽn na yɩl n tõog n tũ sagls nins b sẽn kõ bugum yõkr wakat yĩngã, gũus-y tɩ kãsembã sõor da wa yɩɩg b sẽn wilg tɩ ro-gãag fãa segd n dɩkame wã ye.
◼ Ra yeel-y y tigingã sekertɛɛr tɩ ro-gãag ye pa ket tɩ sã n pa y boola lotɛll dãmb nins FÃA b sẽn wilg-yã n gese.
◼ Tall-y ro-gãag ning y sẽn na n paam pipi wã.—Mat. 5:37.
◼ Y sã n ye pa rat ro-gãag y sẽn kos tɩ b bĩng-yã, y segd n togsa pĩnda. Reeg-y nimero sẽn wilgd tɩ y ye pa rat tɩ b bĩng-y ro-gãagã ye.