D bao soy n moon nebã
1 Kiris-nebã tiging pʋgẽ, saam-biisã yɛl pa taab ye. La d fãa rata ne d sũy fãa n pẽg a Zeova. (Yɩɩl 79:13) La laafɩ kaalem bɩ yɛl a taab sã n kɩt tɩ d pa tõe n moon koɛɛgã, wãn to la d tõe n bao soy sẽn na yɩl n tõog n moone?
2 D sẽn maand bũmb ninsã fãa pʋgẽ: A Zezi ra tũnugda ne sor buud fãa a sẽn paam n moond nebã. A moona a Matɩe a sẽn da wa pɩʋʋgd yõor yaood deegr zĩigẽ, a moona a Zaase a sẽn da wa n togd sore, la a moon Samari pagã a sẽn da wa n vʋʋsdẽ. (Mat. 9:9; Luk 19:1-5; Zã 4:6-10) D sẽn maand bũmb ninsã fãa pʋgẽ, tõnd me tõe n wẽnemda sõsg tɩ lebg koɛɛgã moonego. D sã n zãad Biible, seb-vãadã la seb-biyã, na n kɩtdame tɩ d rat n gomd d tẽebã yelle.—1 Pɩɛ. 3:15.
3 Bũmb n kɩt tɩ y pa tõe n kẽne, tɩ kɩt tɩ y pa tõe n moon zak-zak bɩ? Y tõe n modgame n moon y logtoɛɛmbã ne b tʋmd-n-taasã la neb a taab y sẽn segde. (Tʋʋ. 28:30, 31) Bũmb sã n nong n kɩtdẽ tɩ y pa tõe n yi y zakẽ, y tõe n tũnuga ne telefõn bɩ lɛta n kõt kasetã. Saam-bi-poak a ye gʋlsda a zakã neb nins sẽn pa a Zeova Kaset rãmbã wakat fãa. A lɛtã wã pʋsẽ, a ningda tagsa sẽn yit Biiblã pʋgẽ sẽn kengd raoodo, la kiba-nood a sẽn paamd koɛɛgã mooneg sasa.
4 Tʋʋmã zĩigẽ bɩ lekollẽ wã: D sẽn dat n pẽg a Zeova ne d sũy fãa wã yĩng na n kɩtame tɩ d bao soy n na n moon koɛɛgã d tʋʋmã zĩigẽ bɩ d lekollẽ wã. Yʋʋm a nii biig sẽn yaa koe-moond wilga a karen-doogã neb bũmb nins a sẽn bãng kiuugã zugu, a sẽn karem Réveillez-vous ! wã pʋgẽ. A karen-saambã sẽn bãng zĩig ning a sẽn paam kibarã tɛka, a sã n paam Gũusg Gasgã la Réveillez-vous ! wã fãa a reegdame. D tʋʋmã zĩigẽ, d sã n dɩgl Biiblã yetame sebrã zĩig ning nebã sẽn tõe n yã, tõe n waa ne sogsg tɩ d paam n moon koɛɛgã.
5 Yãmb zoe n nee soy a taab y sẽn tõe n tũnug n moon nebã bɩ? Baa d yɛlã sẽn yaa to-to fãa, d modg n “kõ Wẽnnaam maand daar fãa sẽn yaa pẽgre, sẽn dat n togs tɩ d kɩs kaset ne noor goama.”—Heb. 13:15.