D pẽg a Zeova daar fãa
1. Bõe la Wẽnnaam nin-buiidã tʋl n maane, la bõe yĩnga?
1 Rĩm a Davɩɩd wilgame t’a rat n ‘waooga a Zeova daar fãa, la wakat fãa.’ (Yɩɩl 145:2, 7, 21) Tõnd me tara bʋʋm wʋsg n na n pẽg a Zeova daar fãa.—Yɩɩl 37:10; 145:14, 18; 2 Pɩɛ. 3:13.
2. Wãn to la zak rãmb tõe n pẽg a Zeova daar fãa?
2 D pẽg a Zeova d zagsẽ: D sã n wa vaeesd daar verse wã, n zãmsd Biiblã ne d zakã rãmb bɩ n segend tigissã, d tara sɛb sẽn sõngd-d tɩ d tõe n tik Biiblã zug n sõs ne taab la d gomd Wẽnnaam yelle. Zags rãmb wʋsg rɩka segls sẽn na yɩl n naagd taab n dɩt baa yaa vʋʋgr daar fãa. B sã n naagd taab n dɩtẽ, kɩtdame tɩ b maagd b yĩns n sõsd ne taaba, tɩ sõngd-b tɩ b pẽgd a Zeova. Roagdbã sã n maand woto, na n sõng-b-la wʋsg tɩ b tõog n ‘wub kambã ne a Zeova saglg la a zãmsgo.’—Ef. 6:4; Tõo. 6:5-7.
3. D sã n wa be ne d saam-biisã, bõe la d tõe n maane?
3 D naag d saam-biisã n pẽg a Zeova: Koɛɛgã mooneg bɩ tigissã sasa, d tara zu-no-kãseng n na n naag d saam-biisã n pẽg a Zeova. (Yel. 15:30; Fil. 4:8; Heb. 13:15) Sẽn mik tɩ d fãa nonga a Zeova wã, d sã n wa sõsd ne taaba, d tõe n pẽgd-a lame n wilgd-a d mi-beoog a sõmblmã yĩnga.—Yɩɩl 106:1.
4. Sasa bʋs me la d tõe n pẽg a Zeova?
4 D sã n wa be ne neb sẽn pa d tẽed-n-taase: Baa d sã n pa tõe n yit n moond koɛɛgã daar fãa, d sã n wa be ne d tʋmd-n-taasã, d karen-bi-taasã, bɩ neb a taaba, d tõe n gomda ne-b a Zeova la a raabã yell koɛɛg-koɛɛga. D sã n maand woto, tõe n kɩtame tɩ pʋ-peelem dãmbã paam saagre. (Yɩɩl 27:14; 1 Pɩɛ. 3:15) Saam-bi-poak a ye n da rɩk sɩlg n togd sore. Sɩlgã pʋgẽ, a kõo ned a ye kasetã tɩ keng a raood wʋsgo. La woto kɩtame t’a wilg saam-bi-poakã a adɛrs la a telefõn nimero sẽn na yɩl tɩ b tõog n wa sõsd ne taaba. Yaa sɩd tɩ dũniyã tara sãang n dabd tɩ yɛlã me tar paasgo, la a Zeova nin-buiidã ket n ‘moonda fãagr koɛɛgã’ neb nins sẽn dat n kelgã. Woto kɩtdame tɩ neb kẽer paamd saagre, la sõngd-b tɩ b pẽgd a Zeova.—Ezai 52:7; Rom 15:11.
5. Bõe yĩng tɩ d rat n pẽg a Zeova, la rẽ tõe n woma bi-bʋse?
5 Ad a Zeova sũur sɩd nooma wʋsg a sẽn ne a nin-buiidã sẽn pẽgd-a daar fãa wã! A Zeova sẽn naan bũmb nins tɩ d neẽ wã pẽgd-a lame. D me tõe n zẽka d koees daar fãa n pẽg-a d zagsẽ, tigissã sasa, la d sẽn wat n be ne neb sẽn pa d tẽed-n-taase.—Yɩɩl 19:2-5