A Zeova zemsa pẽgr wʋsgo
D na n maana Soaalã zaabr dɩɩb tẽegr tʋʋl-nif kiuugã rasem 16
1 D gẽegda ne yãgb n paasdẽ meng tɩ yʋʋmd 2003, tʋʋl-nif kiuugã rasem 16 ta. Baraar yʋngo, d na n naaga d tẽed-n-taas milyõ rãmb dũniyã gill zug n tẽeg a Zezi kũumã, n pẽg a Zeova yʋʋrã. A Zeova segda ne tõnd pẽgr wʋsgo, a sẽn kõ a Biriblã maoong tɩ yɩ rondã yĩnga. Yaa ne rẽ maasem la a na n ning ãdem-biis nins sẽn yaa sakdbã bark wʋsgo. Ne d sũur fãa, d naagda yɩɩl-gʋlsdã n yetẽ: ‘A Zeova yaa kãsenga, a zemsa pẽgr wʋsgo.’—Yɩɩl 145:3.
2 Tẽegrã wakat yaa wakat d sẽn segd n bʋgs Wẽnnaam sõmblmã zugu, la d sẽn segd n tall mi-beoog ne a Zeova a sẽn tʋm a “Biiga sẽn-ka-to dũniyã pʋgẽ tɩ tõnd paam vɩɩm bãmb maasem yĩnga.” (1 Zã 4:9, 10) D sã n sak n tẽeg Soaalã zaabr dɩɩbo, kɩtdame tɩ d bãng d sũurẽ sõma t’a ‘Zeova yaa nimbãan-zoɛt la sũ-bʋgsem soaba, la a tara nonglem wʋsgo.’ (Yɩɩl 145:8) Sɩda, maoongã sẽn yɩ rondã ya a Zeova nonglem pukr ning sẽn yaa kãseng n tɩ yɩɩd ne ninsaalbã. (Zã 3:16) Tõnd sã n tags Wẽnnaam nonglmã la a Zezi sẽn vɩɩmd ne burkĩndã yelle, kɩtdame tɩ d pẽg a Zeova. Wakat sẽn-kõn-sa yĩnga, d na n pẽg-a lame, a sẽn wilg tõnd nonglem sẽn ka koak n kɩt tɩ d tõe n paam vɩɩm sẽn-kõn-sa wã yĩnga.—Yɩɩl 145:1, 2.
3 D sõng neb a taabã tɩ b pẽg a Zeova: Tõnd sẽn tar mi-beoog ne Wẽnnaam a kũun sẽn yaa kãseng n yɩɩdã sẽn yaa rondã yĩngã kɩtame tɩ d na n bool neb a taabã tɩ b wa naag-d n pẽg a Zeova. Wẽnnaam vẽnega yɩɩl-gʋlsdã t’a gʋls woto: “Neb na n tẽega yãmb sõmblma yell wʋsgo la b gom yãmb tɩrlma yelle.” (Yɩɩl 145:7) Rɩẽ yen-yen bala, dũniyã gill zugu, a Zeova Kaset rãmbã rɩka sẽn yɩɩd lɛɛr milyaar a ye n moon koe-noogã. B modgrã biis yɩɩ bõe? Semen fãa, b sã n pʋɩ tɩ zemse, sẽn yɩɩd neb 5 100 n deegd lisg n wilgdẽ tɩ b rɩka b mens n kõ a Zeova. Neb nins sẽn wa Tẽegrã rɩẽ sõor zãng ra yaa 15 597 746, tɩ bãmb sʋka neb milyõ a 9 nan ka sɩng n moond koe-noogã n pẽgd a Zeova ye. Woto wilgdame tɩ d ket n tõe n paama fɩɩg-kãsenga! D sẽn yaa Rĩungã koe-moondbã, d nanda zu-noog ning d sẽn tar n tõe n moon koe-noogã la d tees neb a taab a Zeova, a Biriblã, la a Rĩungã zĩigẽ wã.
4 Bõn-sõng a ye d sẽn tõe n maan n sõng neb a taabã tɩ b waoog a Zeova yaa d sẽn na n bool-b tɩ b wa naag-d n tẽeg Soaalã zaabr dɩɩbo. Yãmb zoe n gʋlsa y sẽn dat n bool b rãmbã fãa yʋya, n paas neb nins y sẽn segd n tɩ tẽeg Tẽegrã raar la a lɛɛrã bɩ? Yãmb zoe n tɩ kɩsa nin-kãensã fãa Tẽegrẽ wã boolg sebr bɩ? Y sã n nan pa maan dẽ, bɩ y modg n maan dẽ tao-tao wakatã sẽn ketã pʋgẽ. Sõng-y-b tɩ b bãng Tẽegrã võore. Tẽegrã zĩigẽ, bɩ y bao n pʋʋs sẽn wa-bã. Kɩt-y tɩ b bãng tɩ y sũur yaa noog ne b waoongã, n wilg-b neb a taabã, la y pẽg-b b sẽn wa wã yĩnga.
5 Nin-paalsã sã n wa Tẽegrã, rẽ tõe n kɩtame tɩ b tʋlg n bɩ tẽebã wɛɛngẽ n paase. Biibl zãmsd la yel-beed ra paam pĩnd tɩ ket n yɛɛsd-a wʋsgo, tɩ rẽ kɩt tɩ yaa toog wʋsg ne-a t’a zĩnd neb sʋka. Nin-kãng waa Tẽegrã. B sok-a-la a sẽn tagsd to-to ne tigisgã, t’a yeele: “Yʋʋn-kãngã sɩd yɩɩ yʋʋn-kãseng menga, la mam zĩnda be.” Wakat kãng tɛka, a sɩnga tigissã waoongo.
6 Tẽegrã poore: Bõe la b tõe n maan n sõng nin-kãensã sẽn yaa sɩdã ratbã tɩ b lebg a Zeova balemdba? Kãsem dãmbã na n bao n bãnga nin-paals nins sẽn wa Tẽegrã, n kos koe-moondb sẽn tar tõog tɩ b lebg n tɩ ges-b Tẽegrã poore, n sõs ne-b yɛl nins sẽn be yamleoogã b sẽn yã la b wʋmã zutu. Tõe tɩ bãmb kẽer tʋlg n paam Biibl zãmsgo. Sẽn mik tɩ tigissã waoong wakat fãa wã tõe n paasa b Biiblã bãngrã, koe-moondbã segd n bool-b lame tɩ b wa tigingã tigiss semen fãa.
7 Segls me la b maand sẽn na yɩl n sõng neb nins sẽn moond loand-loandã, la sẽn ka le moond-bã sẽn na yɩl tɩ b wat tigissã n ka vaandẽ ye. Kãsem dãmbã sã n kos-y tɩ y sõng ned sẽn ka le moond sẽn na yɩl t’a lebg n sɩng moonego, bɩ y sake. Nonglem wilgr woto ne d saam-biisã zemsa ne tʋm-tʋmd a Poll sagl-kãngã: “Tõnd sã n paam weere, bɩ d maan neba fãa yel-sõmde, la neb nins sẽn yaa tõnd ba-biis a Zezi tẽeba yĩngã n yɩɩda.”—Gal. 6:10.
8 Bɩ d fãa modg sõma n zĩnd Tẽegrẽ wã tʋʋl-nif kiuug rasem 16. D ka na n tʋlg n vaal Tẽegrã, sẽn yaa wakat sẽn yaa kãseng d sẽn tõe n tũnug ne n pẽg a Zeova wã ye. N-ye, masã la wakat sẽn-kõn-sa yĩnga, bɩ d pẽg a Zeova a tʋʋm kãsemsã yĩnga!—Yɩɩl 145:21.