D sõng nebã tɩ b rɩ rondã nafa
D na n maana a Zezi kũumã Tẽegr tʋʋl-nif kiuugã rasem 12
1. Ne manesem a ye bʋg la Wẽnnaam nin-buiidã wilgd b mi-beoog rondã yĩnga?
1 “Bark Wẽnnaam, bãmb kũunã noor sẽn ka tõe n togsa yĩnga.” (2 Kor. 9:15) Gom-kãensã wilgda mi-beoog ning d sẽn tar ne Wẽnnaam, a sẽn tũnug ne a Biribl a Zezi Kirist kũumã sẽn yɩ rondã n wilg a nin-buiidã a sõmblem la a nonglmã. Sẽn zems ne verse kãngã goamã, d na n tigma taab tʋʋl-nif kiuugã rasem 12 wã raar n maan a Zezi kũumã Tẽegr n wilg Wẽnnaam d mi-beoog vẽenega.
2. Ãnd rãmb n naagd a Zeova balemdbã n maand Teegrã, la bõe la b segd n maan n tõog n dɩ rondã nafa?
2 Sẽn na maan neb milyõ piig n naagd a Zeova balemdbã yʋʋmd fãa n maand Tẽegrã. Nin-kãensã sẽn maand woto wã, b me wilgda b mi-beoog a Zezi Kirist maoongã yĩnga. La sẽn na yɩl tɩ b rɩ rondã nafa, b segd n talla tẽeb ne-a. (Zã 3:16, 36) Wãn-wãn la tõe n sõng-b tɩ b tall tẽeb-kãnga? Tʋʋlg la tʋʋl-nif kiisã d tõe n daool-b lame tɩ b zãms Biiblã la b watẽ tigingã semen fãa tigissã. D tũ sagls nins sẽn pʋgdã.
3. D sã n wa tɩ na n bool ned t’a wa Teegrã, wãn-to la d tõe n kell n sɩng Biiblã zãmsg ne a soaba?
3 Biiblã zãmsg ne nebã: Y sã n bool ned t’a wa Tẽegrẽ wã, bɩ y sɩng Biiblã zãmsg ne a soab Biiblã yetame wã sebrã zugu. Lak-y seb-neng 206-8 gom-zug ning sẽn yet tɩ “Soaalã kũumã Tẽegr yaa bũmb sẽn waoogd Wẽnnaamã,” n wilg-a Tẽegrã sẽn maand to-to. Baa y yasa yĩngri, y tõe n vaeesa sõs-kãng fãa ne a soabã pipi raarã wall y kengr a yiib-n-soabã. Y sã n sa ne sõs-kãnga, a soabã tõe n dat n sõssa sak a 5 soabã gom-zug sẽn yet tɩ “Rondã yaa Wẽnnaam kũun sẽn ka to” wã zugu. Rẽ poore, a sã n sak n na n kẽng taoor ne zãmsgã bɩ y lebg n tɩ sɩng ne sebrã pipi sags a naasã.
4. Tʋʋlg la tʋʋl-nif kiisã pʋgẽ, ne ãnd rãmb la d tõe n sɩng Biiblã zãmsgo?
4 Ne ãnd rãmb la d tõe n sɩng Biiblã zãmsg ne manesem kãngã? Tõe tɩ d tʋʋm-n-taase, d karen-bi-taas wall d yags kẽer na n sak n sõsa ne-d boto. Saam-biis nins sẽn yaa-b rapã tõe n tɩ sõsa ne tigingã saam-bi-pogs nins sɩdb sẽn pa tẽedbã. Ra yĩm-y y roagdb nins sẽn pa Kaset rãmbã me ye. Sẽn paase, d leb n segd n modgame n bool tigingã neb nins sẽn bas tigissã waoongã. (Luk 15:3-7) Bɩ d mao n sõng nin-kãensã fãa tɩ b rɩ rondã nafa.
5. Wãn-wãn la d tõe n sõng Biiblã karen-biis la neb nins sẽn tʋll n bãng koɛɛgã n paasã tɩ b watẽ tigingã semen fãa tigissi?
5 Tigingã tigissi: Ne Biiblã karen-biis la neb a taab sẽn wat Teegrã, yaa pipi b sẽn wat tigisga. Woto yĩnga, wãn-wãn la d tõe n sõng-b tɩ b rɩ tigingã tigiss a taabã nafa? Yʋʋmd 2005 tʋʋl-nif kiuug Rĩungã Tʋʋmd seb-neng a 8 sagend-d-la woto: “Togs-y-b zãmã sõsg ning sẽn na n zĩnd semen sẽn watã gom-zugu. Wilg-y bũmb ning yell b sẽn na n gom Gũusg Gasgã la sebrã zãmsgẽ wã. Wilg-y-b Wẽnnaam Tʋʋmdã Lekoll la Tʋʋmdã Tigisg sẽn maand to-to. Y sã n tar sõsg Wẽnnaam Tʋʋmdã Lekollẽ, y tõe n kɩtame tɩ y karen-biisã reng n kelg y sõsgã. Gom-y ne-b tags-kãsems b sẽn zoe n wɛgs tigissẽ wã yelle. Wilg-y-b tõnd tigiss toɛy-toɛyã foto rãmb sẽn be d sɛbã pʋsẽ wã. Pipi daarã y sẽn sɩng Biiblã zãmsg ne-bã bɩ y bool-b tɩ b wa tigissẽ wã.”
6. Manesem a yiib bʋs la d tõe n tũnug n sõng neb nins sẽn dat n bãng koɛɛgã tɩ b rɩ rondã yõodo?
6 Naoor wʋsgo, neb nins sẽn dat ne b sũy fãa n bãng koɛɛgã sã n paam tɩ b zãmsd Biiblã ne-b wakat fãa la b pa vaand tigingã tigiss waoongo, b bɩta tao-tao tẽebã pʋgẽ. Woto yĩng bɩ d raool nebã tɩ b rɩ tẽeb segl-kãensã la rondã sẽn yaa Wẽnnaam kũun sẽn ka to wã yõodo.