“Bɩ y maan bõn-kãngã”—Tẽegrã na n yɩɩ tʋʋl-nif rasem a 5
1. Bõe n kɩt t’a Zezi kũumã tẽegr tar yõod wʋsgo?
1 “Bɩ y maan bõn-kãngã n tẽegd mam yelle.” (Luk 22:19) A Zezi yeela woto, n na n wilg a karen-biisã tɩ b segd n tẽegda a kũumã sẽn yɩ maoongã. A kũumã yõod sẽn ta zĩig ningã kɩtame tɩ kiris-nebã nifẽ, daar kae sẽn tar yõod n ta a tẽegrã daar ye. Rõndã, na n yɩɩ tʋʋl-nif kiuugã rasem a 5. La ra-kãng sã n wa kolgdẽ, bõe la d tõe n maan n wilg a Zeova d mi-beoogo?—Kol. 3:15.
2. Wãn-to la d tõe n segl d mens tẽegrã yĩnga?
2 Segl-y y mense: Naoor wʋsgo, d sã n dat n maan bũmb sẽn tar yõodo, d segenda d mense. Sẽn na yɩl n segl d mense, d zak pʋgẽ zaabr Biibl zãmsgã sasa, d tõe n naaga taab n karem bũmb ning sẽn maan a Zezi kũumã daar sẽn wa n kolgã, la d bʋgs rẽ zugu. (Ɛs. 7:10) Tõnd kalãndirie wã, la D vaees Gʋlsg Sõamyã daar fãa wã pʋgẽ, b gʋlsa vɛrse kẽer sẽn gomd rẽ yelle. Yʋʋmd 2011 wao-fugdg kiuug pipi daar Gũusg Gasgã neng 23-24 pʋgẽ, b sõdga vɛrse rãmb wʋsg sẽn gomd rẽ yell me, la b wilg Nin-kãseng sẽn ka to wã sebr pʋgẽ sak rãmb d sẽn tõe n tɩ karme.
3. Bõe la d tõe n maan koe-moonegã pʋgẽ, n wilg d mi-beoogo?
3 Moon-y koɛɛgã: D tõe n wilga d mi-beoog me, d sã n rɩk sẽk wʋsg n moon koɛɛgã. (Luk 6:45) Tʋʋlg kiuugã rasem 17 wã tɛka, d na n pʋɩɩ sɛb dũniyã gill zug n bool nebã tɩ b wa tẽegrã. Tags-y n ges-y y sã n pa tõe n moon koɛɛgã n paas sasa kãnga, bɩ y sã n pa tõe n dɩk sõngr so-pakrã menga. Sõs-y rẽ yell y nindaar zak pʋgẽ zaabr Biibl zãmsgã sasa.
4. D sã n naag n maan a Zezi kũumã tẽegre, nafa bʋs la d paamda?
4 Ad d sẽn naagd n maand a Zezi kũumã tẽegr yʋʋmd fãa wã sɩd nafda tõndo! Kɩtdame tɩ d sũ-noogã la d sẽn nong a Zeova to-to wã paasdẽ, bala d tagsda a sẽn sak n tʋm a bi-yendã t’a wa ki tõnd yĩngã yelle. (Zã 3:16; 1 Zã 4:9, 10) Kɩtdame tɩ d pa rat n le vɩ d mens yĩng ye. (2 Kor. 5:14, 15) Kɩtdame me tɩ d rat n moon koɛɛgã wʋsgo, n pẽg a Zeova. (Yɩɩl 102:20-22) A Zeova Kaset rãmbã gũuda tʋʋl-nif kiuug rasem a 5 wã sẽn yaa a Zezi kũumã tẽegr daarã ne yãgbo, bala baraare, neb wʋsg na n wa naaga tõndo, tɩ d gom a Zezi kũumã yell tɩ b wʋme.—1 Kor. 11:26.