D segl d meng ne sũ-noog tẽegrã yĩnga

1. Tẽegrã na n yɩɩ sasa d sẽn na n maan bõe?

¹ Tẽegrã sẽn na n yɩ talaat daar tʋʋlg rasem 26 na n yɩɩ sasa d sẽn na n noog d sũur ne Wẽnnaam sẽn maan bũmb ning tõnd fãagr yĩngã. (Ezai 61:10) D sã n zoe n maand sũ-noogo, na n sõng-d lame tɩ d segl d mens sõma nand tɩ tẽegrã raar ta. Wãn to?

2. Bõe n tog n kɩt tɩ d segend tẽegrã?

² Tẽegrã seglgo: Soaala zaabr dɩɩbã tẽegr pa toog ye, la a tara yõod wʋsgo. Baa ne rẽ, d tog n segla pĩnda, n da wa yĩm yɛl kẽer ye. (Yel. 21:5) D tog n yãka wakatã la zĩig ning d sẽn na n maan-a wã. Segdame me tɩ d bao bur la dɩvẽ sẽn zemse. Zĩig ning d sẽn na n maan tẽegrã segd n yɩɩ yɩlemde. Saam-biig ning sẽn na n wɛgs tẽegrã sõsgã tog n segla a meng sõma. B segdame me n wilg sẽn na n pɩʋʋg-b ne burã la divẽ wã, la sẽn na n deeg-b sãambã bũmb ning b sẽn segd n maana vẽenega. Sãmbg kae tɩ y zoe n maana bõn-kãens fãa la bala. Yaa d sẽn dat n wilg d mi-beoog ne rondã sẽn kõt fãagrã n kɩt tɩ d segend tẽegrã.—1 Pɩɛ. 1:8, 9.

3. Wãn to la d tõe n segl d mens d sũyã pʋsẽ Soaalã zaabr dɩɩbã yĩnga?

³ D segl d meng d sũyã pʋsẽ: Yɩta sõma me tɩ d segl d mens d sũyã pʋsẽ, n tõog n bãng tẽegrã sẽn nafd tõnd to-to. (Ɛs. 7:10, MN) Rẽ wɛɛngẽ, d tõe n yãka wakat takɩ n karemd Biiblã zĩis nins d sẽn tog n karem tẽegrã yĩnga, la d bʋgs bũmb nins a Zezi sẽn maan a kũumã daar sẽn wa n kolgdẽ wã zugu. D sã n tagsd a sẽn sak n ki d yĩngã yelle, na n sõng-d lame tɩ d rɩk a togs-n-taare.—Gal. 2:20.

4. A Zezi kũumã waa ne nafa buud toor-toore. Bʋg n noom yãmb n yɩɩda?

⁴ A Zezi sẽn sak n ki wã, a wilgame t’a teenda a Zeova naamã. A kũumã kɩtame tɩ d tõe n paam d meng ne yel-wẽnã la ne kũumã. (1 Zã 2:2) Kɩtame tɩ d tar zood sẽn yaa sõma ne a Zeova, la d tõe n wa paam vɩɩm sẽn kõn sa. (Kol. 1:21, 22) Leb n kengda d raoodo, tɩ d wilgd d vɩɩmã pʋgẽ tɩ d rɩka d mens n kõ a Zeova, la tɩ d yaa Kiristã karen-biisi. (Mat. 16:24) Y sã n segl y meng la y wa tẽegrã, na n paasa y sũ-noogã.