“Bɩ y maan bõn-kãnga n tẽegd mam yelle”
D na n maana a Zezi kũumã Tẽegr tʋʋl-nif kiuugã rasem a 2
1. Bõe yĩng tɩ yʋʋmd 2007, tʋʋl-nif kiuugã rasem a 2 daarã tar yõod wʋsg ne tõndo?
1 Tʋʋl-nif kiuugã rasem a 2 daare, neb milyõ rãmb n na n tigim taab dũniyã gill zug n tẽeg a Zezi kũumã yelle. A Zezi kiime n na n wilg t’a bee a saasẽ Ba wã naam sẽn ka to wã poorẽ, la a wilg t’a Sʋɩtãan sẽn yeel tɩ ninsaalbã balemda Wẽnnaam n baood b mens nafr balã yaa ziri fasɩ. (Zoob 2:1-5) D sã n maan a Zezi kũumã Tẽegre, na n kɩtame tɩ d ye tẽeg t’a Zezi kõo a vɩɩmã sẽn zems zãngã n “yao neb wʋsg yĩnga.” (Mat. 20:28) Rẽ n so t’a Zezi yeel a karen-biisã woto: “Bɩ y maan bõn-kãnga n tẽegd mam yelle.” (Luk 22:19) D sẽn tar mi-beoog ne kũun kãngã sẽn wilgd tɩ Wẽnnaam nonglmã pa tar mak-n-taagã, d na n segla d mens a Zezi kũumã tẽegr yĩnga.—Zã 3:16.
2. Wãn to la d tõe n segl d mens sõma Tẽegrã yĩnga?
2 D reng n segl d mens sõma: Tõnd sã n bao n bãng bũmb nins sẽn maan a Zezi kũumã sẽn wa n ket rasem a wãnã, d na n tõog n segla d mens sõmã Tẽegrã yĩnga. Sẽn na yɩl n sõng-d tɩ d segl d mense, b maana Biibl kareng na-kẽndr tɩ be D vaees Gʋlsg Sõamyã daar fãa yʋʋmd 2007 wã pʋgẽ, la Calandrié 2007 pʋgẽ. D sã n tũ na-kẽndrã, d na n bãnga bũmb nins sẽn maan sẽn deng a Zezi kũumã n tɩ tãag a kũumã. Biiblã pʋgẽ, b sẽn sõt rayã to-to wã zemsa ne Zʋɩf rãmbã sẽn sõt rayã to-to wã. Bãmb nengẽ, raar fãa sɩngda ne wĩndgã kõom n baas ne vẽk-n-beoogã wĩndg kõom. Biiblã kareng na-kẽndrã pʋgẽ, y na n yãa rẽ. D sã n lebg n karem kiba-kãensã Biiblã pʋgẽ, n pʋʋs Wẽnnaam la d bʋgs a sẽn nong tõnd wʋsgã zugu, d na n tõog n dɩɩ Tẽegrã yõod wʋsgo.
3. Wãn to la d tõe n sõng nin-paalsã la saam-biis nins tẽeb sẽn maagã tɩ b rɩ Tẽegrã yõodo?
3 D bool neb a taabã tɩ b wa: Wao-fugdg kiuugã Rĩungã Tʋʋmd seb-paasdem ra wilgame tɩ tõnd sẽn na n bool nebã to-to tɩ b wa Tẽegrã rõandã wã pa na n wõneg yʋʋm a taabã ye. Yãmb segla y meng n na n wa bool nebã tɩ b wa Tẽegrã bɩ? Yãmb zoe n gʋlsa neb nins y sẽn dat n boolã yʋya, la y zoe n tɩ yã-b lame bɩ? Tẽegrã daare, bɩ y modg n ta pĩnd n tõog n deeg neb nins y sẽn boolã, la nin-paals a taabã. Yɩta sõma tɩ y zĩnd ne-ba, sẽn na yɩl tɩ b paam n tũ Biiblã la yɩɩllã sebr pʋgẽ ne yãmba. Kɩt-y tɩ tigingã neb a taabã me bãng-ba. Tẽegrã poore, bɩ y modg n leok sogs nins b sẽn na n sokã. Bool-y-b tɩ b wa kelg sõsg ning b sẽn na n kõ tʋʋl-nif kiuug rasem 15 wã daarã. Kãsem dãmbã segd n gesame tɩ saam-biis nins tẽeb sẽn maagã paam Tẽegrẽ wã boolg seb-vãado, la b bool-b tɩ b wa kelg sõsg ning b sẽn na n kõ tʋʋl-nif kiuug rasem 15 wã.
4. Tẽegrã poore, wãn to la d tõe n sõng nebã tɩ b bɩ tẽebã pʋgẽ?
4 D sõng nin-paalsã la neb nins tẽeb sẽn maagã: Koɛɛg-koɛɛg bala, saam-biig ning sẽn na n wɛgs Tẽegrã sõsgã na n togsame tɩ tõnd zãmsda Biiblã ne nebã zaalem, la a sagl nin-paalsã tɩ b kell n bao n bãng a Zeova n paase. Rẽ na n kɩtame tɩ y tõog n yeel neb nins y sẽn boolã tɩ y tõe n sõng-b lame tɩ b bãng a Zeova n paase. B sã n nan pa zãmsd Biiblã, bɩ y modg n lebg n tɩ ges-b Tẽegrã poor tao-tao, n wilg-b tõnd sẽn zãmsd Biiblã ne nebã to-to. Sẽn na yɩl tɩ b tõog n bɩ tẽebã wɛɛngẽ, b segdame me n wat tigissã. (Heb. 10:24, 25) Rẽ n so tɩ y segd n sagl-b tɩ b wat tigissã wakat fãa. Kãsem dãmbã segd n tɩ gesa kiris-neb nins tẽeb sẽn maage, la sẽn wa Tẽegrã, n sõng-b tɩ b tags Tẽegrã sõsg zug neer n paase. Woto tõe n sõng-b lame tɩ b lebg n wat tigissã la b moond koe-noogã.
5. Wãn to la Tẽegrã nafd tõndo?
5 Tẽegrã sõngd-d lame tɩ d bʋgs a Zeova ne a Zezi sẽn maan bũmb ning n kõ tõndã zug neer n paase. Bʋgsgã na n kɩtame tɩ d nong-b n paasdẽ, tɩ d yel-manesmã me lebgd sõma n paasdẽ. (2 Kor. 5:14, 15; 1 Zã 4:11) Masã tɛka, d segd n segla d mense, la d sõng neb nins sẽn dat n bãng n paasã me tɩ b segl b mens n wa naag-d n maan Tẽegrã, bala yaa sasa d sẽn na n moon ‘Zusoaba kũum.’—1 Kor. 11:26.