Yãmb segenda y meng tẽegrã yĩng bɩ?

Yʋʋmd 33 Nizã kiuug rasem 13 wã zaabre, a Zezi ra miime tɩ yaa a yaoolem zaabr a sẽn na n zĩnd ne a tʋm-tʋmdbã, bala rẽ poore, a bɛɛbã ra na n kʋ-a lame. A ra rat n naag-b lame n dɩ a yaoolem Paka, la a wilg-b bõn-paall b sẽn segd n yõdg n maandẽ: Yaa Soaalã zaabr dɩɩbã. Bõn-kãng sẽn tar yõod wʋsgã maaneg ra baooda seglgo. Rẽ n so t’a tʋm a Pɩɛɛr ne a Zã tɩ b reng taoor n tɩ segle. (Luk 22:7-13) Yʋʋmd kãng tɛka, nand tɩ tẽegrã ta, kiris-nebã segenda b mense. (Luk 22:19) Wãn-wãn la d tõe n segl tẽegrã sẽn na n yɩ tʋʋl-nif kiuugã rasem a 3 wã?

Kãsem-dãmbã sẽn segd n maane:

Kãsem-dãmbã tog n gesame tɩ b maneg Rĩungã roogo, wall b bao zĩig sẽn yaa sõma tẽegrã yĩnga. Zaoosã tog n seka nebã, tɩ vẽenemã yaa sõma, tɩ pemsem me beẽ. B tog n deng n manega zĩigã tɩ yaa yɩlemde.
B segd n deng n yãka saam-biig sẽn tõe n wɛgs tẽegrã sõsg sõma, la b yãk ned ning sẽn na n lʋɩ taoore, la saam-biis nins sẽn na n pʋʋs tɩ b yaool n pɩʋʋg ne burã la divẽ wã.
Tigims a yiib bɩ sẽn yɩɩd rẽ sã n na n maan tẽegrã zĩ-yɛnga, kãsem-dãmbã segd n deng n yãa taab n yãk tiging fãa sẽn na n sɩng lɛɛr ninga, la a nebã sẽn na n dɩgl b wiidi wã zĩig ninga.
B segd n yãka sẽn na n deeg-b nebã, la sẽn na n pɩʋʋg-b ne burã la divẽ wã, n wilg-b b sẽn segd n maane.
Kãsem-dãmbã segd n baoa bur la divẽ sẽn zemse, la b bao laas ne vɛɛr-dãmb la taabl sẽn yaa sõma, n paas peend sẽn na n pil taablã.

Koe-moondbã sẽn segd n maane:

Koe-moond fãa segd n modgame n naag n pʋɩ tẽegrã seb-vãoogã ne yẽesem.
Gʋls-y neb nins yãmb sẽn dat n boolã yʋya. Wala makre, yãmb sẽn zãmsd neb nins Biiblã, y karen-bi-taase, y roagdba, y tʋmd-n-taase, la neb a taaba.
Karm-y Biiblã vɛrse nins b sẽn yãk tẽegrã yĩngã, la y bʋgse.
Mao-y n ta tẽegrã zĩigẽ pĩnda, n paam n deeg sãambã.