Sagls kãsem dãmbã yĩng Tẽegrã wɛɛngẽ

Rõandã b na n maana Tẽegrã hatã, tʋʋl-nif kiuug rasem a 8. Kãsem dãmbã segd n maana yɛl nins sẽn pʋgdã:

◼ Y sã n wa yãkd tigisgã wakate, bɩ y kɩs sɩd tɩ b ka na n pɩʋʋg ne makdsã tɩ sã n ka wĩndgã lʋɩɩs poor ye.

◼ B segd n togsa neba fãa Tẽegrã maaneg zĩig la a wakat takɩ, sõs-kõtã sẽn naage.

◼ B segd n zoe n baoome la b segl bur la divẽ nins sẽn zemsã.—Ges-y yʋʋmd 1985, wao-fugdg kiuug rasem 15, Gũusg Gasgã (farende), seb-neng 17.

◼ B segd n baoo laase, vɛɛr dãmba, la taabl ne peen-lutg sẽn zemse, n tall-b pĩnd n wa Tẽegrã maaneg zĩigẽ la b segl-ba.

◼ B segd n denga pĩnd n pɩɩs la b yẽes Rĩungã Roog bɩ Tẽegrã maaneg zĩig sõma.

◼ B segd n dengame n yãk neb rɛɛgdbã la sẽn na n pɩʋʋg-b ne burã, n togs-b tʋʋm nins b sẽn segd n maanã, la b sẽn segd n maan-b to-to me.

◼ Sẽn zae-a soab sã n yaa koams bɩ a sã n ka tõe n wa, b segd n dɩka segls n tɩ kõ-a makdsã.

◼ Tigims wʋsg sã n tũnugd ne Rĩung Roog a yembre, b segd n zemsa taab sõma. Rẽ yaa sẽn na yɩl tɩ neba ra wa gũm taab n yãmb kõomã zĩisi, soaya noya, la bõn-zombdɩ wã gaarg zĩis ye.