D wilg a Zeova d mi-beoogo
Tẽegrã na n yɩɩ tʋʋl-nif rasem 17
1. Sok-bʋg la yɩɩl gʋlsdã sok-yã, tɩ tõnd me segd n sok d mens Tẽegrã sasa?
1 Yɩɩl gʋlsdã sẽn wa n dat n wilg a Zeova a mi-beoog a sẽn zoe a nimbãaneg la a sẽn fãag-a wã yĩngã, a soka woto: “Mam na n maana bõe n lebs Zusoabã bõn-neeb nins fãa bãmb sẽn maan n kõ maamã yĩnga?” (Yɩɩl 116:12) Rũndã-rũndã, Wẽnnaam nin-buiidã tara bʋʋm kãseng sẽn kɩt tɩ b segd n wilg-a b mi-beoogo. Yɩɩl gʋlsdã sẽn yeel woto wã yʋʋm wʋsg poore, a Zeova kõo ninsaalbã kũun sẽn pa tar mak-n-taaga: yaa rondã. Tʋʋl-nif kiuugã rasem 17 sẽn yaa a Zezi kũumã tẽegr daarã sẽn kolgdã, bʋʋm wʋsg n kɩt tɩ d segd n wilg a Zeova d mi-beoogo.—Kol. 3:15.
2. Rondã nafa kẽer la bʋse?
2 Rondã nafa: Rondã maasem yĩnga, tõnd tõe n paama d “yel-wẽnã sugri.” (Kol. 1:13, 14) Woto kɩtame tɩ d tõe n tũ a Zeova ne sũur-kaset sẽn yaa yɩlemde. (Heb. 9:13, 14) Leb n kɩtame tɩ d tõe n pʋʋsd a Zeova n gomd ne-a n pa yɛɛsdẽ ye. (Heb. 4:14-16) Neb nins sẽn tẽed rondã na n wa paama vɩɩm sẽn kõn sa!—Zã 3:16.
3. Wãn to la d tõe n wilg a Zeova d mi-beoogo, a sẽn kõ rondã?
3 D sẽn tõe n wilg d mi-beoog to-to: Bũmb a ye d sẽn tõe n maan n wilg d mi-beoog yaa d sẽn na n karemd vɛrse nins b sẽn yãk Tẽegrã yĩngã daar fãa, la d tagsd a zug sõma. Yʋʋmd 2011, wao-fugdg kiuug pipi daar Gũusg Gasgã ne farendã pʋgẽ, sõsg ning gom-zug sẽn yet tɩ “ Êtes-vous prêt pour le jour le plus important de l’année ? ” wã tõe n sõng-d-la rẽ wɛɛngẽ. D pʋʋsg pʋgẽ me d tõe n yeela a Zeova tɩ d sũur sɩd yaa noogo, a sẽn kõ rondã. (1 Tes. 5:17, 18) D sã n sak a Zezi noorã n wa a kũumã tẽegre, d wilgda a Zeova d mi-beoogo. (1 Kor. 11:24, 25) Sẽn paase, d tõe n dɩka a Zeova togs-n-taar nonglmã wɛɛngẽ, n bool neb wʋsg tɩ b wa naag tõndo.—Ezai 55:1-3.
4. Manesem bʋg la d segd n tall Tẽegrã wɛɛngẽ?
4 A Zeova Kaset rãmb nins sẽn yaa mi-beoog rãmbã pa get a Zezi kũumã tẽegr wa tigiss a taabã ye. B get-a-la wa tigisg ning sẽn yaa kãseng n yɩɩd tigiss nins fãa d sẽn maand yʋʋmdã pʋgẽ wã! Tẽegrã sẽn kolgdã, bɩ d modg n tall tagsg ning yɩɩl gʋlsdã sẽn tallã buudu. A yeela woto: “Mam sũuri, bɩ f kõ Zusoabã waoogre, n da yĩm bõn-neeb nins fãa bãmb sẽn maanã ye.”—Yɩɩl 103:2.