D tẽeg rondã yell n wilg d mi-beoogo
1, 2. Bõe yĩng tɩ d segd n tẽeg rondã yell n wilg d mi-beoogo?
1 Kiris-nebã sẽn tũud noor ning a Zezi sẽn kõ wã yĩnga, dũniyã gill zugu, b n na n tigma taab yʋʋmd 2008 sibrã daar tʋʋlg kiuug rasem 22, wĩndgã kõom poor n tẽeg a Zezi kũumã yelle. (Luk 22:19; 1 Kor. 11:23-26) Yaa sẽn na n wilg Wẽnnaam d mi-beoog ne bũmb ning a sẽn maan tõnd yĩng hal sẽn kaoos yʋʋm 1975 rõandã wã. B sẽn ka a Zezi ra-lukã zug t’a kell n sak Wẽnnaam n tãag a kũumã, a kɩtame t’a Ba wã yʋʋr paam pẽgre, la a wilg vẽeneg t’a Sʋɩtãan sẽn yeel bũmb ningã yaa ziri fasɩ.—Zoob 1:11; Yel. 27:11.
2 A Zezi zɩɩmã sẽn daagã kɩtame tɩ kaool paalgã pidsi, la kɩt tɩ ninsaalb sẽn pa zems zãng tõe n lebg Wẽnnaam kamba, n saagdẽ n na n tɩ rɩ naam ne Kiristã Wẽnnaam Rĩungã pʋgẽ saasẽ. (Zer. 31:31-34; Mark 14:24) Sẽn paase, wala a Zezi meng sẽn togs a Nikodɛmã, Wẽnnaam sẽn kõ a Biigã tɩ yɩ rondã wilgdame t’a sẽn nong tõnd to-to wã pa tar to ye.—Zã 3:16.
3. Neb nins sẽn na n wa Tẽegrã tõe n paama nafa bʋse?
3 D bool nebã: Yʋʋm-vẽkr kiuugã Rĩungã Tʋʋmd wilgame tɩ d segd n deng n gʋlsa neb nins d sẽn dat n boolã yʋy sẽn na yɩl n bool ned kam fãa. Yãmb zoe n sɩnga nin-kãens boolg bɩ? Yãmb manega y sẽkã sẽn na n yɩl n naag saam-biisã seb-vãadã pʋɩɩb sasa sẽn na n sɩng tʋʋlg kiuugã pipi daarã n bool nebã bɩ? Neb nins d sẽn bool tɩ b wa wã na n kelga sõsg sẽn tik Biiblã zug sẽn tõe n kɩt tɩ b tẽ a Zezi maoongã sẽn yaa rondã. La yaa ne rondã maasem la b na n paam vɩɩm sẽn kõn sa wã.—Rom 10:17.
4. Bõe yĩng tɩ d segd n kẽng Tẽegrã pĩnda?
4 D fãa segd n modg n waa Tẽegrã zĩigẽ pĩnda, sẽn na yɩl n deeg neb nins sẽn sak boollã n wa wã. Sẽn mik tɩ yaa neb wʋsg n nong n wat Tẽegrã, d segd n modg n gesa sãambã la neb nins sẽn wat tigissã daar-daarã yell sõma.
5. Wãn to la d tõe n segl d mens sõma Tẽegrã yĩnga?
5 D reng n segl d mens sõma: Tẽegrã yĩnga, b maana Biibl kareng na-kẽndr sẽn sɩngd tʋʋlg kiuugã rasem 17 tɩ be yʋʋmd 2008 D vaees Gʋlsg Sõamyã daar fãa sebrã la Calandrié 2008 pʋgẽ. Tõnd sã n bao n bãng bũmb nins sẽn maan a Zezi kũumã sẽn wa n ket rasem a wãnã, na n sõng-d lame tɩ d segl d mens sõmã Tẽegrã yĩnga. (Ɛs. 7:10) D sã n pʋʋsdẽ la d bʋgsd kiba-kãensã sẽn be Biiblã pʋgẽ wã zutu, na n kɩtame tɩ mi-beoog ning d sẽn tar ne a Zeova ne a Biigã b sẽn sak n kõ rondã n wilg tɩ b nong-d lame wã paase.—Yɩɩl 143:5.
6. D sã n modg n wilg d mi-beoog rondã yĩnga, wãn to la na n naf-do?
6 Tẽegrã sẽn tar kolgrã bɩ d modg n segl d mense, la d sõng neb a taab me tɩ b segl b mens n wa. D sã n lebg n tẽeg rondã yell n wilg d mi-beoogo, na n kɩtame tɩ d zoodã ne a Zeova la ne a Biigã paase. (2 Kor. 5:14, 15) Na n kɩtame me tɩ d nong nebã wa a Zeova ne a Zezi sẽn nong-b to-to wã.—1 Zã 4:11.