KIUUGÃ GOM-ZUGU: “BƖ F MOON WẼNNAAM KOƐƐGÃ, LA F NANG PÃNG WAKAT FÃA.”—2 TƖM. 4:2.
Tũnug-y ne segb y sẽn paam fãa n moond Rĩungã koɛɛga!
1. Yam bʋg la d tõe n dɩk a Davɩɩd kibarã pʋgẽ?
1 Rĩm a Davɩɩd ra pa basd tɩ bũmb nins a sẽn pa tõe n maanã koms a raood ye. Makre, a ra wa n dat n mee roog a Zeova yĩnga, la b sẽn wilg-a tɩ pa yẽ n na n me roogã, a pa koms raood ye. A segla bũmb toor-toor sẽn na yɩl t’a Salomo wa tõog n me roogã. (1 Rĩm 8:17-19; 1 Kib. 29:3-9) A Davɩɩd pa bas tɩ bũmb ning a sẽn pa tõe n maanã sãam a sũur tɩ loog ye. A tagsa a sẽn tõe n maanã yell n yɩɩda. Wãn to la d tõe n dɩk a Davɩɩd togs-n-taare, n bao segb n moon Rĩungã koɛɛgã?
2. Wãn to la d tõe n fees d menga?
2 Maan-y y sẽn tõe: Neb wʋsg remsa bũmb kẽer b vɩɩmã pʋgẽ, sẽn na yɩl n tõog n yɩ sõngr so-pakdba, bɩ wakat fãa so-pakdba. (Mat. 6:22) Yãmb me tõe n maana wa bãmb bɩ? Y sã n pʋʋs la y maag y yĩng n fees y yɛlã, tõe tɩ y na n yãame tɩ ‘kʋɩlen-kãseng pakame’ n kõ-y tɩ y tõe n moon koɛɛgã. Sã n wa yaa woto, bɩ y modg n moon koɛɛgã n paase.—1 Kor. 16:8, 9.
3. Y sã n pa tõe n yɩ so-pakda, segb bʋs la y tõe n tũnug n moon koɛɛgã?
3 La y sã n fees y meng n mik tɩ y pa tõe n yɩ so-pakda, bõe la y tõe n maane? Tags-y n ges-y bũmb a taab sã n bee y sẽn tõe n maane. Wala makre, y tʋʋmã zĩigẽ, y sã n wae n segd neb sẽn pa tũud a Zeova, bɩ y taas-b koɛɛgã. Y sã n ka laafɩ tɩ neb get yãmb yelle, bɩ y bao n moon-b koɛɛgã. Tẽeg-y tɩ b kõo noore, tɩ kʋʋlem bɩ bã-kɛgeng sã n kɩt tɩ ned pa le tõe n moon koɛɛgã sõma, a sã n moon baa yaa minit 15, a tõe n gʋlsa rẽ a rapoorã zugu. Kiuug fãa, y sã n wa gʋlsd y rapoorã, bɩ y ra yĩm wakat ning y sẽn moon segb y sẽn paam sasa, wall sɛb buud toor-toorã y sẽn kõ wã ye. Makre, seb-vãadã, tẽegrã booll seb-vãoogã, la tigis-kãsengã booll seb-vãoogã. Y sã n fãoog wakat kãens fãa taaba, tõe tɩ b sõorã sẽn na n yɩ to-to wã na n ling-y lame.
4. Bõe la y yãk yam n na n maane?
4 Baa d yɛlã sẽn yaa to-to, bɩ d tũnug ne segb nins d sẽn paamdã, n taasd nebã koe-noogã. D sã n maan woto, d sũur na n yɩɩ noogo, d sẽn mi tɩ d maanda d sẽn tõe fãa Rĩungã yĩngã.—Mark 14:8; Luk 21:2-4.