Ket-y n moond-y-yã!
1 Wẽnnaam ratame tɩ “neba fãa paam fãagre la b bãng sẽn yaa sɩda.” (1 Tɩm. 2:4) Yaa rẽ yĩng la a sẽn bobl tõnd koe-noogã mooneg tʋʋmdã. (Mat. 24:14) Tõnd sã n mi bũmb ning sẽn kɩt tɩ d segd n ket n moondẽ wã, raood komsg bɩ yell sẽn tõe n wa ne tiisg d sẽn seg ka na n kɩt tɩ d bas rẽ maaneg ye.
2 Bõe yĩng tɩ d na n ket n nangd pãnga? Dũniyã tara yel-tiisdim toɛ-toɛ sẽn tõe n kɩt tɩ nebã yĩmi, bɩ b pa kelg bũmb nins tõnd sẽn yet-bã sõma ye. Rẽ n so tɩ d segd n ket n tẽegd-b Wẽnnaam fãagr koɛɛgã. (Mat. 24:38, 39) Sẽn paase, neba yɛl sẽn yaa to-to vɩɩmã pʋgẽ wã tara toeengo. Baa dũniyã yɛl sẽn yaa to-to wã tõe n toeema zĩig pʋgẽ ne manesem sẽn yaa kãsenga. (1 Kor. 7:31, NW ) Beoogo, rasem a yopoe bɩ kiuug sẽn wata, zu-loees bɩ yɛl a taab tõe n paka neb nins tõnd sẽn moondã, tɩ kɩt tɩ b tags koe-noogã tõnd sẽn taas-bã zug neere. Yãmb ka tar mi-beoogo, Kaset soab ning sẽn taas yãmb sɩdã sẽn kell n nang pãngã sɩda?
3 Rɩk-y togs-n-taar ne Wẽnnaam ninbãan-zoeerã: Ne maag-m-menga, a Zeova kõo wakate, n yaool n na n kao bʋʋd nin-wẽnsã zutu. A tũnugda ne tõnd n kell n tall sũ-tɩrs rãmbã boolg tɩ b wa a nengẽ n paam fãagre. (2 Pɩɛ. 3:9) D na n tallẽ-la zɩɩm samde, d sã n ka taas Wẽnnaam ninbãan-zoeer koɛɛgã nebã, n keoog-b ne a Zeova bʋ-kaoorã pidsg b rãmb nins fãa sẽn ka basd b so-wẽnsã zutã. (Eze. 33:1-11) Baa sã n ka wakat fãa la b reegd tõnd koɛɛgã sõma, d ka segd n maan laas-laas sã n yaa ne modg wa d sẽn tõe tɛk n sõng pʋ-peelem dãmbã tɩ b bãng Wẽnnaam ninbãan-zoeerã sẽn yaa kãsengã ye.—Tʋʋ. 20:26, 27; Rom 12:11.
4 Sẽn na yɩl n wilg d nonglmã: Yaa Wẽnnaam a Zeova n tũnug ne a Zezi Kirist n kõ noor tɩ b moon koe-noogã tẽngã gill zugu. (Mat. 28:19, 20) Baa nebã sã n zãgsd kelgre, d tara sor n tõe n wilg d nonglem la d sakr ne Wẽnnaam, n ket n nangd pãng n maand sẽn yaa tɩrga.—1 Zã 5:3.
5 Bɩ d rɩk sard kãn-kãe n ket n moondẽ! Bɩ d ket n maand woto ne yẽesem tɩ ket n nan ya a Zeova “fãagr daare.”—2 Kor. 6:2.