Bõe yĩng tɩ d na n ket n moondẽ?
1 B sɩng n moondã Rĩungã yãmb babgẽ wã hal daar zãr bɩ? (Mat. 24:14) Sã n yaa woto y tõeeme n tagsdẽ tɩ y moona y tigingã mooneg zĩigẽ tɩ seke, tɩ y sã n moondẽ masã bɩ yaa wa neb wʋsg yam kae ne Rĩungã koɛɛg ye. Ne rẽ fãa, ges-y b sẽn yeel bũmb ning a Zezi karen-biis hakɩkã wɛɛngẽ Prophétie d’Isaïe II sebre, seb-neng 141 wã pʋgẽ: “Zĩis kẽere, tõe n wõnda b sẽn moon koe-noogã n pids bũmb ninsã ka zem baa fɩ, b sã n mak rẽ ne tʋʋmd ning la modgr ning b sẽn maanã. Baasgo, b ket n moondame.” La bõe yĩng tɩ d na n ket n moondẽ?
2 Tẽeg-y a Zeremi makrã: Tõnd segd n moona koɛɛgã wakat fãa, neba kelgd tɩ b pa kelgd me. A Zeremi moona zĩ-yɛng yʋʋm 40, baa sẽn yaa neb bilf bal n kelg-a tɩ neb wʋsg ra kɩɩsd a koɛɛgã. Bõe yĩng t’a Zeremi kell n tall pẽdgre? Bala a ra maanda tʋʋmd Wẽnnaam sẽn kõ-a noor t’a maane, la a ra mi bũmb ning sẽn na n wa beoog-daare, tɩ rẽ tus-a t’a gom ne raoodo.—Zer. 1:17; 20:9.
3 Yaa woto ne tõnd me. A Zezi “kõo tõnd noor tɩ d moon neba sʋka n kɩs kaseto tɩ yaa bãmb la Wẽnnaam yãk-yã tɩ b yɩ nin-vɩɩse la kũum bʋ-kaooda.” (Tʋʋ. 10:42) Koɛɛg ning tõnd sẽn taasdã yaa neb nins sẽn kelgd-a wã vɩɩm. B na n tika neba manesem sẽn yaa to-to ne koe-noogã zug n kao b bʋʋdo. Sẽn yaa woto wã, tõnd segdame n maan wala b sẽn kõ-d noor tɩ d maanã bal takɩ. Baa neba sã n zãgs tɩ b kõn kelg tõndo, d tõe n tũnuga ne koe-moonegã n wilg tɩ d nong-b-la wʋsgo, la tɩ d sakda a Zeova, n ket n pẽdgd n maand d sẽn tog n maan bũmb ningã. La ka sa ye.
4 Nafda tõnd mensã: Moonegã zĩigẽ, nebã kelgd tõnd tɩ b pa kelgd tõnd me, d sẽn maand Wẽnnaam daabã kɩtdame tɩ d yamã gãe bãane la kõt tõnd sũ-noogo, bũmb b sẽn ka tõe n paam ne manesem a to. (Yɩɩl 40:9) Tõnd vɩɩmã sɩd na n talla võore. Tõnd sã n moond koe-noogã n paasdẽ, d yamã la d sũyã tikda vɩɩmã Wẽnnaam dũni paalgã pʋgẽ wã sũ-noog la a saagr zug n yɩɩdã. D sã n tagsd Gʋlsg Sõamyã kãabs kãensã zutu, paasda tõnd tẽebã la d zems-n-taarã ne a Zeova wã pãnga.
5 Baa d sã n ka tõog n yã d moonegã tʋʋmd yõod zĩig pʋgẽ, d sã n bʋd sɩdã bil nina sũurẽ, a tõe n wa bula a Zeova sẽn dat wakat ninga. (Zã 6:44; 1 Kor. 3:6) Tõnd ned ba a yembr ka mi a Zeova nin-buiidã sẽn ket n na n sõng neb nins tɩ b wa zãms Rĩungã wɛɛngẽ wã sõor sẽn na n ta to-to tõnd tẽngẽ wã bɩ dũniyã gill zug ye.
6 D tog n tũu a Zezi sagl-kãngã ne yãgb masã n yɩɩd pĩnda: “Gũus-y neere. Bɩ y gũ, tɩ bõe, yãmb ka mi wakat ninga ra-kãng sẽn na n wa ye. Bũmb ninga mam sẽn yet yãmba, mam yeta neba fãa. Bɩ y gũ.” (Mark 13:33, 37) Dẽ bɩ d fãa ket n togsd Rĩungã koe-noog n ka basdẽ ye, n naagd n kɩtdẽ t’a Zeova yʋ-sõngã sẽn yaa kãsenga paam waoogr n paase, n noogd a sũuri.