Bũmb ning sẽn kɩt tɩ d lebgd n tʋgd n moond nebã
1. Tõnd koe-moonegã wɛɛngẽ, sok-bʋg la nebã mi n sokdẽ?
1 Zĩis wʋsgo, d mi n moona d moonegã zĩig n yɩlme. Baa ne zags rãmb sẽn mi n yet tõnd tɩ b pa rat n kelgã, d ket n kẽngda b zagsẽ wã n moond-ba. Bõe yĩng tɩ d ket n moond neb nins sẽn da pa sak n kelgd-dã?
2. Pipi bũmb ning sẽn kɩt tɩ d ket n moond koɛɛgã la bʋgo?
2 D nonga a Zeova la nebã: Pipi bũmb ning sẽn kɩt tɩ d modgd ne koɛɛgã moonegã yaa d sẽn nong a Zeova wã. Yaa bũmb nins sẽn be d sũyẽ wã n kɩtd tɩ d ket n gomd ne neb a taabã d Wẽnnaam sẽn yaa kãsengã yelle. (Luk 6:45) D sẽn nong a Zeova wã kɩtdame tɩ d sakd n tũud a noyã la d sõngd neb a taabã tɩ b maand wa tõndo. (Yel. 27:11; 1 Zã 5:3) D sẽn sakd n tõogd toog n moond koɛɛgã pa be ne nebã manesem sẽn yaa to-to ne tõnd ye. Baa ne b sẽn da namsd pipi kiris-nebã, b modgame n moon koɛɛgã n “ka bas ye.” (Tʋʋ. 5:42) Nebã sã n pa sak n kelgd-do, d pa basd tɩ rẽ koms d raood ye. D yalsda kãn-kãe n wilgdẽ tɩ d nonga a Zeova wʋsgo, la tɩ d teeg-a lame.
3. D sã n nong nebã, wãn to la rẽ na n sõng-d tɩ d ket n moondẽ?
3 Yaa d sẽn nong neb a taabã me la d sẽn modgd n moond koɛɛgã. (Luk 10:27) A Zeova pa rat tɩ ned baa a ye sãame ye. (2 Pɩɛ. 3:9) Baa zĩis nins d sẽn moon n yɩlmã pʋsẽ, d ket n tõe n yãa neb sẽn dat n maan a Zeova raabã. Wala makre, Guadelup tẽngã pʋgẽ, neb 56 sʋka, ned a yembr n yaa a Zeova Kaset soaba. Rɩẽ yɩɩ neb 214 n deeg lisgu. La sẽn kolg neb 20000 n zĩnd a Zezi kũumã Tẽegrẽ, sẽn dat n yet tɩ tẽng-kãng pʋgẽ, neb 22 sʋka, ned a 1 n zĩnd Tẽegrẽ wã.
4. Wãn to la moonegã zĩig toeemda?
4 D sẽn moond-b rãmbã toeemdame: Pa wakat fãa la d mikd neb nins d sẽn da moonã ye. Naoor wʋsg d yãta neb a taaba. D sã n lebg n kẽng nindaar n na n tɩ moon zags nins d sẽn da kẽ tɩ b pa kelg-dã pʋsẽ, tõe tɩ zagsã neb a taab sẽn zɩ n wʋm koɛɛgã sak n kelg-do. Tõeeme me tɩ d mik nin-paals tɩ b sak n kelge. Kamb sẽn da rat n kelg tɩ b roagdb yet tɩ b ra kelg tõe n lebga kãsemb n toeem zaka. Nin-kãensã tõe n dat n kelga Rĩungã koɛɛga.
5. Bõe n tõe n kɩt tɩ nebã wa sak n kelg koɛɛgã n yɩɩda?
5 Nebã me toeemdame. Tʋm-tʋmd a Poll ra “yaa ned sẽn paoogd Wẽnnaam, la sẽn namsd tẽedbã, la ned sẽn maand a taab pãnga.” (1 Tɩm. 1:13, Kãab-paalgã Koe-noogo) Wala a Polle, neb wʋsg sẽn tũud a Zeova rũndã-rũndã ra pa nong sɩdã ye. Neb kẽer meng ra kɩɩsda koe-noogã. Dũniyã yɛl sẽn tar toeengã yĩnga, neb kẽer sẽn yaa kɩɩsdb wall b pa rat n kelg koɛɛgã tõe n wa sak n kelgame. Yɛl sã n wa paam neb sãnda, b sakd n kelgame. Yel-kãens tõe n yɩɩ b zak pʋg ned kũum, b tʋʋm sãango, ligd kaalem bɩ laafɩ kaalem.
6. Bõe yĩng tɩ d segd n ket n moond koɛɛgã ne yẽesem?
6 Dũni kãngã tar n debda a saabẽ, tɩ koɛɛgã mooneg la nebã zãmsg lebg yãgb tʋʋmde. (Ezai 60:22) Woto yĩnga, d ket n moonda ne yẽesem la d modgd n talld manesem sẽn yaa sõma. Tõe tɩ ned ning d sẽn na n seg nindaarã na n sak n kelg-d lame. D segd n ket n taasda koɛɛgã! D sã n maand woto, ‘d na n fãaga d mens la neb nins sẽn kelgd tõndã.’—1 Tɩm. 4: 16.