B na n yɩɩ wãn n wʋm koɛɛgã?
1. Bõe n tõe n wa kɩt tɩ koɛɛgã mooneg yɩ toog ne tõndo, la bõe yĩng tɩ d ket n moondẽ?
1 A Zeova daarã sẽn wat tao-tao wã yĩnga, yaa tɩlae tɩ d sõng nebã tɩ b bãng Wẽnnaam, la bũmb ning a sẽn na n maan n kõ ãdem-biisã. (Zã 17:3; 2 Pɩɛ. 3:9, 10) La nebã sẽn pa rat n kelg koɛɛgã, bɩ b yaand tõndã kɩtame tɩ sasa ninga yaa toog tɩ d tõog n moone. (2 Pɩɛ. 3:3, 4) La baa ne rẽ fãa, d tẽedame tɩ neb n ket n be d moonegã zĩigẽ n na n sak n deeg koe-noogã b sã n wʋme. La b na n yɩɩ wãn n wʋm tɩ ned ka moone-ba?—Rom 10:14, 15.
2. Tʋm-tʋmd a Poll mak-sõngã zãmsda tõnd bõe?
2 B sã n wa namsd tõndo: Sẽn mik tɩ neb wʋsg n ket n na n pa wʋm Rĩungã koe-noogã yĩnga, d pa segd n bas moonegã ye. Erop soolmẽ wã, yɩɩ Filip tẽngã pʋgẽ la tʋm-tʋmd a Poll reng n moon koe-noogã. La b sẽn wa n dõd yẽ ne a Sɩlasã, b yõk-b lame n pãb la b ning-b bi-bees roogẽ. (Tʋʋ. 16:16-24) La baa ne rẽ, a Poll pa zoe rabeem n bas koɛɛgã mooneg ye. A sẽn wa n kẽng Tesalonikã, Wẽnnaam kenga a raoodo. (1 Tes. 2:2) Tʋm-tʋmd a Poll mak-sõngã wilgdame tɩ d pa segd n bas koɛɛgã mooneg ye.—Gal. 6:9.
3. Bõe n tõe n kɩt tɩ neb kẽer sẽn da pa rat n kelg koɛɛgã wa rat n sak n kelge?
3 Neb wʋsg sẽn da sɩng n pa rat n kelg koɛɛgã hal sẽn kaoos sakd n kelgdame masã. Tõe n yaa zu-loeesã, bãasã, b ned sẽn maan kaalem, bɩ b sẽn wʋmd tɩ b gomd tʋʋm-wẽns la sabaab rãmb yellã n kɩt tɩ b rat n kelge. (1 Kor. 7:31) Kẽer me roagdb ra pa rat n sak tɩ b kelge, la masã b lebga bɛd n dat n kelge. D sã n ket n moond koɛɛgã, d na n sõngã nin-kãensã tɩ b bãng a Zeova la b teeg-a tɩ nan ket n maasa.—Rom 10:13.
4. Bõe n kɩt tɩ d ket n moond koɛɛgã n ka basdẽ?
4 D ra bas moonegã ye: D sẽn nong Wẽnnaam la nebã yĩngã, kɩtame tɩ d ket n moond koɛɛgã la d maand karen-biis n ka basdẽ ye. Tʋm-tʋmdbã me ra maanda woto pipi kiris-nebã wakatẽ. (Tʋʋ. 5:42) Rũndã-rũndã, neb wʋsg n ‘wõosd la b yãbd bõn-wẽns nins sẽn maandã’ yĩnga. (Eze. 9:4) Nin-kãensã sã n wʋm koe-noogã, sɩd yaa yolsg tɛkẽ! Baa neb wʋsg sã n pa rat n kelg koɛɛgã, Gʋlsg Sõamyã sẽn yet bũmb ningã kɩtame tɩ d tar bas-m-yam t’a Zeova sũur nooma ne modgr ning d sẽn maandã.—Heb. 13:15, 16.