D moon koɛɛgã n da bas ye

¹ Sasa ninga, tõnd tõe n tagsdame tɩ tõnd moona d moonegã zĩig n yɩlem wʋsgo, tɩ neb wʋsg yaool n pa kelg ye. La bʋʋm wʋsg n be n kɩt tɩ d segd n ket n moond koɛɛgã.—Mat. 28:19, 20.

² Yaa kaseto: A Zezi ra pĩnd n togsame tɩ koɛɛgã mooneg me na n yɩɩ bãnd sẽn na n wilg tɩ d vɩɩ “dũniyã sɛɛb wakate,” la tɩ na n yɩɩ “kaset buudã fãa yĩnga.” (Mat. 24:3, 14) Nebã sã n ne tõnd tɩ d moond Wẽnnaam Rĩungã koe-noogã, yaa kaset sẽn tar pãng la d sẽn kõt-bã. D sã n moon zĩig n looge, nebã tõe n yõdg n gomda tõnd yell sẽn na maan lɛɛr dãmb wʋsg bɩ rasem wʋsgo, baa tɩ b sã n pa sak n kelg tõndo. D sã n mi bʋʋm nins sẽn kɩt tɩ d moondẽ wã, d na n ket n pẽdgda ne koɛɛgã moonego. A Zeova sũur noomame, d sẽn kõt kasetã, la d wilgd nebã yɛl nins sẽn na n wa wã n sõngd n pidsd Biiblã bãngr-goamã.—2 Tes. 1:6-9.

³ D pẽdg ne koɛɛgã moonego: Nebã sẽn pa tar sẽkã yĩnga, d segd n kell n modgame sẽn na yɩl n tõog n sõng-b tɩ b sak n deeg koɛɛgã. Pag a ye la b ra tʋgd n get semen fãa hal sẽn na maan yʋʋm tõr t’a yaool na n sak tɩ Kaset rãmbã sõs ne-a Biiblã zugu. Sõsgã yɩ-a-la noog hal t’a sak Biibl zãmsgo, n sɩng tigissã kẽnde. La rẽ poor bilfu, a wilgame t’a rat n deega lisgu.

⁴ Yɛl nins sẽn be dũniyã pʋgẽ wã tara toeengo, tɩ nebã me toeemdẽ. Tõe tɩ neb wʋsg sẽn da pa sak n kelg tõnd pĩndã na n datame masã n kelg koɛɛgã sẽn kõt saagrã. Baa yaa ned a yembr n sak n kelg Rĩungã koe-noogo, yaa tõnd pẽdgrã yĩnga.

⁵ Dũniyã gill zugu, neb nins sẽn “wõosd n yãbd bõn-wẽns nins sẽn maandã” yĩngã sõor tara paasgo. (Eze. 9:4) Koe-moondbã sõor sẽn tar paasgã wilgdame tɩ sũ-tɩrs rãmbã sakd n kelgda Rĩungã koɛɛgã. (Ezai 2:2, 3) Woto yĩnga, bɩ d ket n “moond laafɩ koɛɛgã la d togsd koe-noogã” n da bas ye.—Ezai 52:7; Tʋʋ. 5:42.