“Tõnd moona d moonegã zĩigẽ naoor wʋsgo!”

¹ Rẽ yĩnga yãmb zoe n tagsame tɩ y moona y moonegã zĩigẽ naoor wʋsg hal tɩ neb sẽn wõnd piis ka le be a pʋgẽ bɩ? Tõe tɩ y tagsa woto: ‘Mam mii neba manesem sẽn na n yɩ a soaba. Bõe yĩng tɩ m na n ket n debd neb sẽn ka rat n kelg nengẽ?’ Yaa sɩd tɩ zĩis n be tɩ d nong n moond wʋsgo. Baasg zãnga, d segd n gesa rẽ ne yam-sõngo, ka ne yam-wẽng ye. Tɩ bõe yĩnga? Ges-y yɛl a naas sẽn kɩt tɩ d tar bʋʋm n na n maan woto.

² Wẽnnaam deega tõnd pʋʋsgo: A Zezi yeelame: “Tigisg yaa wʋsgo la tigisdba yaa bilfu. Woto yĩnga, bɩ y kos tigisga soaba tɩ b tʋm tigisdb tɩ b kẽng b tigisgã.” (Luk 10:2) Maana yʋʋm pi-gĩn tõnd sẽn bõosd a Zeova t’a kõ-d sõngr n paase. Zĩis wʋsg masã d paama tʋm-tʋmdbã d sẽn datã n paase. Dẽ d moonda moonegã zĩigẽ naoor wʋsgo. Rẽ yĩnga a Zeova sẽn deeg tõnd pʋʋsgã woto wã ka segd n kɩt tɩ d maan sũ-noog sɩda?

³ Pẽdgrã womda bi-sõma: Baa zĩis nins d sẽn nong n moond wʋsgã, neb n sakd Rĩungã koɛɛg la b bãngd sɩdã. Rẽ n so tɩ d segd n ket n moond be, n saagdẽ tɩ d na yã pʋ-peelem dãmb a taaba. (Ezai 6:8-11) Wa a Zezi pipi karen-biisã sẽn maanã, ‘bɩ y ket n kẽngd’ nebã sẽn be moonegã zĩigẽ wã nengẽ. Modg-y n kɩt tɩ b tʋlg n bãng Wẽnnaam Rĩungã yɛla.—Mat. 10:6, 7.

⁴ Portigall tigims wʋsg moonda b mooneg zĩisã n sat rasem a yopoe fãa, la b ket n baas n yãta neb sẽn wõnd piisi. Saam-bi-poak a yembr n sɩd tar yam-sõng yel-kãngã zugu. A yeelame: “Yibeoog fãa, sẽn deng tɩ m yi moonegã, m pʋʋsda a Zeova t’a sõng-m tɩ m yã ned sẽn dat n zãms Biiblã.” Daar a yembre a maana segls n na n zãms ne zut manegr roog tʋm-tʋmdba. La kaoosg zugẽ wa n yaa ned a yembr bal n wat zãmsgã. Nin-kãng yeelame: “Neb a taabã ka nong zãmsgã ye, la mam yẽ nongame.” Kiis a yiib pʋgẽ bal t’a mengã ra maanda Biibl zãmsg a yiib ne neba. Pa kaoos la a reeg lisg ye. La kaoosg zugẽ a sɩnga so-pakrã tʋʋmde!

⁵ B maanda tʋʋmdã: Wa a Zezi sẽn da reng n togsã, b moonda koe-noogã. (Mat. 24:14) Baa zĩis nins neb sẽn ‘ka kelgd’ tõndã, tõnd moonegã tʋʋmd kõt-b-la keoogre. D reng n miimi tɩ neb kẽer ka na n kelg sɩdã ye, bɩ b na n kɩɩs-a lame menga. Baasgo, d segd n keooga neb a woto tɩ seke, n wilg-b t’a Zeova bʋ-kaoorã watame.—Eze. 2:4, 5; 3:7, 8, 19.

⁶ Tʋʋmdã nan ka sa ye: Pa tõnd n segd n yãk wakat ning moonegã tʋʋmd sẽn segd n sa wã ye. A Zeova mii wakat ning tʋʋmdã sẽn segd n sa wã takɩ. Yaa yẽ n mi neb sã n bee tõnd moonegã zĩigẽ n tõe n ket n sak koe-noogã. Neb n tõe n yeel rũndã tɩ b ka rat n kelg koɛɛgã ye, la toeeng kãseng n tõe n wa b vɩɩmã pʋgẽ. Rẽ tõe n yɩɩ tʋʋm sãoongo, bã-kɛgenga, bɩ nin-nongr kũum. Yel-kãensã tõe n kɩtame tɩ b kelg koɛɛgã wakat a to. Tõeeme tɩ tags-wẽns tõnd zut bɩ sẽk kaalem n kɩt tɩ neb wʋsg zɩ n wʋm koɛɛg ning d sẽn moondã ye. Tõeeme tɩ d sã n kẽng b nengẽ n yɩlem, n tall zood manesem, b tõe n yãa tõnd sẽn maandã n kelge.

⁷ Neb n lebg kãsemb sẽn nan pa kaoos pʋgẽ n tar b mens zags masã. B tõe n maanda yɩɩr n yɩɩd ne vɩɩmã masã, n tar sʋgsg Wẽnnaam Gomdã bal sẽn tõe n leoke. Ma a yembr n bool Kaset rãmb a yiib a zakẽ, n yeel-b woto: “Mam sẽn da wa n yaa bilfu, bũmb a yembr mam sẽn zɩ n wʋm a võor yaa m ma sẽn dag n digd Kaset rãmbã n yet-b t’a ka rat n kelgã. La b yaool n da ratame bal n sõs ne tõnd Biiblã zugu. Mam da yãka yam tɩ m sã n bɩ n kẽ kãadem n be m meng zakẽ fãa, m na n kosa a Zeova Kaset rãmbã tɩ b wa zãms maam Biiblã.” Yaa woto la a sɩd maanẽ me, tɩ rẽ kõ Kaset rãmbã sẽn wa a nengẽ wã sũ-noogo.

⁸ Y tõeeme n moon sõma n yɩɩd bɩ? Tõeeme tɩ ka zĩis nins d sẽn moond naoor wʋsgã neb n kɩtd wakat fãa tɩ moonegã yaa toog ye. Wakat ninga yaa tõnd mengã n kɩtd tɩ yaa woto. Tõnd sɩngda moonegã ne tags-wẽns bɩ? Tõnd sã n tar tags-wẽnse, tõe n toeema tõnd manesmã, tõnd koɛɛgã la tõnd nen-wamdã. Tall-y yam-sõngo, la y yɩ ned sẽn be yamleoogo. Mak-y n wilg koɛɛgã ne manesem a to. Toeemd-y y sẽn togsd koɛɛgã to-to wã, la y modgd n manegd y wilgrã sõma n paasdẽ. Y tõeeme n toeem y pipi sʋkrã bɩ y tũnug ne verse a to sõasgã pʋgẽ. Sʋk-y saam-biisã la saam-bi-pogs a taabã n bãng bũmb b sẽn yã tɩ woma biis bãmb moonegã pʋgẽ. Moon-y ne koe-moondb la so-pakdb toɛ-toɛya, n ges bũmb ning sẽn kɩt tɩ b moonegã yaa sõma wã.

⁹ A Zeova sakame tɩ b moon Rĩungã, la a ningda tʋʋmdã barka. Tõnd sã n maand tʋʋm kãngã, wilgdame tɩ d tara nonglem ne yẽ la ne neb a taabã. (Mat. 22:37-39) Dẽ bɩ d kẽng taoor ne tʋʋmdã n tɩ ta a baasg zĩigẽ, n da ya ne moonegã zĩigẽ kẽnd n yɩlemdẽ ye.