Yãmb tara y meng mooneg zĩig bɩ?
1. Meng mooneg zĩig yaa bõe?
1 Yaa zĩig ning b sẽn yãk n kõ-f tɩ f moonã la f meng mooneg zĩiga. A tõe n yɩɩ zĩig sẽn pẽ yãmba, tɩ y tõe n tɩ moon y yembr bɩ ne ned a to. Yaa sɩd tɩ d sã n naagd tigingã n moondẽ bee nafre, la d sã n tar d meng mooneg zĩig n moond sasa a taaba, tõe n sõngame n kɩt tɩ d moon nebã fãa sẽn be d moonegã zĩigẽ wã sõma. Rẽ sõngda tigims nins sẽn tar mooneg zĩis sẽn yalem wʋsgã pʋsẽ n yɩɩda.—Tʋʋ. 10:42.
2. D sã n tar d meng mooneg zĩiga, rẽ nafa kẽer la bʋse?
2 A nafa: Neb kẽer yãame tɩ b sã n tar b meng mooneg zĩig sẽn pẽ b tʋʋmã zĩigẽ, tɩ b tõe n moon midi wã vʋʋsg sasa bɩ tʋʋmã sigb poor bala, rẽ nafd-b lame n paase. Zags rãmb kẽer me naagda taab n moond b yagsã lɛɛr a ye bɩ sẽn yɩɩd woto, la b yaool n kẽng sebrã zãmsgẽ. B sẽn maan woto wã, b paama lebg-n-tɩ-ges rãmb ne Biibl zãms rãmb sẽn pẽ yambẽ, tɩ woto kɩt tɩ b pa sãamd b sẽkã la b ligdã ye. Moonegã zĩig sã n pẽ yambẽ, f tõe n moona neb wʋsg wakat bilf pʋgẽ, tɩ rẽ kɩt tɩ kẽer tõe n dɩk sõngr so-pakrã, bɩ wakat fãa so-pakrã menga. Sẽn paase, d sã n tar d meng mooneg zĩig n moond wakat fãa, d na n bãnga yɛl nins sẽn pak nebã n tõog n sõs ne-b rẽ zugu, tɩ kɩt tɩ b tall bas-yard ne-do. Woto d moonegã na n woma biisi.
3. So-pakd a ye sẽn tar a meng mooneg zĩig paama nafa bʋse?
3 So-pakd a ye tigims sull yel-gɛt sẽn sagl t’a kos a meng mooneg zĩig yeela woto: “Mam saka a saglgã, la pa yã n kaoos la mam moonegã zĩigẽ neb minim maam tɩ m paam zo-rãmb ye. Mam maaname tɩ wakat ning m sẽn na n lebg n tɩ ges nebã zems ne b sẽn tar sẽk wakate. Woto kɩtame tɩ neb nins mam sẽn lebgd n tʋgd n getẽ wã sõor sẽn da yaa neb 35 wã ta neb 80, la mam paama Biibl karen-biis a yopoe.”
4. Wãn to la d tõe n paam d meng mooneg zĩiga, la wãn to la d segd n tʋm-a?
4 D sẽn tõe n paam d meng mooneg zĩig to-to: Y sã n dat y meng mooneg zĩiga, bɩ y tɩ kos ned ning sẽn get moonegã zĩis yellã. Y tõe n kosa koe-moond a to t’a wa naag-y n moone. Gʋls-y neb nins y sẽn pa mik yirã adɛrs rãmba. Y segd n modgame n gilg y moonegã zĩig n sog kiis a naas pʋgẽ. Y sã n wa mik tɩ y pa na n tõog n maan rẽ, bɩ y kos y sebrã zãmsg sull taoor soab bɩ neb a taab tɩ b sõng-yã. Kiis a naasã poore, y tõe n tɩ lebsa moonegã zĩig karte, wall y kos n lebs n tʋm a pʋgẽ n paase. La y pa segd n tall kart yɛng n kaoos wʋsg ye. Y segd n tɩ lebs-a lame tɩ neb a taab me paam n deeg n moone. Yãmb tigingã mooneg zĩig sã n yaa bilf tɩ y pa tõe n paam y toorẽ mooneg zĩiga, y tõe n kosa y sebrã zãmsg sull taoor soab t’a yãk mooneg zĩig bɛk n kõ-yã.
5. Bõe n na n sõng-d tɩ d tõog n moon koɛɛgã sõma?
5 B sẽn yeel tõnd tɩ d moon koɛɛgã “dũniyã tɛk fãa” wã, yaa tʋʋm-kãseng meng la b sẽn bobl-dã. (Mat. 24:14) Tʋʋmdã baoodame tɩ b sigl-a sõma. Sullã neb sẽn naagd taab n moondẽ wã toor sẽn ka be, d sã n tar d meng mooneg zĩiga, na n sõng-d lame tɩ d tõog n taas neb wʋsg koe-noogã.