Yãmb sʋgsgã leoore

◼ Tigingã segd n talla kart sẽn wilgd koe-moonegã zĩis fãa tɩ be Rĩungã Roogẽ bɩ?

N-ye, b segd n kɩtame tɩ b maan wʋʋg buud n sui kart sẽn wilgd moonegã zĩis fãa n tabl Rĩungã Roog lalga. B ka segd n ning kart kãng sɛba tablg zĩigẽ ye. A segd n wilga moonegã zĩig b sẽn kõ tigingã tods fãa la mooneg zĩis fãa b sẽn kõ koe-moondbã todse, n paas sõor nins b sẽn gʋls b zutã. A segd n wilga tigims nins fãa sẽn tigimd Rĩung Roog a yembr pʋgẽ mooneg zĩis todse. Rẽ na n sõnga koe-moondbã la neb nins sẽn wilgd ratem paalmã tɩ b bãng bãmb sẽn vɩ tiging ning mooneg zĩigẽ. B sã n ning Tigingã Sebr Zãmsg zĩis kartã zugu, rẽ me na n sõnga neba fãa tɩ b yã sebr zãmsg ning pʋgẽ b sẽn ning-bã zĩiga. B segd n toeemda kartã t’a zemsd ne wakatã.

Kart a woto wilgr tẽegda koe-​moondba fãa tɩ yɩtẽ-la sõma tɩ b paam b meng mooneg zĩiga, tɩ sã n tõeyã. Kartã le sõngda b rãmb nins sẽn datã tɩ b yãk koe-​mooneg zĩig sẽn pẽ bãmb yirã. Koe-moonegã yiib tigissẽ, tõe n sõngame tɩ b ra sãam sẽkã ye. Bala taoor lʋɩtã tõe n teesa koe-moondb sull fãa babg ning b sẽn yãk tɩ b moonẽ wã tao-tao.

Kartã leb n yaa kaset sẽn wilgd tɩ tigingã sigla sẽn na yɩl n moon Rĩungã koɛɛg sõma mooneg zĩig ning b sẽn kõ-a wã pʋgẽ.​—Luk 9:6.