D sẽn na n moon nebã leebgã zĩisẽ to-to

1. Kaset kũun leebgã zĩisẽ nafa kẽer la bʋse?

¹ Yãmb nongẽ lame n moon zĩigẽ b sẽn minim n deegd neba, tɩ yaa vẽeneg tɩ y na n sega neba fãa la bal bɩ? Tõeeme tɩ y yã zĩ-kãngã buud yãmb mengã tiging mooneg zĩigẽ. Wãn-wãn to? Yaa y sẽn na n kẽng leebgã zĩisẽ. Koe-moondb nins sẽn kõt kasetã leebgã zĩisẽ wã paamda bi-sõma.

2. Wãn to la b tõe n sigl moonegã leebgã zĩisẽ?

² Tigims kẽer moonegã zĩisẽ, leebg zĩis n be. Saam-biig ning sẽn get-a moonegã zĩig yellã tõe n maana kart sẽn tar leebgã zĩisi. B tõe n gʋlsa kart dãmb nins sẽn tar zags la leebg zĩis sẽn naag taabã zut n wilg tɩ b segd n moona zagsã la b bas leebgã zĩisi. La zĩis kẽere b tõeeme n naag leebgã zĩis ne zagsã n moone. Y sã n zɩ n moon leebg zĩisẽ, bɩ y sɩng ne koosem zĩ-bõonese.

3. Bõe n na n sõng tɩ d kõ kasetã leebgã zĩisẽ tɩ wom biisi?

³ Sɩng-y sõasgã ne goam sẽn yaa nana: Yãmb sã n wa kõt kasetã leebgã zĩisẽ, bɩ y ning y futã tɩ yaa wa y rabda tigisg Rĩungã Roogẽ. Leb n yɩtẽ-la sõma tɩ y kẽ butikã pʋgẽ wakat ning nebã sẽn ka wʋsgã. Neb sã n pʋd n be be n daad teed mengã, sã n tõe fãa bɩ y bas tɩ b loog tɩ y yaool n kẽnge. Bao-y n yã-y taoor soabã bɩ sẽn get-a koosmã yellã. Kɩt-y tɩ y goama yɩ koɛɛg la takɩ. Bõe la y tõe n yeele?

4-6. D sã n wa kõt lɛɛbdbã kasetã, bõe la d tõe n yeele?

⁴ Y sã n wa gomd ne te-koaas bɩ butik taoor soaba, y tõe n yeela woto: “Lɛɛbdbã sẽn ka tar sẽkã yĩng kɩtame tɩ tõnd ka wɛ n yãt-b yir ye. Rẽ n so tɩ d wa yãmb koosmã zĩigẽ ka. Tõnd zʋrno rãmbã wilgda yɛl nins sẽn maan yaoolmã võore.” Rẽ poor bɩ y gom tagsg sẽn yit zʋrnall a yembr pʋgẽ yell koɛɛg-koɛɛga.

⁵ Y leb n tõeeme n sɩng sõasg ne nedã nana-nana woto: “Neb wʋsg ratẽ lame n bãng Biiblã n paase, la b yaool n ka tar vɩʋʋg ye. Seb-vã-kãngã wilgd-y-la Biiblã zãmsg tõnd sẽn maand ne nebã zaalem n sõngd-b tɩ b paamd sogsg nins sẽn tɩ loe ne Biiblã leoore.” Rẽ poor bɩ y wilg Y rat n bãnga Biiblã n paas bɩ? seb-vãoogã a seb-neng a 4-5 wã zĩigẽ.

⁶ Sẽn get-a koosmã yell sã n ka tar sẽka, y tõe n kãab-a-la seb-vãoog bal la y yeele: “M na n lebg n waa nindaare. M datẽ lame n bãng y tagsg sẽn ya a soab ne seb-vã-kãngã.”

7. Wãn-wãn la d tõe n gʋʋl ratem ning d sẽn yãt leebgã zĩisẽ wã?

⁷ D gʋʋl sɩdã ratem ning lɛɛbdbã sẽn wilgã: Y tõeeme meng n maan Biibl zãmsg ne lɛɛbdbã. Zall so-pakd n dag n dabd n kõt lɛɛbd zʋrno rãmbã wakat fãa. Rao wã wilgame t’a nanda bũmb ning a sẽn karemdã, tɩ so-pakdã mak Biibl zãmsg sẽn maand to-to ne Baood seb-bilã n wilgi. So-pakdã sɩnga Biibl zãmsg ne-a tʋʋmã zĩigẽ be bala. A sẽn yaa koaas n ka tar sẽkã yĩngã, wakat fãa so-pakdã ra tekda zãmsgã minit 10 bɩ 15. Bɩ tõnd me ket n baood neb nins sẽn zemsã, n kõt kasetã leebgã zĩisẽ.