Yãmb sʋgsgã leoore

◼ Wãn-wãn la b tõe n sõng ned sẽn da ka le moond hal sẽn kaoos t’a tõog n le yɩ koe-noogã moonda?

Ned sẽn ka le moond sã n tar manesem sẽn wilgd vẽeneg t’a tʋlla ne a sũur fãa n sõgen a Zeova, rẽ kõta sũ-noogo. (Luk 15:4-6) Vẽenega, neda basame tɩ kɩɩsgã la vɩɩmã zu-loees reeg a meng zãmsgã, tigissã rebre, la a koe-moonegã zĩiga. Wãn to la b tõe sõma n yɩɩd n sõng-a t’a bɩ tẽebã wɛɛngẽ?

Tõnd fãa segd n yãka yam n kɩt tɩ nin-kãngã tall bas-m-yam tɩ d nong-a-la ne kiris-ned nonglem hakɩka. Tao-tao kẽem dãmbã na n bao n bãnga bũmb nins sẽn yaa tɩlae ne-a takɩ tẽebã wɛɛngẽ. (Zak 5:14, 15) A sẽn da ka le moondã wakat sã n pa kaoose, tõe tɩ nin-kãngã sẽn baood bal yaa koe-moond sẽn tar minim sõngr sẽn na yɩl n leb n sɩng koe-moonegã tʋʋmde. La sã n mikame tɩ sẽn da ka le moond-a wã ka lagem ne tigingã wakat sẽn kaoos pʋgẽ, yaa vẽeneg tɩ rẽnd b sõng-a wʋsg n paase. Tõeeme, tɩ sẽn na yɩl n keng a tẽebã ne a nanebã, bɩ yɩ sõma tɩ b maan Biibl zãmsg ne-a sebr sẽn zems pʋgẽ. Sã n yaa woto, tʋʋmd yel-gɛtã na n dɩka segls tɩ saam-biig sẽn tar tõog maan Biibl zãmsgã. (Heb. 5:12-14; ges-y yʋʋmd 1998, sɩpaolg kiuug D Rĩungã Ministɛɛrã, Yãmb sʋgsgã leoore.) Yãmb sã n mi ned sẽn dat sõngr a woto buudu, bɩ y gom ne yãmb tigingã tʋʋmd yel-gɛta.

Sẽn deng tɩ b bool ned sẽn da ka le moond hal sẽn kaoos t’a leb n wa naag n moon koe-noogã, b sagendame tɩ kẽem dãmb a yiib seg-a n ges a sã n tara zʋg-sõma nins b sẽn baoodã n tõe n yɩ Rĩungã koe-moonda. B na n tũu manesem ning b sẽn tũud b sã n wa segd nin-paalg sẽn baood n na n tall zʋg nins b sẽn baood n yɩ koe-noogã moondã. (Ges-y yʋʋmd 1988, sɩpaolg kiuug rasem 15 Gũusg Gasgã [farende], seb-neng 17 wã.) Sẽn ka le moond-a wã segd n tʋlla ne a sũur fãa n taas koe-noogã neb a taaba. A segd n talla zʋg-kãsems nins b sẽn baoodã, b sẽn wilg Notre Ministère sebrã, seb-neng 99 wã pʋgẽ, la a wat tigingã tigiss wakat fãa.

Sẽn lebg n wa-a wã sã n tall tẽeb yɛl maaneg geelg-n-tʋm sẽn yaa sõma, rẽ na n sõng-a-la wʋsg t’a keng la a tall a zems-n-taarã ne a Zeova wã sẽn tar yõod wʋsgã, la a ket n kẽnd sor ning sẽn tar n debd vɩɩm sẽn ka sɛtã pʋgẽ. (Mat. 7:14; Heb. 10:23-25) A sã n maan “a sẽn tõe tɛk” n bɩɩs kiris-ned zʋg-sõma pãng sẽn kaoosde, rẽ na n kɩtame t’a ra tol n leb n yɩ kiris-ned karen-biig sẽn yaa ‘kʋɩɩm walla ned sẽn ka womd biis ye.’—2 Pɩɛ. 1:5-8.