D ra yĩm neb nins sẽn ye pa moond koɛɛgã la sẽn pa wat tigissã yell ye
1. Bõe yĩng tɩ d segd n bao n keng neb nins sẽn ye pa moond koɛɛgã raoodo?
1 Yãmb mii ned sẽn ye pa moond koɛɛgã bɩ? Tõe t’a zãaga a meng ne tigingã neb n pa ye wat tigissã ye. Tõe tɩ yãmb yãa nin-kãng buud zak-zak koe-moonegã sasa. D segd n tẽegame tɩ nin-kãng ket n yaa d saam-biiga. D rat n wilgame tɩ d ket n nong-a lame la d sõng-a t’a lebg n wa tigingẽ wã, la a wa ‘d sɩɩs Pekɩɩmã la d sɩɩs Gũudã nengẽ.’—1 Pɩɛ. 2:25.
2. Wãn to la d tõe n keng ned sẽn ye pa moond koɛɛgã la sẽn pa wat tigissã raoodo?
2 D wilg tɩ d pa yĩm b yell ye: D sã n telefõn wall d tɩ ges ned sẽn ye pa moond koɛɛgã la sẽn pa wat tigissã, d wilgdame tɩ d pa yĩm a soab yell ye. D tõe n yeelame tɩ bõe? D sã n kɩt t’a soabã bãng tɩ d tagsda a yelle, tõe tɩ na n kenga a raoodo. Kɩt-y tɩ y sõsgã yɩ noog la kengd raoodo. (Fil. 4:8) D tõe n togs-a-la bũmb tõnd sẽn wʋm tigisg ning sẽn loog tɩ pa kaoosã sasa tɩ yɩ d noogã. D tõeeme n bool-a tɩ d tũ taab n kẽng tigisgẽ wã bɩ tigis-kãsengẽ wã, la d yeel-a tɩ d na n baoa zĩig n bĩng-a bɩ d na n wa rɩk-a lame n kẽnge.
3. Wãn to la saam-bi-poak a ye lebg n yẽeg tẽebã pʋgẽ?
3 Saam-bi-poak a ye sẽn bas koɛɛgã mooneg sẽn yɩɩd yʋʋm 20 la b yã koe-moonegã sasa. Baa ne a sẽn tõdg Biibl zãmsgã, saam-bi-poak ning sẽn yã-a wã lebg n tɩ ges-a lame la a kõ-a zʋrno paalã. Rasem a tãab tigis-kãsengã loogr poore, koe-moondã tɩ sõsa ne saam-bi-poak ning tẽeb sẽn komsã n wilg-a bũmb nins b sẽn yã tigisg kãsengẽ wã, la rẽ sõng-a lame t’a yẽeg tẽebã pʋgẽ.
4. Ned sã n leb n sɩng tigissã waoongo, d manesem segd n yɩɩ wãn to ne a soaba?
4 Ned sã n leb n sɩng Wẽnnaam tʋʋmdã: Saam-biig tẽeb sẽn koms sã n leb n sɩng tigissã waoongo, d manesem segd n yɩɩ wãn to ne-a? A Zezi karen-biisã sẽn da loog n bas-a wakat bilf pʋgẽ n lebg n wa a nengẽ wã, a manesem yɩɩ wãn to ne-ba? Ne nonglem a bool-b lame t’a saam-biisi, la a wilg-b t’a tara bas-yard ne-ba. Hal menga a bobl-b-la tʋʋm-kãsenga. (Mat. 28:10, 18, 19) Rẽ poor bilf bala, b ra moonda koe-noogã n ‘ka basdẽ ye.’—Tʋʋ. 5:42.
5. Wilg-y yɛl sẽn baood tɩ d tɩ togs kãsem dãmbã sẽn na yɩl tɩ ned tẽeb sẽn koms paam sõngre.
5 Nand tɩ d sɩng Biibl zãmsg ne ned sẽn bas koɛɛgã moonego, bɩ nand tɩ d bool-a t’a wa yãag-d koe-moonegẽ wã, d segd n baoa sagls kãsem dãmbã nengẽ. D sã n yã ned tẽeb sẽn koms d moonegã zĩigẽ, d segd n togsa kãsem dãmbã tɩ b sõng a soabã.
6. Sũ-no-bʋg la d tõe n wa paam d sã n sõngd neb nins sẽn lak n bas tigingã?
6 Wala Biiblã sẽn wilgd vẽenegã, yaa neb nins sẽn na n kell n tall b tẽeb n tãag saabã n na n paam fãagrã. (Mat. 24:13) Woto yĩnga, bɩ d tẽeg neb nins sẽn lak n bas tigingã yelle. D sã n maag d mens n dɩk a Zeova nonglmã togs-n-taar n wilg tɩ nin-kãensã yell pak-d lame, d sũur na n yɩɩ noog b sẽn na n sak n lebg n sɩng Wẽnnaam tʋʋmdã ne tõndã yĩnga.—Luk 15:4-10.