Zoe-y a Zeova daarã fãa pʋgẽ
1 “Zusoaba zoees yaa yam sɩngre.” (Yɩɩl 111:10) A kengda tõnd tɩ d maan tʋʋm sõma la sõngd tõnd tɩ d zãag ne wẽnga. (Yel. 16:6, NW) Zoees a woto yaa waoogr sẽn zulum ne d Naandã, sẽn tusd-d tɩ d zoet d na n wa n kɩɩs-a n sãam a sũuri. Yaa bũmb d sẽn segd n bɩɩs la d wilg daarã fãa pʋgẽ.—Yel. 8:13.
2 Daar fãa, a Sʋɩtãan dũniyã yam weoogda tõnd hal sõma sẽn na yɩl tɩ d tũ a so-wẽnsã. (Ef. 6:11, 12) Tõnd yĩn-nemsã sẽn ka zems zãngã maanda yel-wẽna, la a nong n tʋlla wẽnga. (Gal. 5:17) Woto yĩnga, sẽn na yɩl n sak a Zeova noyã n tall sũ-noog la d paam vɩɩmã, d tog n zoe-a-la daarã fãa pʋgẽ.—Tõo. 10:12, 13.
3 Hebre dãmba 10:24, 25 (NW), b sagla tõnd tɩ d tigimd taab sẽn na yɩl n daool taaba, ‘n maan woto n yɩɩd’ wakat kãensã tõnd sẽn vɩ wã pʋgẽ. D sã n dat n põs yaoolem day kãensã, tigissã rebd n ka vaandẽ wã tara yõod wʋsgo. Tõnd sẽn zoet d na n wa sãam Wẽnnaam sũurã tusda tõnd tɩ d rebd tigissã la d wilgd naneb wʋsg ne b bõn-datlã. B rãmb nins sẽn zoet Wẽnnaamã geta kẽes-m-mengã kiris-neb tigissã pʋsẽ wala zu-noog sẽn yaa sõngo.
4 D tõeeme me n wilg d wẽn-zoeer d sã n sak noor ning b sẽn kõ tɩ b moon koe-noogã. (Mat. 28:19, 20; Tʋʋ. 10:42) Tõnd moonegã tʋʋmd pipi bõn-datl yaa sõng neb a taabã tɩ b tall a Zeova zoees la b sak a raabã. D maanda rẽ, d sã n maand lebg-n-tɩ-ges rãmba, n modgd n maand yirẽ Biibl zãmsg ne neba, tɩ rẽ poor bɩ d zãmsd neb a taabã Wẽnnaam noyã fãa. Yaa ne rẽ maasem la d wilgd tɩ d zoeta a Zeova la d nonga d taabã.—Mat. 22:37-39.
5 B rãmb nins sẽn ka zoet a Zeova wã ka baood n na n tall manesem sẽn wilgd tɩ b nanda tẽebã yɛl ye, la b basdame tɩ dũniyã pems-kʋʋdg bɩ a yam-tagsg tõog-ba. (Ef. 2:2, NW) Bɩ d rɩk sard kãn-kãe n “maan baleng tʋʋmd n kõ Wẽnnaam wẽn-zoeer la yɛɛsg pʋgẽ.” (Heb. 12:28, NW) Dẽ la d na n paam bark nins b rãmb nins sẽn zoet a Zeova daarã fãa pʋgẽ wã sẽn paamdã.