Tigims gĩnd tigis-kãseng paalga
B bilga bũmb bɩ ned zoees võor me wala “waoogr sẽn yaa kãsenga, sẽn yɩɩd fãa ne Wẽnnaam.” B goma zoees a woto sẽn yaa zoe-sõngã buud yell Gʋlsg Sõamyã pʋgẽ n yetẽ t’a yaa “yam sɩngre.” (Yɩɩl 111:10) Sẽn yaa lebend ne rẽ, zoees a to buud la a Sʋɩtãan dũniyã sẽn gũbg tõndã tara. Wãn to la d tõe n gil zoe-kãng sẽn ka sõma wã la d bao n zoe a Zeova? Yʋʋmd 2002 tʋʋmd yʋʋmdã tigims gĩnd tigis-kãseng paalg na n goma yel-kãngã yelle. A gom-zugã na n yɩɩ: ‘Zoe-y Wẽnnaam la y waoog-a.’ (Wil. 14:7) Tõnd yembr-yembrã la siglgã fãa na n paam n bãnga a Zeova zoeesã sẽn tõe n naf tõnd ne manesem toɛ-toɛ ninsi.
Yaa sɩd tɩ zoees tõe n kɩtame tɩ ned tall yɩɩre, tɩ ned koms raoodo, bɩ a ka rat n seg yell ye. La Biiblã yeelame: “Bark bee neb nins fãa sẽn zoet Zusoabã . . . zutu.” (Yɩɩl 128:1) Tigis-kãsengã sõss na n wilga tõnd d sẽn na n maan to-to n tõog zu-loees sɩd balengã pʋgẽ. D na n bãnga d sẽn tõe n maan to-to n sõng nin-paalsã tɩ b zoe Wẽnnaam ne zoees ning sẽn yaa sõngã. Rẽ na n sɩd tus-b lame tɩ b tʋlg n balem-a ne b sũy fãa, ne b sɩɩs fãa, ne b yam fãa, la ne b pãngã fãa. (Mark 12:30) Yaa tigims gĩn sull yel-gɛtã sõsg n na n baas pipi raarã. Sõs-kãng gom-zug yaa: “Pẽneg-y b rãmb nins y sẽn nongã n paase.” A na n wilga d sẽn na n maan to-to n gũus ne Sʋɩtãanã sẽn modgd n na n zãag tõnd ne a Zeova, ne d zaka rãmbã, ne d kiris-neb saam-biisã.
Raar a yiib soabã, gom-n-dees-taab sẽn tar babs a naas n na n zĩndi, t’a gom-zugã yaa: “Zoe-y a Zeova, la y ra zoe ninsaalb ye.” Zoees tõe n maaname tɩ d ka moon koe-noogã tɩ pidi, bɩ tɩ d ka tall d burkĩndi, la sũur kaset sẽn yaa sõma lekollẽ la tʋʋm zĩigẽ ye. Gom-n-dees taabã na n wilga bũmb ning sẽn kɩt tɩ d tog n tõog zoees buud fãa wã, la d sẽn na n maan to-to n tõog-a wã me. Zãma sõsgã gom-zug yaa: “Zoe-y Wẽnnaam la y sak bãmb tõodo.” Sõs-kãngã tika yɛl sẽn pʋgd taab nins b sẽn bilg Wilgr sak 14 pʋgẽ wã. Tigims gĩnd tigis-kãsengã na n baasa ne no-kãngã sẽn yaa sõma wã: “Ket-y n kẽnd a Zeova zoeesã pʋgẽ.”
Wẽnnaam tʋʋmdã lekolle, Tʋʋmd tigisg makrã, lisgã sõasga, la Gũusg Gasgã kʋmsg yaa tigis-kãsengã bõn-kãsems a taab d sẽn ka rat n konge. Bool-y y Biibl karen-biisã tɩ b wa zĩnd tigis-kãsengẽ wã ne yãmba. Ned ning fãa sẽn dat n deeg lisg segd n togsa yel-gɛt taoor soabã tao-tao. Tõnd fãa segd n tʋllame n wilg tɩ d zoeta a Zeova ne zoe-sõngã buudu, la d pẽgd-a. D na n tõog n maana woto d sã n pa vaal tigis-kãsengã sẽn tar yõod wʋsgã sõasg ba a yembre!