Yɩ-y ned sẽn kelgd neere
1 Kibl-m-meng yaa tɩlae sẽn na yɩl n kelg neere. Leb n baoodame me tɩ kɛlgdã tʋll n bãng a sẽn wʋmdã la a rɩ a yõodo. Yaa rẽ n so t’a Zezi wilg vẽeneg tɩ y segdame n “gũus neer ne yãmb sẽn [kelgd to-to wã, NW ].”—Luk 8:18.
2 Sẽn yɩɩd fãa, segd n yɩɩ woto d sã n wa be tigingã tigissẽ la tigis-kãsemsẽ wã. Yaa wakat kãensã la d tog n kelg neere. (Heb. 2:1) Ad tagsa kẽer sẽn na n sõng-y tɩ y yɩ ned sẽn kelgd neer kiris-neb tigis-kãens wakate.
◼ Tall-y naneb ne tigissã yõodo. B yaa manesem kãseng a yembr a ‘Zeova [sẽn tũnugd ne] n zãmsd’ tõnd ne “kɩs-sɩd yel-gɛtã” maasem.—Ezai 54:13, NW; Luk 12:42, NW.
◼ Deng-y n segl-y-yã. Lebg-y n ges zãmsg ning b sẽn na n maanã, n modg n zɩ y meng Biibl la sebr ning b sẽn na n zãmsã.
◼ Tigissã sasa, maan-y modgr zall n kelg neere. Ra gomd-y ne b rãmb nins sẽn zĩ ne yãmbã, bɩ n get bũmb nins neb a taab sẽn maand kɛlgdbã sʋkã ye. Mak-y n da bas tɩ y yamã yuusi, n tagsd yɛl y sẽn na n maan tigisgã poore, bɩ yɛl a taab zut ye.
◼ Vaees-y bũmb nins b sẽn wilgdã y yamẽ. Sʋk-y y menga: ‘Wãn to la woto pak maam? Wakat bʋg la m na n tũ-a?’
◼ Gʋls-y tagsa la verse kãsemsã koɛɛg-koɛɛga. Rẽ sõngd-y lame tɩ y tik y yamã yell ning b sẽn sõsdã zugu, la tɩ y tẽeg tags-kãsemsã rɩk-n-tʋm yĩng nindaare.
3 Zãms-y y kambã tɩ b kelge: Kambã rata zãmsg tẽebã wɛɛngẽ. (Tõo. 31:12) Tẽn-kʋdem wẽndẽ, “neb nins sẽn tõe n wʋm koɛɛg n bãng a võorã” Wẽnnaam nin-buiidã sʋkã ra segd n kelga neer b sã n da wa karemd tõogã b taoore. (Neh. 8:1-3) Roagdbã sã n kẽesd b mens tigissẽ wã la b kelgd neere, yaa vẽeneg tɩ b kambã me na n maana woto. Ka yɩt yam tʋʋmd tɩ b wa ne kamb deem teed bɩ sɛb sẽn na yɩl tɩ kambã tar-b n gʋnd b pʋsẽ n deemdẽ ye. Kabine wã kẽnd n yɩlemd wʋsg tɩ pa tɩlae me sãamda b kelgre. Sẽn mik tɩ “biig bul n yaa yalma,” roagdbã segd n modga ne b sũy fãa n ges tɩ b kambã zĩnd sɩɩ n kelg tigissẽ wã.—Yel. 22:15.
4 D sã n yaa neb sẽn kelgd neere, d wilgdame tɩ d sɩd tara yam n dat n “paam zãmsg n paase.”—Yel. 1:5, NW.