Yɩ-y sakd sẽn tar sũ-noogo
1 A Zezi yeelame t’a belmã wakate, wala a Nowe wakatã neba wʋsg sẽn yɩɩd ‘ka na n gũus n bãng ye.’ (Mat. 24:37-39, NW ) Dẽ d reng n miimi tɩ neb wʋsg ka na n kelg Rĩungã koe-noog ye. Bõe n tõe n sõng-d tɩ d tall sũ-noog d koe-moonegã tʋʋmd pʋgẽ?—Yɩɩl 100:2.
2 Pipi, d segd n ninga d yamẽ tɩ tõnd koɛɛgã la d moonegã tʋʋmd yita Wẽnnaam nengẽ. Ned sã n zãgs koe-noogã kelgre, baa ne d sẽn modgd sõma to-to wa d sẽn tõe tɛkã, sɩd-sɩda ya a Zeova la a soabã zãgsda. D sã n tẽeg t’a Zeova sũur nooma ne tõnd sẽn moond ne kɩs-sɩdã, rẽ na n sõnga tõnd tɩ d kell n yɩ Wẽnnaam gomdã sakdb sẽn tar sũ-noogo.—Zak 1:25.
3 Yiibu, neb n ket n be n na n sak a Zeova fãagr bõn-tũnugdgã. Tõe tɩ neb wʋsg sẽn yɩɩd wilg yam-kaalgo, baa ne rẽ, masã menga, saabã wakat sẽn kolg saab wʋsgã pʋgẽ, neb sẽn wõnd piis n ket n be d sẽn segd n tigmi. D segd n ket n moondame, n “kẽ tẽng ninga fãa, a sã n yaa tẽn-kãsenga bɩ tẽn-bila,” n “bao ned sẽn zemse.”—Mat. 10:11-13.
4 Kell-y n tall yam-sõngo: Tʋʋm-yood nins ziri tũudmã sẽn maan tɩ loogã vẽnega neb kẽer yam tɩ b sũy sãam. Yɛl siglg kãngã “fã-b lame tɩ b sãeege.” (Mat. 9:36, NW ) Tõeeme tɩ tʋʋma kaalem, laafɩ la bãan kaalmã yaa yɛl sẽn lim neb wʋsgo. D sã n bãng rẽ, na n sõng-d lame tɩ d kell n pẽdg d tʋʋmdã pʋgẽ. D modg n sɩng sõss sẽn tɩ loe ne yɛl nins sẽn pak tõnd moonegã zĩigẽ neb n yɩɩdã. Sõng-y-b tɩ b bãng tɩ Wẽnnaam Rĩungã bal la yɛlã tɩɩm. Tũnug-y ne verse rãmb la tagsa takɩ sẽn be sɛbã pʋsẽ n maan tɩ koe-noogã kẽ b sũyã.—Heb. 4:12.
5 Wẽnnaam gomdã sakdb sẽn tar sũ-noogã tẽegda woto wakat fãa: “sũ-noog ninga Zusoaba sẽn kõ [tõndã] na n yɩɩ [tõnd] pãnga.” (Neh. 8:10) Ka tɩlae tɩ d menes d sũ-noogã ye. “Yirã sã n zemse, bɩ y kɩt tɩ yãmb laafɩ wa a pʋgẽ, la a sã n ka zemse, bɩ y le reeg y laafɩ.” (Mat. 10:13) A Zeova kõta tõnd sũ-noog la pãnga, d sã n tõogd toog ne kɩs-sɩd a baleng tʋʋmdã pʋgẽ, la a ningda tõnd kɩs-sɩdã barka.