D sẽn na n gom to-to tɩ neb sake
1 Neb wʋsg ra miimi t’a Poll yaa koe-moond sẽn tõe n gom tɩ neb sake. (Tʋʋ. 19:26) Baa Rĩm a Agripa yeel-a-la woto: “A ketẽ-la bilf bal tɩ fo tõog tɩ mam yɩ Kirist neda.” (Tʋʋ. 26:28) Bõe n kɩt t’a Poll ra tõe n moon koe-noogã woto tɩ neb sake? Ya a sẽn da tũnugd ne tags-tɩrs sẽn tik Biiblã zugu, n maandẽ t’a leokrã zemsd ne a kɛlgdbã tagsa wã yĩnga.—Tʋʋ. 28:23.
2 Tõnd me segd n yɩɩ koe-moondb sẽn tõe n gom tɩ neb sak wa a Polle. Wãn-wãn to? Yaa d sẽn na n talld yam d sã n wa gomd ne la d kelgd neb a taabã. (Yel. 16:23) Yel-kãsems a tãab n na n sõng tõnd tɩ d maan dẽ.
3 Kelg-y neere: Kelg-y nedã n bãng bũmb yãmb y yiibã sẽn sak tɩ yaa sɩda. Woto y tõe n tika rẽ zugu. A soabã sã n yeel bũmb n kɩɩs y sẽn yetã, bɩ y bao n bãng bũmb ning sẽn kɩt t’a yet woto wã. Y sã n bãng a soabã sẽn tẽed bũmb ningã, bũmb ning sẽn kɩt t’a tẽed rẽ wã, la bũmb ning sẽn kɩt t’a kɩs sɩd ne rẽ wã, na n sõng-y lame. (Yel. 18:13) Bao-y ne yam n bãng yel-kãensã a soabã nengẽ.
4 Tũnug-y ne sʋgsgo: Ned sã n yeel t’a tẽeda Tãablmã, y tõe n sʋkame: “Tãablmã yaa zãmsg yãmb sẽn da sɩng n tẽed bɩ?” Rẽ poor bɩ y sʋke: “Yãmb zoe n vaeesa neer n bãng Biiblã sẽn yet bũmb ning yel-kãngã zug bɩ?” Y leb n tõeeme n sʋke: “Wẽnnaam sã n da beẽ Tãablem pʋgẽ, Biiblã da kõn yeelẽ dẽ vẽeneg sɩda?” A soabã leoor na n sõnga yãmb tɩ y kɩt t’a tags Biiblã sẽn yetã zug sõma.
5 Tũnug-y ne tagsg sẽn yaa sɩda: Pag a yembr n da tẽed t’a Zezi yaa Wẽnnaam, tɩ Kaset soab sʋk-a: ‘Yãmb sã n dat n bilg tɩ neb a yiib zema taaba, yãmb tõe n dɩka makr ne nin-bʋs zak pʋgẽ?’ Pagã leokame: “M tõe n dɩka makr ne ba-biis a yiibu.” Tɩ Kaset soabã paase: “Tõe tɩ b yaa kinkirs menga. La bõe la a Zezi ra rat tɩ tõnd bãnge, a sẽn yeel tɩ Wẽnnaam la Ba wã tɩ yẽ mengã yaa Biriblã?” Dẽ waa pagã yamẽ tɩ ned a yembr n kẽem a to wã, la a yɩɩd-a ne zu-sobendo. (Mat. 20:23; Zã 14:28; 20:17) A sẽn tũnug ne tagsg sẽn yaa sɩdã kɩtame tɩ pagã wʋm a goamã võore, tɩ kẽ a sũurã.
6 Yaa sɩd tɩ baa d sẽn tũnugd ne tags tɩrs n gome, ka neba fãa n na n sak sɩdã ye. D togs a Poll n modg n bao pʋ-peelem dãmbã tõnd moonegã zĩigẽ, n togs-b Rĩungã koɛɛg sẽn na yɩl tɩ b sak-a.—Tʋʋ. 19:8.