Kẽes-y y meng zãng tigisgã tʋʋmd pʋgẽ
1 A Zeova pĩnd no-rɛɛsdbã la a Zezi Kirist goma tigisgã tʋʋmd yelle. (Ezai 56:8; Eze. 34:11; Zã 10:16) B maanda tʋʋm kãng ne koe-noogã b sẽn moond dũniyã gill zug masã wã maasem. (Mat. 24:14) Welgr ning sẽn be neb nins sẽn balemd Wẽnnaam la neb nins sẽn ka balemd-a wã sʋkã lebgda vẽeneg wʋsg n paasdẽ. (Mal. 3:18) Ne tõndo, woto rat n yeelame tɩ bõe?
2 Yaa tʋʋmd tõnd sẽn segd n maane: Mak-sõng ning a Poll sẽn kõ wã tõe n kõo tõnd zãmsgo. A rag n lʋɩta kiris-ned tʋʋmdã taoor sõma-sõma. A ra yãame t’a segd n mooname, sẽn na yɩl tɩ neba fãa paam n wʋm koe-noogã n paam fãagre. Woto tus-a lame t’a tʋm wakat fãa b yĩnga. (Rom 1:14-17) Ãdem-biisã sẽn be yell wakatã, rẽ yĩnga ka tɩlae n yɩɩd tɩ d moon neb nins sẽn be d moonegã zĩigẽ sɩda?—1 Kor. 9:16.
3 Yaa tʋʋm yãgdem wakate: B tõe n maka moonegã tʋʋmd ne wala neb yõy sẽn na n be yell pʋgẽ tɩ b segd n fãag-b tao-tao. B tog n yãa nebã n sõng-b tɩ b yi yellã pʋgẽ tɩ nan pa kẽ n bõog ye. Wakatã sẽn ketã lebga koɛɛga. Neb yõy n be yell pʋgẽ! Pa lingr t’a Zezi sagl a karen-biisã tɩ b “kos tigisga soaba tɩ b tʋm tigisdba tɩ b kẽng bãmb tigisgã” ye.—Mat. 9:38.
4 Koe-moondb wʋsg sẽn mi tɩ wakatã lebga koɛɛg wʋsgã, b baoo weer n paas sẽn na yɩl n maan yõy fãagr tʋʋm kãngã. Bi-bɩɩg sẽn boond t’a Hirohisa n da vɩ ne a ma la a yaop a naase. A ra yikda yʋng wakat a tãab n yit n koosd zʋrno rãmba, sẽn na yɩl n paam ligd n sõng a zaka rãmba. Baa ne rẽ, a ra tʋllame n tʋm n paas koe-moonegã pʋgẽ. Rẽ n so t’a sɩng wakat fãa so-pakrã tʋʋmde. Wãn to la y tõe n kẽes y meng n paas tʋʋm-kãngã b sẽn ka na n le maan n yɩlmã pʋgẽ?
5 ‘Wakatã lebga bilfu.’ (1 Kor. 7:29) Woto yĩnga, bɩ d fãa maan d sẽn tõe fãa tʋʋm-kãseng ning b sẽn maand tẽngã zug masã wã pʋgẽ. Tʋʋm kãng yaa Rĩungã mooneg la karen-biisã maaneg tʋʋmde. A Zezi maka koe-moonegã ne tigisg tʋʋmde. (Mat. 9:35-38) D sã n kẽesd d mens zãng tigisgã tʋʋmd pʋgẽ, d tʋʋmdã na n woma biisi. D tõeeme n sõng ned t’a lebg balemdb kʋʋng kãseng ning yell b sẽn gom Wilgri 7:9, 10 pʋgẽ wã ned a yembre.