Tigis-kãsemsã yaa sũ-noog maaneg wakate!
1 A Zeova Kaset rãmbã tigis-kãsems yaa sũ-noog wʋsg maaneg wakate. Hal sẽn yɩɩd yʋʋm koabg la woto, tigis-kãsems kãensã sõngame tɩ neba sõor paas tõnd siglgã pʋgẽ. Sɩngrẽ wã tɩ ra yaa bilfu, la rẽ tɛka d yãame t’a Zeova ninga tõnd tʋʋmdã bark sõma dũniyã gill zugu. Pipi tigis-kãseng d sẽn maan tõnd wakatã yɩɩ yʋʋmd 1893, Sikago, Amerik pʋgẽ. Neb 360 sẽn wa wã sʋka, neb 70 n deeg lisg n wilg tɩ b rɩka b mens n kõ a Zeova. B sã n lagem neb nins fãa sẽn wa “Wẽnnaam Gomdã sakdba” tigims gĩn sul tigis-kãsems toɛ-toɛyã sõor taaba, fãa yikda 9454055 tɩ sẽn deeg-b lisgã sõor yaa 129367. Ad woto sɩd kõta sũ-noogo!
2 Sẽn sɩng Biiblã gʋlsg wẽnde, Wẽnnaam nin-buiidã tigis-kãsems yɩɩ bõn-kãsems b sẽn tũnug ne n kõ zãmsg sẽn yit a Zeova nengẽ. A Ɛsdras ne a Nehemi wakatã, nin-buiidã kelga Tõogã kareng “yibeoog tɩ ta wĩnto-sʋka.” (Neh. 8:2, 3) So-kãnga, neba paama “sũ-noog wʋsgo,” b sẽn wʋm Tõogã võor sõma n yɩɩgã yĩnga. (Neh. 8:8, 12) Tõnd me maanda sũ-noog ne tigis-kãsemsã sẽn kɩtd tɩ d tõe n paam zãmsg sẽn yaa sõma, la tẽeb rɩɩb ‘wa sẽn zems’ sẽn yit a Zeova nengẽ ne ‘tʋm-tʋmd sẽn tũud sɩd la sẽn tar yamã’ maasmã. (Mat. 24:45) A Zezi yeelame tɩ ninsaal tog n vɩɩmda ne “goam nins sẽn yit Wẽnnaam noorẽ wã.” Rẽ n so tɩ tigis-kãsemsã tar yõod tõnd tẽebã neer yĩnga.—Mat. 4:4.
3 Seka d na modg wa d sẽn tõe tɛk n kẽnge: Tõnd fãa segd n modgame n zĩnd rõandã “Wẽnnaam Gomdã karen-saam dãmba” tigims gĩn sull tigis-kãsenga. Daar fãa d segd n taa pĩnda, la d kell n pa be n tɩ ta baasg pʋʋsgã wakate, n tõog n naag nebã n yeel tɩ “Ãmiina!” Tõe n yaa tɩlae tɩ d maan segls n yã sẽk tigis-kãsengã yĩnga. Tõeeme tɩ yɩ toog tɩ d tõog n paam sor d tʋʋmdã taoor soab nengẽ n wa tigis-kãsengã. D segdame n bãng d sẽn na n maaneg vẽenega, n da bas yɛlã woto n maandẽ tɩ sẽn wa n yaa to-to bal ye. D segd n deng n maana segls pĩnd me, d sã n dat zĩ-gãaga, bɩ rɩkr sẽn na yɩl n kẽng tigis-kãsengã zĩigẽ. Seka d na maan modgr buud fãa sẽn yaa tɩlae!
4 A Zeova nin-buiidã ka magd tigis-kãsengẽ wã kẽngr bark ne ligd ye. Ges-y neb kẽer sẽn yãk yam n na n kẽng a Zeova Kaset rãmbã tẽn-tẽns tigis-kãsengã gom-zug sẽn yɩ Wẽnnaam daabã, b sẽn maan yʋʋmd 1958 New York galʋ-tẽngẽ wã makre. Saam-biig a yembr n pag a rot meeb ãnterpiriiz semen a yiibu, sẽn na yɩl tɩ sõng n tʋm la a zĩnd tigis-kãsengẽ wã. Saam-biig a yembr sẽn be Ill Viɛrz koosa a zĩig sẽn yaa ɛgtaar a yiibu, sẽn na yɩl t’a zakã neb a yoob kẽng tigis-kãsengã. Ned ne a pag n koos b koom kogl-bil sẽn na yɩl n tõog n tall b kamb a tãabã n kẽng tigis-kãsengã. Kambã ra tara kiis a yiib n digd yʋʋm a yopoe. B yeela Kaliforni ba-biis a tãab tɩ b sã n bas b tʋʋmã n kẽng tigis-kãsengã, b tʋʋma na n sãamame. La rẽ ka gɩdg-b tɩ b pa kẽng tigis-kãseng kãngã sẽn yɩ yel-pa-yĩmdgã ye.
5 A Zeova ningda tõnd modgrã barka: A Zeova nee a nin-buiidã modgr la a ningda rẽ barka. (Heb. 6:10) Wala makre, yʋʋmd 1950, neb nins sẽn wa tigis-kãsengã gom-zug sẽn yɩ Wẽnnaam sorã yidgrã, kelga sõsg b sẽn pa yĩmdi, gom-zug sẽn yaa “Zamaan paalga.” Saam-biig a Frederick Franz neka neba fãa tʋlsem ne yel-kãngã bãngr n sʋke: “Tẽns-tẽns tigis-kãseng kãngã kɛlgdb sũy na n yɩɩ noog tɩ b bãng tɩ zaab-kãngã menga, neb kẽer sẽn be tõnd sʋk ka, na n wa yɩɩ tẽn-paalgã na-biis bɩ?” Rẽ tɛka yʋʋm 50 n looge, la d ket n maanda sũ-noog ne vẽnegr a woto Yɩɩl Sõamyã 45:16 zugu.
6 Rɩẽ tigims gĩn sull tigis-kãsengã poore, zak soab a yembr sẽn zĩnd be gʋlsa ne mi-beoog woto: “Saam-biisi, ad tigis-kãseng kãngã sɩd fãaga tõndo! Mam ne m zakã rãmb yikame n kẽng galʋ-tẽngã pʋgẽ n na n tɩ bao tʋʋma. La d wa n baas n mikame tɩ yaa tõnd tẽebã pãng n komsde. . . . Tõnd da wa n tara yam-kaalg ne d kiris-ned zɩɩbã. Tõnd da pʋd n basa tigissã kẽnd la koe-moonegã. . . . Tigis-kãseng kãngã lebs n kõo tõnd pãnga. La d leb n yãkda bõn-datɩ tẽebã wɛɛngẽ, n manesd d yɛlã sẽn na yɩl n tõog n pids-ba.”
7 A Zeova kõta tõnd tẽeb rɩɩb ning d sẽn datã. A kõta tõnd rɩɩb sẽn yaa sõma wʋsg tigis-kãsemsẽ wã. Tõnd sã n tar naneb ne segls a woto, d na n tõogame n yeel wa a Korney sẽn yeel bũmb ning tʋm-tʋmd a Pɩɛɛr sẽn wa n wa a nengẽ wã. A ra yeela woto: “Masã tõnd fãa bee ka Wẽnnaam taoore tɩ kelg bũmb nins fãa Wẽnnaam sẽn yeel yãmb tɩ y togs tõndã.” (Tʋʋ. 10:33) Bɩ d modg n ‘zĩnd Wẽnnaam taoor’ tigim taab fãa wakate, rõandã “Wẽnnaam Gomdã karen-saam dãmba” tigims gĩn sul tigis-kãsengẽ n maan sũ-noogo!