Gom-y tɩ kẽ yãmb karen-biigã sũuri
1 Sẽn deng t’a Zezi rʋ saasẽ, a yeela a karen-biisã tɩ b zãms neb a taabã tɩ b “sak” bũmb nins fãa a sẽn da kõ-b noor tɩ b maanã. (Mat. 28:19, 20) Rɩlla d goama kẽ neda sũur sõma t’a yaool n tõog n “sak” Kiristã noyã. (Yɩɩl 119:112) Wãn to la y na n tõog n gom tɩ kẽ ned y sẽn zãmsd Biiblã ne sũuri?
2 Pʋʋs-y n kos a Zeova sor-wilgri: Wẽnnaam n so karen-biisã maaneg tʋʋmde. Yaa yẽ n segd n ning bark tɩ tʋʋmdã tõoge, la ka tõnd mengã tõod yĩng ye. (Tʋʋ. 16:14; 1 Kor. 3:7) Rẽ n so tɩ tar yõod wʋsg tɩ d kos t’a Zeova sõng-d tɩ d zãms sɩdã neb a taaba.—Ezai 50:4.
3 Bãng-y yãmb karen-biigã sẽn tẽedã: D sã n mi neba sẽn tẽed bũmb ningã, la bũmb ning sẽn kɩt tɩ b tar tẽeb kãense, na n sõng-d lame tɩ d bãng d sẽn na n yɛɛlg tɩ kẽ b sũyã. Bõe yĩng tɩ karen-biigã getẽ tɩ zãmsg ning bee yamleoogo? Bõe n kɩt t’a kɩs sɩd tɩ yaa zãmsg b sẽn tõe n tẽ? Yɛla bãngr a woto na n sõng-d lame tɩ d tags tɩ bɩ la d yaool n gome.—Tʋʋ. 17:22, 23.
4 Tũnug-y ne goam sẽn yaa sɩda, la sẽn tik Gʋlsg Sõamyã zugu: Karen-biigã segd n yãame tɩ sɩdã tara võor ne-a. (Tʋʋ. 17:24-31) D segd n kõo d saagrã võore. (1 Pɩɛ. 3:15) La y maan dẽ wakat fãa ne sõmblem la maag-m-menga.
5 Rɩk-y makr toɛ-toɛy n paas y zãmsgã pãnga: Makr kɩtdame tɩ yaa nana n yɩɩd ne karen-biig t’a wʋm yɛlã võore. La ka rẽ bal ye, a leb n kẽeda sũur me. Makr kẽeda yam la sũuri. A Zezi ra nong n tũnugda ne makre. (Mark 4:33, 34) Yaa vẽeneg tɩ makr segd n zemsa ne bũmb ning yell b sẽn gomdã n tõog n tall pãnga. Sẽn paase, a segd n tɩ loee ne yɛl sẽn pak karen-biigã.
6 Wilg-y sɩdã sakr yõodo: Neba ratame n bãng bũmb nins b sẽn zãmsdã tũub yõodo. Sõng-y karen-biigã t’a bãng t’a Poll goamã sẽn be 2 Tɩmote 3:14-17 pʋgẽ wã yaa sagls sẽn kõt yam.
7 Neb kẽer sã n ka sak y zãmsgã bɩ y ra sãam y sũur ye. Ka neba fãa n yaa sakdb ye. (Mat. 13:15) Baasg zãnga, neb kẽer n na n lebg tẽedba. (Tʋʋ. 17:32-34) Bɩ modgr ning y sẽn maand sẽn na yɩl tɩ koe-noogã kẽ neba sũyã sõng neb wʋsg n paas tɩ b “sak” bũmb nins a Zezi sẽn kõ noor tɩ b maanã.