Segl-y y meng a Ezai bãngr-gomdã zãmsg yĩnga!
1 “Balemdb sẽn yaa kɩs-sɩd dãmbã tõe n kɩsa sɩd t’a Zeova . . . ka na n bas t’a Sʋɩtãan dũniyã belem wogl ba a raar a yembr n zʋʋg wakat ning tɩrlmã sẽn baoodã ye.” Ad gom-kãnga sɩd kengd pɛlga! Yɛ la gom-kãngã yita? A yita La prophétie d’Isaïe, lumière pour tous les humains I sebrã pʋgẽ. A Ezai bãngr-gomdã kõta tõnd bʋʋm tɩ d tõe n tall tagsg sẽn kengd pɛlg a woto bɩ? N-ye! Biiblã seb-kãngã pʋgẽ, b gomd n tadga fãagrã zug sõma la vẽenega. (Ezai 25:9) Yaa rẽ yĩng la Wẽnnaam Gomdã bab-kãngã zãmsg Tigingã Sebr Zãmsgẽ sẽn na n keng tõnd pɛlg wʋsgã. D na n zĩnda be rasem a yopoe fãa n dɩ zãmsgã nafa bɩ? Bõe yĩng tɩ d segd n zĩnd be?
2 Ezai 30:20 pʋgẽ, b boola a Zeova tɩ tõnd ‘karen-saamba.’ A Zeova sã n wa tũnugd ne a Gomdã la ‘tʋm-tʋmd sẽn tũud sɩd la sẽn tar yamã’ sɛb n gomd ne tõndo, kiris-ned fãa segd n kelga neere. (Mat. 24:45; Ezai 48:17, 18) Yaa woto ne prophétie d’Isaïe I sebrã. Wãn to la y tõe n dɩ sebrã zãmsg nafa sõma n paase?
3 Segl-y n wa tõog n kẽes y menga: Semen fãa bɩ y bao weer tɩ sek n segl sebrã zãmsgo. Karm-y babg ning b sẽn na n zãmsã sull fãa. Tags-y sʋgsgã b sẽn gʋls tẽngrã zutu. Dẽes-y leoorã y sebrã pʋgẽ. B gʋlsa verse nins goam sẽn yit Ezai sebrã pʋgẽ wã ne gʋls-bi-tagdo. Maag-y y yĩng n karem-ba. Gẽes-y verse rãmb a taabã b sẽn sõdgã n bãng b sẽn tar loees nins ne zãmsgã. Bʋgs-y bũmb ning y sẽn zãmsdã zugu. Rẽ poor bɩ y taas yãmb sebr zãmsgã sull neb yãmb sẽn segl n yã bũmb ningã.
4 Saam-biig ning sẽn lʋɩt zãmsgã taoorã segd n sõnga sẽn wa-bã fãa tɩ b tʋm ne Biiblã sõma, la tɩ b bãng bũmb ning b sẽn zãmsdã yõod vẽenega. Sã n yaa yãmb la b yãk pipi tɩ y kõ leoorã, bɩ y kõ-a t’a yɩ nana la tɩrga. Ned a to sã n zoe n leoka tɩrga, bɩ y kõ togs-n-wels bũmb ning yell zug b sẽn sõsdã wɛɛngẽ. Y tõe n wilga verse-yẽgr sẽn teend gom-zugã to-to. Mak-y n kõ leoorã ne y meng no-goamã, la y maan sũ-noog ne y sẽn tõe n kẽes y meng sõasgã pʋgẽ wã.
5 Bɩ d naag taab ne yãgb n vaees koɛɛg sẽn tar yõod ning sẽn be Ezai sebrã pʋgẽ wã. Dẽ na n daoola tõnd tɩ d vɩ daar fãa n gũud a Zeova fãagrã ne sũ-noogo!—Ezai 30:18.