Manesem sõma yaa neb sẽn sakd Wẽnnaam zʋgo

¹ Rũndã-rũndã manesem sõma yaa bũmb sẽn ka wɛ. Tɩ bõe yĩnga? Bala neba yãg-yãgã yĩng kɩtame tɩ b ka minim n yaasd n yet waoogr goam wala “M bõos tɩ,” “Barka,” bɩ “Gaafar” ye. Wẽnnaam Gomdã ra reng n togsame tɩ yaoolem wakate, neba manesem na n sãamame n paase. A reng n togsame tɩ ‘neba na n yɩɩ beed dãmba, wilg-m-mens rãmba, tɩtaam dãmba, zɩ-beoog rãmba, nin-zaalse, neb sẽn ka tar nimbãan-zoeere, neb sẽn ka tar yõk-m-menga, nin-sõamyã kisgdba, neb sẽn ka gũusda.’ (2 Tɩm. 3:1-4) Zʋgd a woto wata ne manesem yoodo. Kiris-nebã sẽn yaa Wẽnnaam nin-buiidã, b segd n gũusame n da wa maan wa dũniyã neba, sẽn ka waoogd neb a taabã ye.

² Manesem sõma yaa bõe? D tõe n yeelame tɩ yaa f sẽn na gũusd wʋsg n ka rat n maan tɩ neb a taaba sũy wa sãam ye. Leb n yaa tõog ning f sẽn tar n tõe n zĩnd ne neb a taab laafɩ pʋgẽ. Manesem sõma nens kẽer yaa tall waoogre, yɩ nin-sõngo, gũus f goam la f manesem sẽn na yɩl n da wa maan tɩ neb a taab sũy sãam ye. Zʋg-sõma woto tika nonglem ne Wẽnnaam la ne f taab zugu. (Luk 10:27) Bõn-kãensã maaneg ka toog ye, la b tara yõod wʋsg sẽn na yɩl n kɩt tɩ d moorã ne neb a taabã yɩ noog n paase.

³ A Zezi kõo makr sẽn zems zãng zĩ-kãng wɛɛngẽ. Wakat fãa a tũu no-kãngã sẽn yaa sõma wʋsgã: “Bũmb ninga yãmb sẽn dat tɩ neba maan yãmbã, bɩ yãmb me maan bãmb woto.” (Luk 6:31) Rẽ yĩnga, tõnd sã n ges a Zezi sẽn ningd a meng a karen-biisã zĩigẽ la a tar nonglem manesem ne-bã, ka be yamleoog sɩda? (Mat. 11:28-30) Pa noy sẽn be manesem sõma sebr pʋgẽ n kɩt t’a tall manesem sõma ye. Ra yita a sũurẽ. Tõnd tog n tũu yẽ makrã.

⁴ Wakat bʋg la kiris-neb segd n tall manesem sõma? Yel-kãsems wakat bal d sã n wa rat tɩ neba pẽg-d bal bɩ? Bɩ yaa d sẽn na n wa rat n tus neb a taabã tɩ b maan bũmb bal la yaa tɩlae tɩ d maan dẽ? Ayo! D segd n talla manesem sõma wakat fãa. Sẽn yɩɩd fãa, yaa zĩ-bʋs wɛɛngẽ la d segd n tall manesem sõma, d sã n wa be ne neb a taabã tigingã pʋgẽ?

⁵ Rĩungã Roogẽ: Rĩungã Roog yaa tõnd baleng zĩiga. Yaa Wẽnnaam a Zeova n bool tõnd be. Dẽ b tõe n yeelame tɩ d ya a sãamba. (Yɩɩl 15:1) Tõnd sã n kẽng Rĩungã Roogẽ d yaa sãamb sẽn kõt mak-sõng bɩ? Tõnd manegda d futã la d mengã sõma bɩ? Sɩda, d ka segd n ning d futã tɩ yaa wala d bee d yir ye. D bee tigis-kãsemsẽ tɩ yaa d semen fãa tigingã tigissẽ, d miimi t’a Zeova nin-buiidã yaa neb sẽn ningd fut tɩ zemsd wa neb sẽn yet tɩ b sakda Wẽnnaam. (1 Tɩm. 2:9, 10) Woto, d wilgdame tɩ d tara naneb la waoogr ne d saasẽ Gãag Soabã la ne sãamb a taabã a sẽn boolã.

⁶ D leb n tõe n wilgame tɩ d tara manesem sõma tigissã wɛɛngẽ, d sã n wat tigissã pĩnda. Togs sɩda, ka wakat fãa la yaa nana ye. Neb kẽer tõeeme n be zĩ-zãrsẽ, bɩ b tara zak sẽn yaa kʋʋng n segd n segl-ba. La b yãame tɩ tigims kẽer pʋsẽ, hal sẽn ta neb 25 koabg zug n minim n wat tigisgẽ wã sɩngr yɩɩllã la pʋʋsgã poore. Yãoã yaool n ka reem yell ye. Yɩta sõma tɩ d tẽeg tɩ manesem sõma yaa f sẽn na n gũusd n ka rat n maan tɩ neb a taaba sũy wa sãam ye. A Zeova sẽn yaa tõnd Gãag Soben sõngã segla tẽeb kibs kãngã tõnd nafr yĩnga. Yaa tõnd sã n wa pĩnda, la d wilgd tɩ d ka rat t’a sũur sãame, la d wilgd d mi-beoog ne-a. Sẽn paase, tõnd sã n ka wat tigissã pĩnda, tiisda neb a taabã la wilgdẽ tɩ d ka waoogd neb nins sẽn zoe n wa n zĩ be wã ye.

⁷ Rẽ yĩnga, tõnd sã n wa tigmi, d gũusdame n bãngd nin-paalsã sẽn be kɛlgdbã sʋkã bɩ? Nin-paalsã reegr bee manesem sõma wã sʋka. (Mat. 5:47; Rom 15:7) Pʋʋs ned n yõk a nug ne yamleoogo, la noor yõgemdg yaa yel-bõonese, la b fãa naagame n kɩtdẽ tɩ b bãngd tõnd n bakdẽ wa kiris-neb hakɩka. (Zã 13:35) Rao sẽn wa Rĩungã Roogẽ a pipi poore, a yeelame: “Raar a yembr bala, mam sega neb m sẽn pʋd n ka mi sẽn tar nonglem hakɩk sõor sẽn yɩɩd m sẽn zoe n seg egiliiz ning pʋgẽ b sẽn wub maamã. Ra yaa vẽeneg tɩ m yãa sɩdã.” Rẽ kɩtame t’a toeem a vɩɩma, la kiis a yopoe poore a reega lisgu. N-ye, manesem sõma tõe n waa ne toeen-kãsenga!

⁸ Tõnd sã n tar manesem sõma ne sãambã d sẽn segdã, ka segd n yɩ woto ne ‘neb nins sẽn yaa tõnd ba-biis a Zezi tẽeba yĩngã n yɩɩd’ sɩda? (Gal. 6:10) No-kãng tũub tara yõod ka me: “Bɩ f waoog zoob-peend soaba la nin-kẽema [bɩ pʋg-yãanga].” (Maan. 19:32) D ka segd abada n yĩm nin-kãensã d tigissẽ wã ye.

⁹ D kelg neere: Tigingã tigiss wakate, Wẽnnaam sõgen dãmb sẽn yaa kiris-nebã sõss pʋsẽ, b kõta tõnd tẽeb kũun sẽn na yɩl n keng tõnd tẽebo. (Rom 1:11) Sɩda d ka wilgd tɩ d tara manesem sõma, d sã n suusdẽ, n wãbd sĩngom tɩ maand bʋrgo, n walemd ned sẽn zĩ n kɛg tõnd n yɩlemdẽ, n debd kabinẽ wã tɩ ka tɩlae, n karemd sɛb a taab sẽn ka tar loees ne sõasgã, bɩ n maand yɛl a taab tigissã wakate. Kãsem dãmbã segd n kõo mak-sõng zĩ-kãng wɛɛngẽ. D kiris-neb manesem sõma wã na n tusa tõnd tɩ d waoog sõasdã la a koɛɛgã sẽn tik Biiblã zugã, n kelg-a neere.

¹⁰ Sẽn paase, d sẽn waoogd sõsdã la kɛlgdbã yĩngã, d ka segd n bas tɩ d telefõn selilɛɛr maan bʋrg n wa ne tiisg tigissẽ wã ye.

¹¹ Kambã segd n talla manesem sõma: Wakat fãa roagdbã segdame n gũus b kambã manesem. Biig sã n sɩng kelems bɩ a ka tõe n zĩnd sɩɩ tigissã sasa tɩ woto tiisd neb a taabã, yɩta sõma tɩ b yi ne biigã yɩng tao-tao n kɩt t’a sĩndi. Wakat ninga woto tõe n yaa toogo, la tẽeg-y tɩ rẽ wilgdame tɩ y gũusdame n ka rat n maan tɩ neb a taabã sũy sãam ye. Naoor wʋsgo roagdb nins sẽn tar kom-bõoneg sẽn tõe n wa wa ne tiisgã zĩndeda poorẽ. Woto, sã n wa yaa tɩlae tɩ b yik n yi tigisgã wakate b ka tiisd neb wʋsg ye. Yaa vẽeneg tɩ kɛlgdb a taabã tõe n wilga waoogr ne zagsã, b sã n bas poorẽ zĩisã bãmb yĩng tɩ b zĩnd be, tɩ b sã n tʋlla.

¹² Roagdbã tog n bãnga b kambã sẽn maand bũmb ning sẽn deng tigissã la b poore. Kambã ka segd n zoet roogã pʋg ye, bala rẽ tõe n waa ne yĩdgu. Zoet n gilimd yɩng me tõe n waa ne yelle, sẽn yɩɩd fãa zaabre, zĩigã sã n wa yaa libsg n yɩɩda. D sã n maand bʋrg yɩng me, tõe n tiisa yagse, tɩ rẽ kɩt tɩ neba gom tõnd tũudmã wẽngã. Roagdb nins sẽn modgd ne b sũy fãa n get b kambã yell Rĩungã Roog pʋgẽ la a yɩngã zemsa ne pẽgre, bala woto kɩtdame tɩ d sẽn zĩ ne taab lagem-n-taar pʋgẽ wã yaa noog n yɩɩda.—Yɩɩl 133:1.

¹³ Sebrã Zãmsgẽ: D tara mi-beoog ne d saam-biis nins sẽn wilg sãand yam, n kõt b zags tɩ tigingã tõe n maan tigiss be wã. D sã n wa kẽng tigisg be, d segd n talla waoogr la naneb ne b zakã la b teedã. D sã n wa kẽedẽ, d segd n pĩmsa d naooda wã tom neer n da wa rẽgem roogã bɩ tapi wã ye. Roagdbã segdame n ges b kambã yelle, n modg tɩ b kell n pa zakã zĩig ning b sẽn yãk sebrã zãmsg yĩngã. Yaa sɩd tɩ sullã neb tõeeme n ka waoogẽ, tɩ yɛlã ka dem-dem woto ye, la d ka segd n maan yaar neb a taabã zagsẽ ye. Biig sã n dat n kẽng kabinẽ, a roagd n segd n yãag-a. Sẽn paase, sebrã zãmsg yaa tigingã tigisga, dẽ d segd n ninga d futã wala d sã n da rebda Rĩungã Roogẽ.

¹⁴ Manesem sõma tara yõod wʋsgo: Kiris-neb manesem sõma tallg wata ne pẽgr tõnd Wẽnnaam tʋʋmdã zug yembo, la sẽn paase, a kɩtdame tɩ tõnd moorã noom ne neb a taabã paasdẽ. (2 Kor. 6:3, 4, 6) D sẽn yaa sũ-noog Wẽnnaam balemdbã yĩngã, segd n yaa nana ne-d tɩ d nen-wamdã be yamleoog la pukd sũ-noogo, la tɩ d maand yel-sõm bõones sẽn kõt neb a taabã sũ-noogo. Manesem sõma a woto na n sɩd yɩɩ kaset sõng sẽn wilgd tɩ d yaa neb sẽn dɩk b mens n kõ Wẽnnaam.