Bas-y reemã a zĩigẽ
1 Wakat kãngã sẽn yaa toogã pʋgẽ, tõnd fãa mii n wa rata toeeng bilf d tʋʋma pʋsẽ. Reem bilf yaa bũmb sẽn zemse. Baasg zãnga, rɩk sẽk wʋsg tɩ loog reem, pemsem kokr bɩ soaare rãmb yĩng tõe n kɩtame tɩ ned maage, n boogd wakat ning a sẽn dɩkd n maand tẽebã yɛlã. D segd n basa reema a zĩigẽ. (Mat. 5:3, Sebr Sõngo) Wãn to la rẽ tõeyã? Yaa d sẽn na n tũ saglg ning sẽn be Efɛɛz rãmba 5:15-17.
2 Bãng-y y sẽn tõe n maan la y sẽn ka tõe n maane: A Poll gʋlsame n wilg tɩ kiris-nebã segd n ‘gũusa ne b kẽnd neere,’ tɩ zems wa neb sẽn zãad b vɩɩmã ne yam. D segd n talla maan-tɩ-zems la yõk-m-menga, n dɩk sẽk reemã yĩng tɩ zems ne sẽn segdã bala. D sã n paam vɩʋʋg fãa, yɩta sõma tɩ d reng n tags neer n bãng d sẽn na n dɩk-a n tʋm to-to. Reemã segd n talla nafr ne-do. A ka segd n kɩt tɩ d wa getẽ tɩ d sãama d sẽka, bɩ n kõ-d yaams wʋsg ye. Tõnd sã n maan deem n sa, n mik tɩ d ka paam baa fɩ a pʋgẽ, tɩ d sũurã ningd-d taale, rẽ wilgdame tɩ d segd n maana remsg bilf ne d sẽn dɩkd d sẽkã n tʋmd to-to wã.
3 Yɩ-y maan-tɩ-zems soaba: A Poll sagla kiris-nebã tɩ b ‘maan bãmb sẽn tõe tɛk wakat fãa’ yɛl nins sẽn tar yõod n yɩɩdã pʋsẽ, la b ra maan “yalemd ye.” Kiris-neb sẽn dɩk b mens n kõ wã ka basd tɩ reem soog b vɩɩmã ye. Baa vʋʋsg la reem sẽn lebsd n kõt tõnd yĩns keelmã, tõnd tẽebã keelem yita Wẽnnaam pãng sẽn tʋmdã pʋgẽ. (Ezai 40:29-31) Yaa ne Wẽnnaam tʋʋma maasem la d paamd a vʋʋsem sõngã, ka ne reemã maasem ye. Wẽnnaam tʋʋm kãens yaa Biiblã zãmsgo, tigingã tigiss kẽnde, koe-noogã moonego.
4 Yãk-y bũmb nins sẽn tar yõod n yɩɩdã: A Poll sagla kiris-nebã tɩ b “bãng Zusoaba yam sẽn yaa bũmb ninga.” A Zezi yeelame tɩ tõnd tʋʋma segd n tika Wẽnnaam Rĩungã zugu, tɩ rẽ yɩ pipi tõnd vɩɩmã pʋgẽ. (Mat. 6:33) D segdame n deng n maan yɛl nins sẽn na n sõng-d tɩ d vɩɩmd tɩ zems ne d sẽn dɩk d meng n kõ a Zeova wã. Yaa d sã n deng n maan woto la d tõogd n bas reema a zĩigẽ. Dẽ a na n naf-d lame la a leb n kõ-d sũ-noog n paase.—Koɛ. 5:11.