Tʋm-y ne y sẽkã ne yam
1 Tõnd sẽn tʋll n ta a Zeova yamã, kɩtame tɩ d lʋɩɩsd tẽebã tʋʋm taoore. A Gomdã wilgd-d lame tɩ d ‘reng n bao Wẽnnaam soolmã ne a tɩrlmã,’ la d “bãng bũmb nins sẽn yaa sõma n yɩɩdã.” (Mat. 6:33; Fil. 1:10) Wãn-wãn la d tõe n bao sẽkã n tʋm Rĩungã tʋʋm n yɩɩd tʋʋm a taabã?—Ef. 5:15-17.
2 Lʋɩɩs-y Rĩungã tʋʋm taoore: Segl-y y meng sẽn na yɩl tɩ tʋʋm a taab sẽn pa tɩlae ra sãam y sẽkã ye. Kiuug fãa sɩngrẽ, neb kẽer yãkda ray takɩ koe-moonegã yĩng n gʋls b kalãndirie wã zugu. Woto b tõogd n gũusame tɩ yɛl a taab ra wa tiis-b ye. D tõe n maana boto me n paam sẽk tigissã, d meng Biibl zãmsgã la tigis-kãsemsã yĩnga. Kẽer yãkda wakat takɩ daarã sɩngrẽ bɩ a baasgẽ n karemd Biiblã. Yãk-y wakat takɩ tʋʋmd ning fãa sẽn tar yõod yĩnga, n da bas tɩ bũmb nins sẽn pa tɩlaeyã tiis-y ye.—Koɛ. 3:1; 1 Kor. 14:40.
3 D ra bao n dɩ dũniyã nafa tɩ pid ye: Tẽns kẽer pʋsẽ, ɛspoorã, reemã, pemsmã kokr la yɛl a taab bee sasa buud fãa f sẽn date. Neb kẽer n dɩkd sẽk wʋsg-wʋsg n get televiziõ wã bɩ n tʋmd ne ordinatɛɛr dãmbã. La f sã n yaool n bas tɩ yõ-noogrã la masĩn-paal nins dũniyã sẽn kãabdã rɩ f sẽkã fãa, na n wa baasa ne sũ-sãamse. (1 Zã 2:15-17) Yaa rẽ yĩng la Gʋlsg Sõamyã sẽn sagend tõnd tɩ d ra bao n dɩ dũniyã nafa tɩ pidã. (1 Kor. 7:31) Y sã n tũ sagl-kãngã, a Zeova na n yãame tɩ y lʋɩɩsda a balengã taoor y vɩɩmã pʋgẽ.—Mat. 6:19-21.
4 Ka la bilfu, dũni kãngã na n loogame. Neb nins sẽn lʋɩɩsd Rĩungã tʋʋm taoorã na n paama sũ-noog la Wẽnnaam barka. (Yel. 8:32-35; Zak 1:25) Bɩ d tʋm ne d sẽkã sẽn tar yõod wʋsgã ne yam.