Bõe la yãmb lʋɩɩsd taoore?
1 B sã n sok yãmb woto y na n leokame tɩ bõe? Yaa vẽeneg tɩ tõnd fãa sẽn dat yaa Wẽnnaam Rĩungã yɛl lʋɩ taoore. (Mat. 6:33) La sok-y y meng woto: ‘Mam sẽn maand bũmb ninsã wilgdame tɩ yaa rẽ la m dat bɩ?’ Biiblã sagenda tõnd woto: “Mak-y yãmb mens n gese.” (2 Kor. 13:5) La wãn-wãn la d tõe n mak d mens n ges d sã n sɩd lʋɩɩsda Rĩungã yɛl taoore?
2 D sẽkã: D deng n sok d meng n ges d sẽn maand bũmb nins ne d sẽkã. (Ef. 5:15,16) D sẽn dɩkd sẽk ning n sõsd ne d zo-rãmba, n get televiziõ wã bɩ n gẽesd kibay ẽntɛrnetã pʋgẽ wã taa wãna? D sã n geel sẽk ning d sẽn dɩkd n maan woto fãa wã, la d mak-a ne sẽk ning d sẽn dɩkd n tʋmd tʋʋm nins a Zeova sẽn dat tɩ d maanã, tõe tɩ na n ling-d lame. Rẽ yĩnga d baooda bõn-bɛd tɩ rẽ kɩt tɩ d tʋmd wʋsg hal tɩ rɩkd d sẽkã tɩ d pa tõe n tʋm Rĩungã tʋʋm bɩ? Yaa naoor a wãn la d vaal tigiss bɩ d bas n pa yi koɛɛgã moonego, d sẽn dat n vʋʋs bɩ n maan bũmb n noog d yõor yĩnga?
3 Sẽn tar yõod n yɩɩdã pipi: Yaa toog tɩ d tõog n maan d sẽn dat n maan bũmb ninsã fãa. Rẽ n kɩt tɩ d sã n dat n lʋɩɩs Rĩungã yɛl taoor bɩ yaa tɩlae tɩ d tũus “bũmb nins sẽn yaa sõma n yɩɩdã.” (Fil. 1:10) Bũmb nins sẽn yaa sõma n yɩɩdã sʋka, d tõe n sõdga Wẽnnaam Gomdã karengo, koe-noogã moonego, d zaka rãmb yell gesgo, la tigissã kẽnde. (Yɩɩl 1:1, 2; Rom 10:13, 14; 1 Tɩm. 5:8; Heb. 10:24, 25) Yɛl a taab me wala reem sẽn wɩsgd yĩnsi, reem a taab bɩ pems kokr sẽn yaa sõma manegda neda. (Mark 6:31; 1 Tɩm. 4:8) La woto fãa yõodã sẽn pa ta tẽebã tʋʋmã yõodã yĩngã, pa segd tɩ b yãmb d sẽkã ye.
4 Saam-biig a ye sẽn yaa bi-bɩɩg n da baood n ning Rĩungã yɛl pipi zĩigẽ. A basa a na karem n zãag n wa paam tʋʋm sõngo, n dɩk wakat fãa so-pakrã tʋʋmde. A zãmsa buud gomd a to, la a kẽng zĩig koe-moondbã raab sẽn yaẽ wʋsgo n na n tɩ sõng be rãmbã. A yeelame: “Mam sẽn be ka wã m sũur nooma wʋsgo. Koe-moonegã nooma maam hal kẽengo! M saagdame bal tɩ kom-bɩɩsã fãa na n maana woto n paam sũ-noog ning maam sẽn paamdã. Bũmb kaẽ t’a sõmblem ta f sẽn na n dɩkd f sẽn tara fãa n maand a Zeova raabã ye.” Yaa sɩd tɩ d sã n lʋɩɩsd Rĩungã yɛl taoore, wata ne barka. La sẽn tar yõod n yɩɩdã yaa rẽ sẽn noogd d saasẽ Ba a Zeova sũurã.—Heb. 6:10.