Togs-y sɩd koɛɛgã tɩrga
1 A Filip sẽn da wa n moond tẽng taoor soab a yembre, a “sɩnga ne Gʋlsg Sõng [verse ninga] n togs yẽnda a Zezi koe-noogo.” (Tʋʋ. 8:35) A Filip ra yaa ned “sẽn togsd sɩd koɛɛga tɩrg bala.” (2 Tɩm. 2:15) La rũndã-rũndã kaagr yel-gɛtb yãame tɩ koe-moondb wʋsg sã n kõt kasetã b ka le tũnugd ne Biiblã woto ye. Yãmb tũnugda ne Biiblã koe-moonegã pʋgẽ bɩ?
2 Tõnd sẽn tẽed la d zãmsd nebã bũmb ninsã fãa yita Wẽnnaam Gomdã pʋgẽ. (2 Tɩm. 3:16, 17) Yaa rẽ n tusd neba tɩ b wat a Zeova nengẽ la zãmsd-b tɩ b tall vɩɩm sẽn yaa sõma. Yaa rẽ yĩng la sẽn tar yõod tɩ d tũnug ne Biiblã d koe-moonegã pʋgẽ, n da sõsd ne nebã gom-zut sẽn noom tõnd zut balã. (Heb. 4:12) Neb wʋsg ka mi Biiblã sõma ye. Rẽ n so tɩ d segd n karem Biiblã meng pʋgẽ n wilg-b sor-wilgr ning Biiblã sẽn kotã, la a sẽn wilgd tɩ ãdem-biisã tõe n paama beoog-daar ningã.
3 Karm-y Biiblã meng pʋgẽ n wilg a soabã: Y tõe n mak n kẽnga zak-zak n da zɩ koe-mooneg korg ye. Y tõe n ninga sɛb nins y sẽn dat n kãabã nugẽ kor-paklg bedrem sẽn zems bal pʋgẽ, la y zãad Biiblã y nugẽ bɩ y sui-a y gɩfẽ. Dẽ, y sã n wa sõsd ne neda, y tõe n tũnuga ne Biiblã, n da maan t’a soabã wa tagsdẽ tɩ y rat n kõ-a-la tũudum sõs-wok ye. Yals-y sẽn na yɩl tɩ y kɛlgdã tõog n naag-y n karem yãmb Biiblã pʋgẽ. Tõeeme tɩ y na n kos-a lame t’a zẽk a koɛɛg n karem verse wã. A mengã sã n tõog n yã Biiblã sẽn yet bũmb ningã tɩ ka yãmb noorẽ bal la a wʋm-yã, kẽed-a lame n yɩɩda. Yaa vẽeneg tɩ y na n gom n tadga gom-biis nins sẽn wilgd tagsa wã vẽenegã zutu, n sõng-a t’a wʋm verse wã võore.
4 Mooneg sẽn tũnugd ne verse a yembre: Y sã n wilg y sẽn ya a soab poore, y tõe n yeelame: “Neb n baood sor-wilgr zĩis toɛy-toɛy b vɩɩmã pʋgẽ. Yãmb tagsdame tɩ sor-wilgr sẽn zemsã yita yɛɛnẽ? [Bas-y t’a leoke.] Yãmb tagsda wãn-wãn ne gom-kãngã? [Karm-y Yelbũna 2:6, 7, la y bas t’a leoke.] Ninsaalb yamã ka tõog n sõng nebã ye, tɩ rẽ kɩt tɩ neb wʋsg ka mi b sẽn maandg ye. La wakat fãa yam sẽn yit Wẽnnaam nengẽ wã bee bas-yard la nafre.” Rẽ poor bɩ y wilg sebr ning y sẽn kãabdã, la y wilg makr a yembr sẽn wilgd Wẽnnaam yamã sebrã pʋgẽ.
5 A Zezi tũnuga ne Gʋlsg Sõamyã n sõng pʋ-peelem dãmbã. (Luk 24:32) A Poll tũnuga ne Gʋlsg Sõamyã n wilg t’a sẽn zãmsd nebã yaa sɩda. (Tʋʋ. 17:2, 3) Tõnd bas-yardã la d sũ-noogã koe-moonegã pʋgẽ na n paasame, d sã n togsd Wẽnnaam koɛɛgã tɩrg ne minim n paasdẽ.