Yãmb teenda Wẽnnaam Gomdã bɩ?
1 Dũni kãngã neb sẽn pa nand Biiblã sʋka, kiris-neb hakɩkã teenda Wẽnnaam Gomdã sẽn yet bũmb ninsã ne yẽesem. Tõnd sẽn kɩs sɩd tɩ Gʋlsg Sõamyã zãng yaa Wẽnnaam n kõ tõndã, d sak n deega a Zezi Kirist sẽn yeel a Zeova pʋʋsg pʋgẽ t’a “goamã yaa sɩdã.” (2 Tɩm. 3:16; Zã 17:17) Wãn to la d tõe n sɩd teel Wẽnnaam Gomdã sõmã?
2 D tẽegd verse rãmbã: Vẽenega, a Zezi meng ra zãmsda Wẽnnaam Gomdã sõma. Rẽ sõng-a lame t’a tik Biiblã zug n zãms nebã. (Luk 4:16-21; 24:44-46) Bõe la d na n maan n tõog n da yĩm verse rãmbã? Yaa d sẽn na n karemd Biiblã daar fãa la d bʋgsd verse d sẽn yã tɩ tõe n keng d raood zugu, bɩ sẽn tõe n sõng-d koɛɛgã mooneg pʋgẽ. D sã n wa segend tigissã, d segd n karma verse rãmbã Biiblã pʋgẽ, la d bao n bãng d sẽn na n tik verse kãensã zut n kõ leoor to-to. B sã n wa karemd verse rãmb tigissã sasa, d segd n geta d Biiblã pʋgẽ n tũudẽ. D sã n zãmsd Biiblã verse rãmba, na n sõng-d lame tɩ d tõog n “togsd sɩdã koɛɛg tɩrg bala.”—2 Tɩm. 2:15.
3 D bas tɩ Biiblã gome: D sã n wa moond koɛɛgã d segd n basame tɩ Biiblã gome. Wala makre, sã n sakdẽ d segd n karma verse tɩ kɛlgdã kelge, la d tik verse kãng zug n sõs ne-a. A sã n sok sokr walla a kɩɩs-do, yɩta sõma tɩ d tik Biiblã zug n leok-a. Baa kɛlgdã sã n pa tar sẽka, d tõe n wilg-a-la koɛɛg sẽn yit Biiblã pʋgẽ. D tõe n yeela woto: “Nand tɩ m looge, kõ-y-m sor tɩ m karem verse a ye n wilg-yã.” Sã n sakdẽ, bɩ y modg n karem verse wã Biiblã pʋgẽ ne kɛlgdã.
4 B sẽn wilg ned a ye verse rãmb sẽn wilgd tɩ tãablmã pa tik Biiblã zugu, a yeelame: “Mam dogem tɛk n tãag masã mam kẽngda egiliizẽ, la sɩda mam zɩ n bãng tɩ Biiblã yeta woto ye!” A sak n na n zãmsa Biiblã. A Zezi yeelame t’a piisã na n kelga a koɛɛgã. (Zã 10:16, 27) Bũmb ning sẽn tõe n sõng pʋ-peelem dãmbã tɩ b bãng sɩdã n yɩɩd yaa b mens sẽn na n karem Biiblã pʋgẽ n yã. Woto yĩnga, bɩ d kell n teel Wẽnnaam Gomdã sẽn yaa sɩdã!