Kãsem dãmbã kɩɩmda Wẽnnaam bãgrã piis ne yẽesem
1 Ad a Zeova sẽn tũnug ne a Biriblã n maan ‘neb kũunã’ sɩd yaa sõngr sẽn wilgd t’a nonga tõndo! (Ef. 4:8, 11, 12) B segd n maana tʋʋm wʋsgo, tɩ kɩɩm Wẽnnaam bãgrã piis ne yẽesem be sʋka. (1 Pɩɛ. 5:2, 3) Segl-kãngã sẽn tar yõod wʋsgã nafda tõnd fãa. Neb kẽer segda zu-loeese, bɩ b waa tigingã pʋgẽ paalem, bɩ b tara pãn-komslem, bɩ b kẽe weoog tẽebã wɛɛngẽ. Kãsem dãmbã rata nin-kãensã fãa yɩ-neer tẽebã wɛɛngẽ.—Fil. 2:4; 1 Tes. 5:12-14.
2 Dũniyã yɛl sã n wa ne rabeem, pe-kɩɩm pʋgds kãensã lebgda ‘wa zĩ-lilldg sobg wakate la wa zĩ-soalgdg sa-kẽeng wakate.’ Tõnd sã n wa yɛ n koms raood n dat belsgo, b kõta tõnd yolsgo. Yɛl a woto pʋsẽ, b yaa “wa kʋɩls tẽn-koɛɛng pʋgẽ” bɩ “wa kug-kãseng maasem tẽng sẽn ka pãng pʋgẽ.”—Ezai 32:2.
3 B kengda sẽn ka le moond-bã raoodo: Rõandã tʋʋmd yʋʋmdã pʋgẽ, kãsem dãmbã maanda modgr wʋsg n kengd neb nins sẽn ka moond kiuug fãa wã bɩ sẽn ka leb n moond-bã raoodo. Rẽ yaa sẽn na yɩl n sõng-b tɩ b leb n kẽes b mens tigingã tʋʋm fãa pʋsẽ wakat fãa n ka vaandẽ ye. B maana pe-kɩʋʋng gesg ne nonglem nin-kãensã wʋsg nengẽ, n sõng-b tɩ b wat tigingã tigiss n ka vaandẽ, la b keng b tẽebã hal tɩ b wa leb n moond koe-noogã yɛsa. Modgr a woto fãa kãsem dãmbã sẽn maandã wilgdame t’a Zeova geta d yell ne nonglem la t’a Zezi Kirist yaa taoor lʋɩt sẽn yaa yẽesenga. Yẽ mengã kõo mak-sõngo, n ges a piis nins sẽn kẽ weoogã yelle.—Mat. 18:12-14; Zã 10:16, 27-29.
4 Pe-kɩɩm pʋgdsã gũusda bãn nins fãa sẽn wilgd tɩ ned rat n lʋɩɩ tẽebã wɛɛngẽ wã. Ned sẽn wõnd a komsa raoodo, sẽn vaand tigissi, bɩ sẽn maag koe-moonegã pʋgẽ rata sõngr tẽebã wɛɛngẽ. Kãsem dãmbã tʋlla wʋsg n sõng ned ning fãa sẽn sɩng n talld dũniyã manesem futã ningr la mengã manegr wɛɛngẽ, bɩ sẽn sɩng n sãbsd tigingã. Yel-gɛtb sẽn tar nonglem la sẽn get tɩ tigingã neb yell pak-b lame sakame n na n ‘kõ b mens’ n sõng neb a woto tɩ b leb n tall nonglem ne a Zeova.—1 Tes. 2:8.
5 Pĩnda, bãase, laog zu-loeese, bɩ zak pʋgẽ yɛl wulumda kiris-neb sẽn dɩk b mens n kõ tɩ b zãag b mens ne tigingã, n bas tẽeba tʋʋma. Pe-kɩɩm pʋgdsã ka sãbsd nin-kãensã ye, la ne nonglem b sõng-b lame tɩ b tall bas-m-yam t’a Zeova geta a piisa fãa yelle, la a sõngd-b tɩ b yalsd kãn-kãe toog wakate. (Yɩɩl 55:23; 1 Pɩɛ. 5:7) Bãgrã pe-kɩɩmb sẽn yaa gũusdb sõngd-b lame tɩ b bãng tɩ b sã n ‘kolg Wẽnnaam, a na n kolga bãmba,’ n belsd-b la a kengd b pelse.—Zak 4:8; Yɩɩl 23:3, 4.
6 B nanda koms rãmbã: Pe-kɩɩm pʋgdsã sẽn tar nonglmã geta neb nins b sẽn tõe n wa yĩm nana-nana wã me yelle. Tiging fãa pʋgẽ, neb n be n gãe ne bãas bɩ sẽn tar komslem a taaba. D mii vẽeneg tɩ b komslmã yĩnga, nin-kãensã ka tõe n moon Rĩungã koɛɛg wʋsg ye. Tõeeme tɩ yaa neb sẽn wat n get-ba, roagdba, bɩ b rãmb nins sẽn zãad-bã bal la nin-kãensã tõe n paam n moone. La bũmb ning b sẽn tõog n maan fãa, b geta rẽ wala bũmb sẽn tar yõod sẽn sõngd tɩ moonegã tʋʋmd kẽngd taoore. (Mat. 25:15) Baa yaa minit 15 la b moon-yã, b segd n gʋlsa rẽ tʋʋmdã kɩbay sebr pʋgẽ n kɩse, la b na n ket n sõt-b-la wala Rĩungã koe-moondb sẽn moond kiuug fãa.
7 Sẽn yɩɩd fãa, yʋʋmdã wakat kãngã sẽn yaa Tẽegrã sasa wã, kãsem dãmbã sẽn yaa ‘neb kũunã’ mii b saam-biisã raab sẽn ya a soab tẽebã wɛɛngẽ. Ad sɩd yaa wakat sẽn zemse, tɩ kãsem dãmbã modg wʋsg n sõng neb nins fãa sẽn kẽ weoog tẽebã wɛɛngẽ bɩ sẽn ka le moondã tɩ b leb n paam sũ-noog la yam-gãandg ning lagem-n-taar ne tigingã sẽn wat ne wã! Ad sɩd kõta sũ-noogo, d sã n ne neb a woto sẽn yaa “tõnd ba-biis a Zezi tẽeba yĩngã” tɩ b wat tigingã tigiss la b yit koe-moonegã, n leb n wilgdẽ tɩ b tẽeda maoong sẽn yaa rondã Pekɩɩm Sõngã sẽn kõ ne nonglmã!—Gal. 6:10; Luk 15:4-7; Zã 10:11, 14.